Read De Bibel JHF Hesekiel 42 Bible Online

Hesekiel 42 - De Bibel JHF bible

Hesekiel 42

¹Un hee fieed mie rut en däm butaschten Väahoff, däm Wajch jäajen Nuaden. Un hee brocht mie no de Stowen, dee däm aufjesondadem Plauz jäajenäwa un däm Buwoakj nom Nuaden jäajenäwa wieren,

²ver de lange Sied von 100 Ellen, met däm Engank jäajen Nuaden, un de Breed 50 Ellen;

³jäajenäwa däm 20 Ellen vom bennaschten Väahoff un jäajenäwa däm Plosta em butaschten Väahoff, Galerie jäajen Galerie wia em dredden Stockwoakj.

⁴Un ver de Stowen wia een Gank von 10 Ellen breet: Nom bennaschten Väahoff han een Wajch von 100 Ellen. Un äare Däaren wieren jäajen Nuaden jerecht.

⁵Un wiels de Galerie von bennen Rum wajchnäme, wieren de bowaschten Stowen schmaula aus de unjaschte un de meddelste vom Buwoakj.

⁶Dan see wieren 3 stockich, oba de Väahäw hauden kjeene Stendasch; doarom wieren see schmaula oppe Ieed aus de unjaschte un de meddelste.

⁷Un eene Mia von buten, soo aus de Stowen jinjen, nom butaschten Väahoff han, wia aun de väaschte Sied vonne Stowen; äare Lenj wia 50 Ellen.

⁸Dan de Lenj de Stowen em butaschten Väahoff wieren 50 Ellen; un kjikj, ver däm Tempel wia see 100 Ellen.

⁹Un unja dise Stowen wia de Engank vom Oosten häa, wan maun no an jinkj, vom butaschten Väahoff häa.

¹⁰Aun de breed de Mia vom Väahoff jäajen Sieden, ver däm aufjesondadem Plauz un von däm Buwoakj wieren Stowen -

¹¹un een Wajch wia ver an - soo aus de Stowen, dee jäajen Nuaden wieren, soo aus äare Lenj soo uk äare Breed, un no aul äare Utjenj aus no äare Enrechtunk.

¹²Un aus äa Engank, soo wieren uk äare Stowedäare, dee jäajen Sieden wieren: Een Engank aum Aunfank vom Wajch, vom Wajch, dee jäajenäwa de Mia wia jäajen Oosten, wan maun no an kaum.

¹³Un hee säd to mie: De Stowen em Nuaden un de Stowen em Sieden, dee ver däm aufjesondadem Plauz sent, sent de heilje Stowen, woa de Priesta, dee däm Harn noda komen, dee huachheilje Dinj äten sellen. Doahan sellen see de huachheilje Dinj lajen, soo aus daut Speisopfa aus uk daut Sindopfa un daut Schultopfa; dan de Uat es heilich.

¹⁴Wan de Priesta nengonen, soo sellen see nich ut däm Heilichtum en däm butaschten Väahoff rutgonen, sonda sellen doa äare Kjleeda hanlajen, en dee see däm Deenst verechten; dan see sent heilich; see sellen aundre Kjleeda auntrakjen un sellen däm noda komen, waut fa daut Volkj es.

¹⁵Un aus hee met daut mäten vom bennaschten Hus foadich wia, fieed hee mie rut oppem Wajch nom Dooa, daut jäajen Oosten jerecht wia; un hee maut daut runtom.

¹⁶Hee maut de Oostsied met däm Motstock, 500 Stakj lank met däm Motstock runtom.

¹⁷Hee maut de Nuadsied, 500 Stakj met däm Motstock runtom.

¹⁸De Sied vom Sieden maut hee, 500 Stakj met däm Motstock.

¹⁹Hee dreid sikj om no de Wastsied un maut 500 Stakj met däm Motstock.

²⁰Hee maut no de vea Sieden. Daut haud eene Mia runtom: de Lenj wia 500 un de Breed 500, om tweschen däm Heiljen un däm Onheiljen von eenaunda too tranen.