Read De Bibel JHF Hesekiel 39 Bible Online

Hesekiel 39 - De Bibel JHF bible

Hesekiel 39

¹Un du, Menschensän, profezei jäajen Gog un saj: Soo sajcht de Har, Gott: Kjikj, ekj well aun die, Gog, Ferscht von Rosch, Meschech un Tubal.

²Un ekj woa die rommlenkje un fieren, un die nopptrakjen loten vom wieden Nuaden häa, un die oppe Boaj Israels brinjen.

³Un ekj woa die däm Boagen ut diene linkje Haunt schlonen un diene Feilasch ut diene rajchte Haunt schmieten.

⁴Oppe Boaj Israels woascht du faulen, du un aul dien Hupe un de Velkja, dee met die sent; dan Raupväajel met aulalei Fadren un de Tieren vom Flekj ha ekj die too Speise jejäft;

⁵oppem frieen Flekj saust du faulen. Dan ekj ha jerät, sajcht de Har, Gott.

⁶Un ekj woa Fia schekjen äwa Magog un äwa dee, dee oppe Inslen secha wonen. Un see woaren weeten, daut ekj de Har sie.

⁷Un ekj woa mienen heiljen Nomen enne medd von mienem Volkj Israel toweeten loten, un woa mienen heiljen Nomen nich mea entheiljen loten. Un de Nazionen woaren weeten, daut ekj de Har sie, dee Heilja en Israel.

⁸Kjikj, daut kjemt un woat passieren, sajcht de Har, Gott. Daut es de Dach, von däm ekj jerät ha.

⁹Un de Bewona de Städa Israels woaren rutgonen, un woaren Fia moaken un hette met Jewäaren un runde Schilda un grote Schilda, met Boages un Feilasch un met Spiessen un Brostschilda; un see woaren doamet säwen Joa lank Fia moaken.

¹⁰Un see woaren kjeen Holt vom Flekj holen noch ut de Weela haken, sonda woaren met de Jewäaren Fia moaken. Un see woaren äare Reibasch beroowen un äare Plindra plindre, sajcht de Har, Gott.

¹¹Un daut woat passieren aun janem Dach, doa woa ekj Gog eene Städ toom Grauf en Israel jäwen, de Läacht de Waundra dee oppe Oostsied vom Mäa; un daut woat de Waundra däm Wajch vehindren. Un doa woaren see Gog un siene gaunze Menj begrowen, un see woaren daut nanen: De Läacht de Menj Gog [Läacht Hamon-Gog].

¹²Un daut Hus Israel woat an begrowen, om daut Launt too reinjen säwen Moonaten lank;

¹³un daut gaunze Laundesvolkj woat an begrowen, un daut woat an aun däm Dach toom Riem sennen, doa ekj mie veharlichen woa, sajcht de Har, Gott.

¹⁴Un see woaren Mana utwälen, dee emma em Launt omhäa trakjen, un soone, dee met de omhäa trakjende em Launt Äwajebläwne begrowen, om daut to reinjen; no säwen Moonat woaren see daut derchforschen.

¹⁵Un de omhäa trakjende woaren em Launt omhäa trakjen; un wan eena een Menschenknoake sitt, soo woat hee een Tieekjen oppstalen, bat de Doodesbesorja daut enne Läacht de Menj Gog begrowen.

¹⁶Un uk de Nomen de Staut saul Hamona sennen. Un soo woaren see daut Launt reinjen.

¹⁷Un du, Menschensän, soo sajcht de Har, Gott: Sajcht to de Väajel met aulalei Fadren un to de Tieren oppem Flekj: Vesaumelt junt un komt, saumelt junt von aule Sieden häa no mienem Schlachtopfa, daut ekj fa junt jeschlacht ha, eenem groote Schlachtopfa oppe Boaj Israels, un frät Fleesch un drinkjt Bloot!

¹⁸Fleesch von Helden sell jie fräten, un Bloot von Ferschten de Ieed sell jie drinkjen: Kosenbakj, fate Schop un Bakj un Ossen, aula toop en Baschan jemast.

¹⁹Un Fat sell jie fräten bat jie saut sent un Bloot drinkjen bat jie bedrunken sent von mienem Schlachtopfa, daut ekj fa junt jeschlacht ha.

²⁰Un jie sellen aun mienem Desch saut woaren von Pieed un Rittasch, von Helden un aulalei Kjrichsmana, sajcht de Har, Gott.

²¹Un ekj woa miene Harlichkjeit unja de Nazionen brinjen; un aule Nazionen sellen mien Jerecht seenen, daut ekj jehoolen ha, un miene Haunt, dee ekj aun an jelajcht ha.

²²Un von janem Dach aun un wiedahan woat daut Hus Israel weeten, daut ekj, de Har, äa Gott sie.

²³Un de Nazionen woaren weeten, daut et Hus Israel om siene Ojjerajchtichkjeit wellen wajchjefieet wort, wiels see ontru jäajen mie jewast sent, un ekj haud mien Aunjesecht ver an vestoaken, un ha an en de Henj äare Bedrenja jejäft, soo daut see aula toop derch daut Schwieet jefollen sent.

²⁴No äare Ojjerajchtichkjeit un no äare Äwaträdunk ha ekj met an jehaundelt, un ha mien Aunjesecht ver an vestoaken.

²⁵Doarom, soo sajcht de Har, Gott: Nu woa ekj Jakob siene Jefangenschoft dreien un mie daut gaunze Hus Israel erboarmen, un woa fa mienen heiljen Nomen iewren.

²⁶Un see woaren äare Schmach droagen un aul äare Truloosichkjeit, met dee see jäajen mie ontru jehaundelt ha, wan see en äarem Launt secha wonen un kjeena an enjst,

²⁷wan ekj an ut de Velkja trigjjebrocht un an ut de Lenda äare Fiend jesaumelt, un ekj mie aun an ver de Uagen dee väle Nazionen jeheilicht ha.

²⁸Un see woaren weeten, daut ekj, de Har, äa Gott sie, endäm ekj an no de Nazionen wajchjefieet ha un an wada en äa Launt saumel un kjeenem mea von an doa äwalot.

²⁹Un ekj woa mien Aunjesecht nich mea ver an vestäakjen, wan ekj mienen Jeist äwa daut Hus Israel utjegoten ha, sajcht de Har, Gott.