Read De Bibel JHF Hesekiel 43 Bible Online

Hesekiel 43 - De Bibel JHF bible

Hesekiel 43

¹Un hee fieed mie nom Dooa, däm Dooa, daut jäajen Oosten licht.

²Un kjikj, de Harlichkjeit vom Gott Israels kaum vom Oosten häa; un äa Ruzhen wia aus daut Ruzhen von groote Wota, un de Ieed dacht von siene Harlichkjeit.

³Un daut Aunseenen de Erschienung, daut ekj sach, wia aus daut Jesecht, daut ekj jeseenen haud, aus ekj kaum, om de Staut too vedoawen; un daut wia ne Erschienung aus de Erschienung, dee ekj aum Fluss Kebar jeseenen haud. Un ekj foll han opp mien Aunjesecht.

⁴Un de Harlichkjeit Gottes kaum en daut Hus, oppem Wajch vom Dooa, daut jäajen Oosten jerecht wia.

⁵Un de Jeist hoof mie nohecht un brocht mie en däm bennaschten Väahoff; un kjikj, de Harlichkjeit Gottes erfeld daut Hus.

⁶Un ekj hieed eenen, dee ut däm Hus to mie räd; un een Maun stunt bie mie.

⁷Un hee säd to mie: Menschensän, daut es de Uat von mienem Troon un de Uat von miene Footsohle, woa ekj enne Medd de Kjinja Israel eewich wonen woa. Un daut Hus Israel woat mienen heiljen Nomen nich mea veonreinjen, see un äare Kjennichs, derch äare Huararie un derch de Doodeskjarpa äare Kjennichs un äare Hechten:

⁸Endäm see äare Schwalen aun miene Schwalen un äare Däapast bie miene Däapast stalen, daut blooss de Waunt tweschen mie un an wia; un mienen heiljen Nomen veonreinijde derch äare Aufschu, dee see veeewde, soo daut ekj an en mienem Oaja venicht ha.

⁹Nu woaren see nich mea äare Huararie un Doodeskjarpa äare Kjennichs von mie wajch doonen, un ekj woa en äare Medd eewich wonen.

¹⁰Du, Menschensän, berecht däm Hus Israel äwa dit Hus, doamet see sikj äare Misdoten schämen un däm Buplon mäten.

¹¹Un wan see sikj äwa aul dit schämen, waut see jedonen ha, soo wies an de Form vom Hus un siene Enrechtunk, un siene Utjenj un sien Engank, un aul siene Forme un aul siene Sazungen, un aul siene Forme un Jesazen; un schriew daut ver äare Uagen opp, doamet see siene gaunze Form un aul siene Sazungen behoolen un doonen.

¹²Dit es daut Husjesaz: Oppe Boajchspetz saul siene gaunze Jäajent runtom huachheilich sennen; kjikj, daut es daut Jesaz vom Hus.

¹³Un dit es daut Mot vom Aultoa no Ellen, de Elle eene Elle un eene Hauntbreet: een Grunt (Gruntloag), eene Elle huach un eene Elle breet; un siene Leest aun sienem Raunt runtom: Een Spaun; un daut es de Sockel vom Aultoa.

¹⁴Un dit es de Hecht vom Aultoa: Vom Gruntsteen oppe Ieed bat toom unjaschten Spaun: twee Ellen nohecht un eene Elle Väaspaun; un von de kjlandre Spaun bat de jratren Spaun: vea Ellen huach un eene Elle breet.

¹⁵Un de Gottesboajch [Har-El]: vea Ellen huach; un vom Gotteshiet [Ari-El] nohecht vea Hieena.

¹⁶Un de Gotteshiet: 12 Ellen lank bie 12 Ellen breet, veakauntich, aun siene vea Sieden.

¹⁷Un de unjaschta Aufsauts: 14 Ellen lank bie 14 Ellen breet, aun äare vea Sieden; un de Raunt runtom daut selje: Eene haulwe Elle, un äa Gruntsteen eene Elle runtom. Un siene Stoopen wieren jäajen Oosten jerecht.

¹⁸Un hee säd to mie: Menschensän, soo sajcht de Har, Gott: Dit sent de Sazungen vom Aultoa, aun däm Dach, doa hee jemoakt woat, om Brauntopfa doa bowen too opfren un Bloot doanopp too sprenje.

¹⁹Un du saust de Priesta, de Leviten, dee vom Zadok sienen Somen sent, dee no mie noda komen, sajcht de Har, Gott, om mie to deenen, eenen jungen Oss toom Sindopfa jäwen.

²⁰Un du saust von sienem Bloot nämen un daut aun siene vea Hieena doonen un aun de vea Akjen vom Aufsauts un aun däm Raunt runtom; un soo saust du am entsindje un Veseenunk fa am doonen.

²¹Un du saust däm Sindopfa Oss nämen, un maun saul am aum bestemden Uat aum Hus, butrem Heilichtum, vebrennen.

²²Un aum tweeden Dach saust du eenen Kosenbock, onen Fäla, toom Sindopfa opfren; un maun saul däm Aultoa entsindje, soo aus maun am met däm Oss entsindicht haft.

²³Wan du daut Entsindje vollbrocht hast, saust du eenen jungen Oss onen Fäla un eenen Bock onen Fäla vom Kjlienvee opfren:

²⁴Du saust an ver däm Harn opfren, un de Priesta sellen Solt opp an streie un an däm Harn aus Brauntopfa opfren.

²⁵Säwen Doag saust du jieda Dach eenen Bock aus Sindopfa opfren; un eenen jungen Oss un eenen Kosenbock vom Kjlienvee, onen Fäla, saul maun opfren.

²⁶Säwen Doag saul maun Veseenunk doonen fa däm Aultoa un am reinjen un am enweie.

²⁷Un wan de Doag too enj sent, soo saul daut aum achten Dach un wiedahan passieren, daut de Priesta june Brauntopfa un june Frädensopfa opp däm Aultoa opfren; un ekj woa junt wooljefaulich aunnämen, sajcht de Har, Gott.