Read De Bibel JHF Hesekiel 44 Bible Online

Hesekiel 44 - De Bibel JHF bible

Hesekiel 44

¹Un hee fieed mie trigj oppem Wajch nom butaschten Dooa vom Heilichtum, daut jäajen Oosten kjikjt; un daut wia veschloten.

²Un de Har räd to mie: Dit Dooa saul veschloten sennen; daut saul nich opjemoakt woaren, un kjeena saul doaderch nengonen; wiels de Har, de Gott Israels, es doaderch nenn jegonen, soo saul daut veschloten sennen.

³Waut de Ferschten betraft, hee, de Ferscht, saul doa setten, om ver däm Harn to äten; opp däm Wajch de Dooahaul saul hee nengonen, un opp däm seljen Wajch saul hee rutgonen.

⁴Un hee brocht mie oppem Wajch nom Nuaddooa ver daut Hus; un ekj sach: Un kjikj, de Harlichkjeit Gottes erfeld daut Hus Gottes; un ekj foll dol opp mien Aunjesecht.

⁵Un de Har säd to mie: Menschensän, recht dien Hoat doaropp, un kjikj met diene Uagen un hia met diene Uaren aules, waut ekj met die räd betrafs aule Sazungen em Hus Gottes un betrafs aul siene Jesazen; un recht dien Hoat opp däm Engank vom Hus met aule Utjenj vom Heilichtum.

⁶Un saj to de Wadaspanstje, toom Hus Israel: Soo sajcht de Har, Gott: Lot daut jenuach sennen aun aul june Aufschu, Hus Israel!

⁷Endäm, jie Säns de Framde, onbeschnäden aum Hoat un onbeschnäden aum Fleesch, enennfieeden, om en mienem Heilichtum to sennen, mien Hus too entheiljen, wan jie miene Speise, Fat un Bloot, doa brochten, soo daut see mienen Bunt bruaken too aul äare Aufschu doatoo.

⁸Un jie ha de Vewaultunk miene Heilichtums nich jedonen, sonda ha de Framde fa junt em Deenst en mienem Heilichtum jesat.

⁹Soo sajcht de Har, Gott: Kjeen Sän de Framde, onbeschnäden aum Hoat un onbeschnäden aum Fleesch, von aule Säns de Framde, dee enne Medd de Kjinja Israel sent, sellen en mien Heilichtum komen.

¹⁰Woarhauft, de Leviten, dee von mie aufjegonen sent, bie de Vebiestrung Israels, dee von mie aufjegonen es, siene Jetzen no, see sellen äare Misdot droagen;

¹¹oba see sellen en mienem Heilichtum Deena sennen, aus Wajchta aune Dooasch vom Hus un aus Deena em Hus; see sellen daut Brauntopfa un daut Schlachtopfa fa daut Volkj schlachten, un see sellen ver an stonen, om an to deenen.

¹²Wiels see an ver äare Jetzen jedeent ha un däm Hus Israel een Aunstoos toom veschuldje jewast sent, doarom ha ekj miene Haunt jäajen an erhowen, sajcht de Har, Gott, daut see äare Misdoten droagen sellen.

¹³Un see sellen mie nich noda komen, om mie däm Priesta Deenst uttoeewen, un om aul miene heilje Dinj, de Huachheilje, noda to komen; sonda see sellen äare Schmach un äa Aufschu droagen, dee see veeewt ha.

¹⁴Un ekj woa an too Wajchta em Hus moaken, fa aul sien Deenst un fa aules, waut doabennen to doonen jeft.

¹⁵Oba de Priesta, de Leviten, de Säns Zadok, dee däm Deenst en mienem Heilichtum jehoolen ha, aus de Kjinja Israel von mie auferrde, see sellen no mie noda komen, om mie to deenen, un sellen ver mie stonen, om mie daut Fat un daut Bloot too opfren, sajcht de Har, Gott.

¹⁶See sellen en mien Heilichtum komen, un see sellen no mienem Desch noda komen, om mie to deenen, un sellen mien Deenst woanämen.

¹⁷Un daut saul passieren, wan see toom bennaschten Väahoffdooa nenn gonen, sellen see leiwentne Kjleeda auntrakjen; oba Woll saul nich opp an komen, wan see en de Dooasch vom bennaschten Väahoff un jäajen daut Hus han em Deenst sent.

¹⁸Leiwentne Koppbenj sellen opp äarem Haupt sennen, un leiwentne Beenkjleeda aun äare Hoften; see sellen sikj nich schweetje Kjleeda ombinjen.

¹⁹Un wan see en däm butaschten Väahoff rutgonen, en däm butaschten Väahoff nom Volkj, soo sellen see äare Kjleeda, en dee see jedeent ha, uttrakjen un en de heilje Stow hanlajen, un sellen aundre Kjleeda auntrakjen, doamet see nich daut Volkj met äare Kjleeda heilje.

²⁰Un see sellen nich äa Haupt kol schäaren, noch daut Hoa frie waussen loten; see sellen äa Hoa oppem Haupt schnieden.

²¹Un kjeen Priesta saul Wien drinkjen, wan see en däm bennaschten Väahoff gonen.

²²Un eene Wätfru un eene Vestade sellen see sikj nich too Frues nämen; sonda Junkfrues vom Somen ut däm Hus Israel un de Wätfru, dee von eenem Priesta Wätfru jeworden es, derwen see nämen.

²³Un see sellen mienem Volkj dän Unjascheet lieren tweschen Heiljem un Onheiljem, un sellen an däm Unjascheet toweeten loten tweschen Rein un Onrein.

²⁴Un äwa Strietfroagen sellen see toom Jerecht gonen, no miene Rajchte sellen see rechten; un see sellen miene Jesazen un miene Sazungen bie aul miene Faste beoobachten un miene Sabaten heilje.

²⁵Un kjeena saul nom Doodjen Mensch gonen, daut hee onrein woat; blooss auleen wäajen Voda un Mutta, un wäajen Sän un Dochta, wäajen eenen Brooda un wäajen eene Sesta, dee kjeenem Maun siene jewast es, derwen see sikj veonreinjen.

²⁶Un no siene Reinjunk saul maun säwen Doag talen;

²⁷un aun däm Dach, doa hee en daut Heilichtum, en däm bennaschten Väahoff, nennjeit, om em Heilichtum to deenen, saul hee sien Sindopfa opfren, sajcht de Har, Gott.

²⁸Un dit saul äa Oawgoot sennen: Ekj sie äa Oawgoot; un jie sellen an kjeen Ieejentum en Israel jäwen: Ekj sie äa Ieejentum.

²⁹Daut Speisopfa un daut Sindopfa un daut Schultopfa, dee sellen see äten; un aulet Vebaunte (Jeweide) en Israel saul an jehieren.

³⁰Un daut Ieeschte von aulem Ieeschten, un aule Häwopfa von aulem, von aul äare Häwopfa saul däm Priesta jehieren; un daut Ieeschte von junem Schrootmäl sell jie däm Priesta jäwen, doamet Säajen opp dienem Hus rut.

³¹Kjeen Oss noch Verätnet von Väajel un vom Vee sellen de Priesta äten.