Read De Bibel JHF Hesekiel 41 Bible Online

Hesekiel 41 - De Bibel JHF bible

Hesekiel 41

¹Un hee brocht mie en däm Tempel. Un hee maut de Feilasch: sas Ellen breet opp dise un sas Ellen breet opp jane Sied, de Breed vom Zelt.

²Un de Breed vonne Däa wia 10 Ellen, un de Sieden vom Engank fief Ellen opp dise un fief Ellen opp jane Sied. Un hee maut siene Lenj: 40 Ellen, un de Breed: 20 Ellen.

³Un hee jinkj no bennen. Un hee maut de Däa Feilasch: Twee Ellen; un de Däa: sas Ellen huach, un de Däa breed: säwen Ellen.

⁴Un hee maut siene Lenj: 20 Ellen, un de Breed: 20 Ellen jäajen däm Tempel han; un hee säd to mie: Dit es daut Aulaheilichste.

⁵Un hee maut de Waunt vom Hus: sas Ellen, un de Breed de Stowen aune Sieden: vea Ellen, runtom daut Hus rom.

⁶Un de Stowen aune Sieden wieren Stow äwa Stow, dree Mol , un zwoa 30; un see jinjen enne Waunt, dee daut Hus runtom fa de Stowen aune Sieden haud; doamet see faust jehoolen worden; doch worden see nich enne Waunt vom Hus faustjehoolen.

⁷Un daut Buwoakj wort breeda en däm Mot, waut de Stowen aune Sieden betroff, nämen no bowen han mea un mea too, soo daut et Hus sikj vejratad no bowen han mea un mea runtom daut Hus, wuaderch de Breed aum Hus no bowen han breeda wort. Un soo stieech daut unjaschte Stockwoakj nom bowaschten nopp, nom Verhältnis toom meddelsten.

⁸Un ekj sach runtom aum Hus eene hejchre Städ: De Stowen aune Sied hauden eene Gruntloag von eenen vollen Motstock, daut es, sas Ellen no de Vebinjunk han.

⁹De Breed vonne Waunt, dee de Stowen no de butaschte Sieden hauden, wia fief Ellen; un uk waut frie jeloten wia, aun Rum aune Sied - vom Tempel.

¹⁰Un tweschen de Komasch wia eene Breed von 20 Ellen, runtom daut Hus rom.

¹¹Un de Däa vonne Stowen aune Sied jinjen nom friejelotnen Rum, eene Däa jäajen Nuaden un eene Däa jäajen Sieden. Un de Breed vom frie jelotnem Rum wia fief Ellen runtom.

¹²Un daut Buwoakj aune väaschte Sied vom aufjesondaden Plauz, aun de jäajen Wasten jedreide Sied, wia 70 Ellen breet, un de Mia vom Buwoakj fief Ellen breet runtom, un siene Lenj 90 Ellen.

¹³Un hee maut daut Tempelhus: De Lenj 100 Ellen; un de aufjesondada Plauz un daut Buwoakj un siene Miaren: De Lenj 100 Ellen;

¹⁴un de Breed vonne väaschte Sied vom Hus un de aufjesondada Plauz jäajen Oosten: 100 Ellen.

¹⁵Un soo maut hee de Lenj aune väaschte Sied vom Plauz aum Buwoakj, daut sikj bat aune hinjaschte Sied hanstrakjt; un siene Galerie opp dise un opp jane Sieden: 100 Ellen; un däm bennaschten Tempel un de Haule vom Väahoff.

¹⁶De Schwalen un de vesprote Fenstren un de Galerie runtom dise 3 Hiesa - dee Schwalen jäajenäwa wia runtom met Holt utjelajcht, un vonne Flua bat aun de Fenstren wieren vedakjt, -

¹⁷de Rum äwa de Däaren un daut gaunze Hus, soo aus von bennen soo uk von buten, un de Rum aun aule Wenj runtom, von bennen un buten: Aules haud siene Mot.

¹⁸Un Cherubim un Paulmen wieren jemoakt, un zwoa eene Paulm tweschen Cherub un Cherub. Un de Cherub haud 2 Aunjesechta:

¹⁹Een Menschenjesecht jäajen de Paulm opp dise, un von eenem Leiwsaunjesecht jäajen de Paulm opp jane Sied; soo wia daut jemoakt aum gaunzen Hus, runtom.

²⁰Vonne Flua bat äwa de Däa wieren de Cherubim un de Paulmen jemoakt, un zwoa aune Waunt vom Tempel.

²¹De Tempel haud 4 Akjje Däapast; un dee oppe väaschte Sied vom Heilichtum haud dee selje Jestault.

²²De Aultoa wia von Holt, 3 Ellen huach, un siene Lenj twee Ellen; un hee haud siene Akjen; un sien Jestall un siene Wenj wieren ut Holt. Un hee säd to mie: Daut es de Desch, dee ver däm Harn steit.

²³Un de Tempel un daut Heilichtum haud 2 Däaren met Flichten.

²⁴Un de Däaflichte hauden 2 Flichtbläda, 2 dreiboare Flichtbläda, 2 aun de eene Däaflicht un 2 Flichtbläda aune aundre.

²⁵Un aun an, aun de Flichtdäare aum Tempel, wieren Cherubim un Paulmen jemoakt, aus see aune Wenj jemoakt wieren. Un een heltanet Väadack wia aun de väaschte Sied de Haul, von buten.

²⁶Un vesprote Fenstren un Paulmen wieren opp dise un opp jane Sied, aun de Wenj aune Sied de Haul un aun de Stowen aune Sied em Hus un de Väadäakja.