Read De Bibel JHF Hesekiel 40 Bible Online

Hesekiel 40 - De Bibel JHF bible

Hesekiel 40

¹Aum 25-sten Joa von onse Wajchfierunk, aum Aunfank em Joa, däm 10-den em Moonat, aum 14-den Joa, nodäm de Staut jeschloagen wia, aun däm seljen Dach kaum de Haunt Gottes äwa mie, un hee brocht mie doahan.

²En jettliche Jesechta (Visionen) brocht hee mie en daut Launt Israel, un hee leet mie rauf opp eenen sea huagen Boajch; un opp däm seljen, jäajen Sieden, wia daut aus de Bu von eene Staut.

³Un hee brocht mie doa han; un kjikj doa, een Maun, däm sien utseenen wia aus daut utseenen von Koppa; un en siene Haunt wia eene lienzeichne Schnua un een Motstock; un hee stunt em Dooa (Puat).

⁴Un de Maun räd to mie: Menschensän, kjikj met diene Uagen un hia met diene Uaren, un recht dien Hoat opp aules, waut ekj die wiesen woa; dan doamet et die jewast woat, doatoo best du hiahäa jebrocht worden. Berecht däm Hus Israel aules, waut du sitst.

⁵Un kjikj, eene Mia wia butrem Hus runtom; un enne Haunt vom Maun wia een Motstock von sas Ellen un eene Hauntbreet. Un hee maut de Breed vom Bu: Een Stock, un de Hecht: Een Stock.

⁶Un hee jinkj nom Dooa (Puat), daut jäajen Oosten jerecht wia, un stieech oppe Stoopen nopp. Un hee maut de Schwal vom Dooa: Een Stock breet, un zwoa de ieeschte Schwal een Stock breet;

⁷un jiedre Wajchtastow: Een Stock lank un een Stock breet, un tweschen de Wajchtastowen fief Ellen; un de Dooaschwal bie de Dooahaul (Väastow) nom Hus han: Een Stock.

⁸Un hee maut de Dooahaul nom Hus han: Een Stock;

⁹un hee maut de Dooahaul: acht Ellen, un äare Feilasch: Twee Ellen dikj, un de Dooahaul (Väastow) wia nom Hus han.

¹⁰Un de Wajchtastowen vom Dooa jäajen Oosten wieren 3 opp dise un 3 opp jane Sied; een Mot hauden aule 3, un een Mot de Feilasch opp dise un opp jane Sied.

¹¹Un hee maut de Breed de Däa Opninj: 10 Ellen, un de Lenj vom Dooa: 13 Ellen.

¹²Un eene Jrens wia ver de Wajchtastow, von eene Elle opp dise Sied; un eene Elle wia de Jrens opp jane Sied. Un jiedre Wajchtastow wia sas Ellen opp dise un sas Ellen opp jane Sied.

¹³Un hee maut daut Dooa vonne Wajchtastowen-Dak bat nom aundren Dak: 25 Ellen Breet, Däa jäajen Däa.

¹⁴Un hee bestemd de Feilasch too 60 Ellen Huach. Un aun de Feilasch wia de Väahoff runtom daut Dooa.

¹⁵Un von de väaschte Sied vom Engank bat to de väaschte Sied de Haul vom Ennalichen Dooa wieren 50 Ellen.

¹⁶Un veschlotne Fensta wieren aun de Wajchtastowen, un zwoa aun äare Feilasch, nom Ennalichen Dooa han, runtom, un krakjt soo aune Wenj; un soo wieren Fensta runtom no bennen han; un aun de Feilasch wieren Paulmen.

¹⁷Un hee brocht mie en däm butaschten Väahoff. Un kjikj, doa wieren Stowen un een Steenplosta runtom aum Väahoff jemoakt; 30 Stowen wieren opp däm Steenplosta.

¹⁸Un daut Steenplosta wia aune Sied vonne Dooasch, soo lank aus de Dooasch wieren, daut wia daut unjaschte Steenplosta.

¹⁹Un hee maut de Breed vonne väaschte Sied vom Dooa, vom unjaschten Väahoff bat däm bennaschten Väahoff, von buten, 100 Ellen; soo wia daut aun de Oostsied un aun de Nuadsied.

²⁰Un daut Dooa, daut nom Nuaden jerecht wia, aum butaschten Väahoff: Hee maut siene Lenj un siene Breed;

²¹un siene Wajchtastowen, 3 opp dise un 3 opp jane Sied; un siene Feilasch un siene Väahaul. Daut wia nom Mot vom ieeschten Dooa, 50 Ellen siene Lenj un 25 Ellen de Breed.

²²Un siene Fensta un siene Haul un siene Paulmen wieren nom Mot vom Dooa, daut jäajen Oosten jerecht wia; un opp 7 Stoopen jinkj maun nopp, un siene Haule wieren ver an.

²³Un een Dooa nom bennaschten Väahoff wia däm Dooa nom Nuaden un nom Oosten jäajenäwa; un hee maut vom Dooa nom Dooa 100 Ellen.

