Read De Bibel JHF Hesekiel 4 Bible Online

Hesekiel 4 - De Bibel JHF bible

Hesekiel 4

¹Un du, Menschensän, nemm die een Tieejelsteen un laj däm ver die han, un tieekjen doabowen eene Staut, Jerusalem.

²Un moak eene Beloagrunk jäajen ar, un bu Beloagrungstorms jäajen ar, un schedd jäajen ar eenen Waul opp, un stal Häaloaga jäajen ar, un recht Stormbakj jäajen ar runtom opp.

³Un du, nemm die eene iesane Paun un stal ar aus eene iesane Mia tweschen die un de Staut; un recht dien Aunjesecht jäajen ar, daut see en Beloagrunk es un du ar beloagascht. Daut es een Tieekjen däm Hus Israel.

⁴Un du, laj die opp diene linkje Sied un laj doanopp de Schult vom Hus Israel: No de Zol de Doag, dee du doabowen lichst, saust du äare Ojjerajchtichkjeit droagen.

⁵Dan ekj ha die de Joaren äare Ojjerajchtichkjeit to eene Zol de Doag jemoakt: 390 Doag; un du saust de Ojjerajchtichkjeit vom Hus Israel droagen.

⁶Un hast du dise erfelt, soo laj die toom tweede mol opp diene rajchte Sied un droag de Ojjerajchtichkjeit vom Hus Juda 40 Doag; je een Dach fa een Joa ha ekj die jemoakt. —

⁷Un du saust dien Aunjesecht un dienen kolen Oarm jäajen de Beloagrunk von Jerusalem han rechten, un du saust jäajen an profezeien.

⁸Un kjikj, ekj laj die Strenj aun, daut du die nich von eene Sied opp de aundre omdreien woascht kjennen, bat du de Doag diene Beloagrunk erfelt hast.

⁹Un du, nemm die Weit un Joascht un Schaublen un Lensen un Heazh un Dinkel, un doo daut en een Jefäss; un moak die doarut Broot, no de Zol de Doag, dee du opp diene Sied lichst: 390 Doag saust du doavon äten.

¹⁰Un diene Speise, dee du äten woascht, saul nodäm Jewicht sennen: 20 Schekel fa däm Dach; von Tiet too Tiet saust du doavon äten.

¹¹Un Wota saust du nom Mot drinkjen: een 6-tet Deel vom Hin; von Tiet too Tiet saust du drinkjen.

¹²Un aus Joaschtekuake saust du an äten, un du saust an opp Balla von Menschenmest ver äare Uagen baken.

¹³Un de Har säd: Aulsoo woaren de Kjinja Israel äa Broot onrein äten unja de Nazionen, wuahan ekj an vejoagen woa.

¹⁴Doa säd ekj: Ach, Har, Gott! Kjikj, miene Seel es niemols veonreinicht worden, un noch Os noch Verätnet ha ekj jejäten von miene Jugent aun bat nu, un kjeen vedorwnet Fleesch es en mienem Mul jekomen.

¹⁵Un hee säd to mie: Kjikj, ekj ha die Koomest staut Menschenmest erlaubt; un doabowen muchst du dien Broot reedmoaken.

¹⁶Un hee säd to mie: Menschensän, kjikj, ekj well (un) en Jerusalem de Brootstett vebräakjen; un see woaren Broot äten nom Jewicht un en Angst, un Wota drinkjen nom Mot un en Entsaten,

¹⁷wiels Broot un Wota Mangel haben woaren, un see metenaunda veschmachten un en äare Ojjerajchtichkjeit veschmachten.