Read De Bibel JHF Hesekiel 46 Bible Online

Hesekiel 46 - De Bibel JHF bible

Hesekiel 46

¹Soo sajcht de Har, Gott: Daut Dooa vom bennaschten Väahoff, daut jäajen Oosten kjikjt, saul de sas Oabeitsdoag jeschloten sennen; oba aum Sabatdach saul daut opjemoakt woaren, un aum Dach de Niemon saul daut opjemoakt woaren.

²Un de Ferscht saul derch de Dooahaul nengonen von buten häa un sikj aun de Däapast stalen; un de Priesta sellen sien Brauntopfa un siene Frädensopfa opfren, un hee saul oppe Dooaschwal aunbäden un rutgonen; oba daut Dooa saul bat Oppenowent nich jeschloten woaren.

³Un daut Laundesvolkj saul aum Engank von disem Dooa aunbäden, aun de Sabaten un aun de Niemonen, ver däm Harn.

⁴Un daut Brauntopfa, daut de Ferscht däm Harn aum Sabatdach brinjen saul: sas Lama onen Fäla un eenen Bock onen Fäla.

⁵Un aus Speisopfa: Een Efa fienet Mäl too jiedrem Bock; un to de Lama aus Speisopfa: Eene Gow ut siene Haunt; un Eelj, een Hin too jiedrem Efa.

⁶Un aum Dach de Niemon: Een junga Boll onen Fäla un sas Lama un een Bock onen Fäla sellen see sennen.

⁷Un een Efa too jiedrem jungen Boll un een Efa too jiedrem Bock saul hee aus Speisopfa opfren; un to de Lama, nodäm waut siene Haunt oppbrinjen kaun; un Eelj, een Hin too jiedrem Efa.

⁸Un wan de Ferscht nennjeit, saul hee derch de Dooahaul nengonen; un derch dee saul hee rutgonen.

⁹Un wan daut Laundesvolkj aun de Faste ver däm Harn kjemt: Wäa derch daut Nuaddooa nennjeit, om auntobäden, saul derch daut Sieddooa rutgonen; un wäa derch daut Sieddooa nennjeit, saul derch daut Nuaddooa rutgonen; hee saul nich derch daut Dooa trigjgonen, derch daut hee nennjegonen es, sonda jlikj ver sikj rutgonen.

¹⁰Un de Ferscht saul medden unja an nengonen, wan see nengonen; un wan see rutgonen, sellen see toop rutgonen.

¹¹Un aun de Faste un to de Fasttieden saul daut Speisopfa sennen: Een Efa fienet Mäl too jiedrem jungen Boll un een Efa too jiedrem Bock; un to de Lama eene Gow ut siene Haunt; un Eelj, een Hin too jiedrem Efa.

¹²Un wan de Ferscht een frieweljet Brauntopfa ooda frieweljet Frädensopfa däm Harn opfren well, soo saul maun am daut Dooa opmoaken, daut jäajen Oosten kjikjt; un hee saul sien Brauntopfa un siene Frädensopfa opfren, soo aus hee aum Sabatdach deit; un wan hee rutjeit, soo saul maun daut Dooa veschluten, nodäm hee rutjegonen es.

¹³Un du saust jieda Dach een eenjoaschet Laum onen Fäla däm Harn aus Brauntopfa opfren, Morjen fa Morjen saust du daut opfren.

¹⁴Un een Speisopfa saust du doatoo opfren, Morjen fa Morjen: Een 6-tet Deel vom Efa; un Eelj, een dreddel Hin, om daut fiene Mäl too besprenjen, aus Speisopfa - däm Harn: Eewje Sazungen, dee emma sennen sellen.

¹⁵Un maun saul daut Laum un daut Speisopfa un daut Eelj, Morjen fa Morjen, aus een bestendjet Brauntopfa opfren.

¹⁶Soo sajcht de Har, Gott: Wan de Ferscht eenem siene Säns een Jeschenkj jeft, soo es daut sien Oawgoot; daut saul siene Säns jehieren, daut es äa Ieejentum.

¹⁷Oba wan hee eenem siene Kjnajchts een Jeschenkj von sienem Oawgoot jeft, soo saul daut däm seljen bat to sienem frieen Joa jehieren, un dan wada aun däm Ferscht trigjkomen; daut es doch sien Oawgoot: Siene Säns saul daut jehieren.

¹⁸Un de Ferscht saul nuscht von däm Volkjs-Oawgoot nämen, soo daut an ut äarem Ieejentum vedrenjt; von sienem Ieejentum saul hee siene Säns veoawen, om daut mien Volkj nich vestreit woat, een jiedra ut sienem Ieejentum.

¹⁹Un hee brocht mie derch däm Engank, dee aune Sied vom Dooa wia, no de heilje Stowen fa de Priesta, dee jäajen Nuaden ligjen; un kjikj, doa wia een Uat aune butaschte Sied jäajen Wasten.

²⁰Un hee säd to mie: Dit es de Uat, woa de Priesta daut Schultopfa un daut Sindopfa koaken, woa see daut Speisopfa baken sellen, doamet see daut nich en däm butaschten Väahoff rutdroagen, daut Volkj too heilje.

²¹Un hee fieed mie rut en däm butaschten Väahoff un leet mie aun de vea Akjen vom Väahoff vebiegonen; un kjikj, en jiedre Akj vom Väahoff wia een Hoff.

²²Un de vea Akjen vom Väahoff wieren aufjeschlotne Häw, 40 Ellen lank un 30 breet; aule vea Akjhäw hauden daut jlikje Mot.

²³Un en dee selje wia runtom eene Mia bie aule 4; un Koakhieed wieren unja de Mia runtom aunjebrocht.

²⁴Un hee säd to mie: Dit sent de Koakhiesa, woa de Deena vom Hus daut Schlachtopfa fa daut Volkj koaken sellen.