²⁴Un hee fieed mie jäajen Sieden. Un kjikj, doa wia een Dooa jäajen Sieden; un hee maut siene Feilasch un siene Haule no janem Mot.

²⁵Un Fensta wieren aun am aun siene Haule runtom, aus jane Fensta. De Lenj wia 50 Ellen un de Breed 25 Ellen.

²⁶Un 7 Stoopen haud siene Trap, un siene Haul wia ver an; un daut haud Paulmen aun siene Feilasch, eene opp dise un eene opp jane Sied.

²⁷Un een Dooa nom bennaschten Väahoff wia jäajen Sieden; un hee maut vom Dooa nom Dooa jäajen Sieden, 100 Ellen.

²⁸Un hee brocht mie derch daut Sieddooa en däm bennaschten Väahoff. Un hee maut daut Sieddooa no janem Mot,

²⁹un siene Wajchtastowen un siene Feilasch un siene Haule no janem Mot. Un Fensta wieren aun am un aun siene Haul runtom. De Lenj wia 50 Ellen un de Breed 25 Ellen.

³⁰Un Haule wieren runtom, de Lenj 25 Ellen un de Breed fief Ellen.

³¹Un siene Väahaul (Väastow) wia jäajen däm butaschten Väahoff; un Paulmen wieren aun siene Feilasch; un 8 Stoopen wia siene Trap.

³²Un hee brocht mie en däm bennaschten Väahoff jäajen Oosten. Un hee maut daut Dooa no janem Mot,

³³un siene Wajchtastowen un siene Feilasch un siene Haule no janem Mot. Un Fensta wieren aun am un aun siene Haule runtom. De Lenj wia 50 Ellen un de Breed 25 Ellen.

³⁴Un siene Haule wieren jäajen däm butaschten Väahoff han; un Paulmen wieren aun siene Feilasch opp dise un opp jane Sied; un 8 Stoopen haud siene Trap.

³⁵Un hee brocht mie nom Nuaddooa. Un hee maut daut no janem Mot:

³⁶siene Wajchtastowen, siene Feilasch un siene Haule. Un Fensta wieren aun am runtom. De Lenj wia 50 Ellen un de Breed 25 Ellen.

³⁷Un siene Feilasch wieren nom butaschten Väahoff han; un Paulmen wieren aun siene Feilasch opp dise un opp jane Sied; un 8 Stoopen haud siene Trap.

³⁸Un eene Stow un äa Engank wia aun de Dooafeilasch; doa wosch maun de Brauntopfa auf.

³⁹Un en de Dooahaul wieren 2 Descha opp dise un 2 Descha opp jane Sied, om opp an de jeschlachten Brauntopfa un Sindopfa un Schultopfa too lajen.

⁴⁰Un buten, aun däm, nom Nuaden ligjende Sied aum Dooaengank, wieren 2 Descha; un aun de aundre Sied de Dooahaul 2 Descha:

⁴¹4 Descha opp dise un 4 Descha opp jane Sied, aune Sied vom Dooa: 8 Descha, opp dee maun daut jeschlachten Fleesch läd.

⁴²Un fa daut Brauntopfa wieren 4 Descha von behakte Steena, aundathaulw Ellen lank un aundathaulw Ellen breet un eene Elle huach; opp dise läd maun daut Jereetschoft, met waut maun daut Brauntopfa un daut Schlachtopfa schlacht.

⁴³Un de dobbelde Hoakes, eene Hauntbreet lank, wieren runtom aum Dooahus faust jemoakt; un opp de Descha kjeem daut Opfafleesch.

⁴⁴Un vonne butaschte Sied, vom bennaschten Dooa, wieren 2 Stowen em bennaschten Väahoff: Eene aune Sied vom Nuaddooa, un de väaschte Sied jäajen Sieden; eene aune Sied vom Sieddooa jäajen Nuaden han.

⁴⁵Un hee säd to mie: Dise Stow, dee äare väaschte Sied nom Sieden han licht, es fa de Priesta, dee nom Tempeldeenst opppaussen.

⁴⁶Un de Stow, dee äare väaschte Sied nom Nuaden han licht, es fa de Priesta, dee oppem Aultoa opppaussen. Daut sent de Säns Zadok, dee vonne Säns Levi däm Harn noda komen sellen, om am to deenen.

⁴⁷Un hee maut däm Väahoff: De Lenj 100 Ellen un de Breed 100 Ellen em Veaakj. Un de Aultoa wia ver däm Hus.

⁴⁸Un hee brocht mie no de Haul vom Hus. Un hee maut däm Feila de Haul: fief Ellen opp dise Sied un fief Ellen opp jane Sied; un de Breed vom Dooa: 3 Ellen opp dise un 3 Ellen opp jane Sied.

⁴⁹De Haul wia 20 Ellen lank un 11 Ellen breet, un zwoa aune Stoopen, aun dee maun nohecht jeit. Un Stendasch wieren aun de Feilasch, eene opp dise un eene opp jane Sied.