Read De Bibel JHF Hesekiel 47 Bible Online

Hesekiel 47 - De Bibel JHF bible

Hesekiel 47

¹Un hee fieed mie trigj no de Husdäa; un kjikj, Wota rand unjre Husschwal väa jäajen Oosten, dan de väaschte Sied vom Hus wia jäajen Oosten; un daut Wota rand von unjen rauf, vonne rajchte Hussied häa, siedlich vom Aultoa.

²Un hee fieed mie rut derch daut Nuaddooa, un fieed mie buten nom butaschten Dooa rom, oppem Wajch jäajen däm Oosten jerechtem Dooa; un kjikj, Wota rand vonne rajchte Dooasied väa.

³Un aus de Maun jäajen Oosten rutjinkj, wia eene Motschnua en siene Haunt. Un hee maut 1000 Ellen, un leet mie derch daut Wota gonen - Wota bat aune Kjnechel;

⁴un hee maut 1000 Ellen, un leet mie derch daut Wota gonen - Wota bat aune Kjnee; un hee maut 1000 Ellen, un leet mie derch gonen - Wota bat aune Hoften;

⁵un hee maut 1000 Ellen - een Fluss, derch däm ekj nich gonen kunn; dan daut Wota wia huach, Wota toom schwamen, een Fluss, dee nich toom derch gonen wia.

⁶Un hee säd to mie: Hast du daut jeseenen, Menschensän? Un hee fieed mie wada trigj aun däm Flusseewa.

⁷Aus ekj trigj kjeem, kjikj, doa stunden aum Flusseewa sea väl Beem opp dise un opp jane Sied.

⁸Un hee säd to mie: Dit Wota rant rut nom oostlichen Kjreiss, un rant en de Läacht rauf un kjemt en daut Mäa; un woaren en daut Mäa jefieet, soo woat daut Wota em Mäa jesunt woaren.

⁹Un daut woat passieren, daut aule läwendje Seelen, dee doa wimlen, äwaaul wuahan de dobbelda Fluss kjemt, läwen woaren. Un daut woaren väl Fesch sennen; dan wan dit Wota doahan kjemt, soo woat daut Mäawota jesunt woaren, un aules woat läwen, wuahan de Fluss kjemt.

¹⁰Un daut woat passieren, daut doa Fescha stonen woaren: Von En-Gedi bat En-Eglaim woat Plauz toom Natse utbreeden sennen. No äare Oat woaren de Fesch sennen, sea väl, aus de Fesch em groote Mäa.

¹¹Sien Somp un siene Lajcha woaren nich jesunt woaren, see woaren soltich bliewen.

¹²Un aun däm Fluss, aun sienem Eewa, opp dise un opp jane Sied, woaren aulalei Beem waussen, von de maun at, dee äare Bläda nich vewalkje un äare Frucht nich utgonen woat. Moonat fa Moonat woaren see riepe Frucht droagen, dan sien Wota rant ut däm Heilichtum väa; un äare Frucht woat too Speise deenen un äare Bläda aus Heelmeddel.

¹³Soo sajcht de Har, Gott: Dit es de Jrens, no dee jie junt daut Launt aus Oawgoot vedeelen sellen no de 12 Stam Israels; fa Josef 2 Deel.

¹⁴Un jie sellen daut oawen, de eene aus de aundra, daut Launt, om june Vodasch daut to jäwen, miene Haunt ha ekj oppjehowen; un dit Launt saul junt aus Oawgoot toofaule.

¹⁵Un dit es de Launtjrens: Oppe Nuadsied, vom groote Mäa aun, oppem Wajch no Hetlon, jäajen Zedad han;

¹⁶Hamat, Berota, Sibrajim, daut tweschen de Jrensen von Damaskus un de Jrens von Hamat licht, daut meddlere Hazer, daut aun de Jrens von Hauran licht.

¹⁷Un de Jrens vom Mäa häa saul Hazar-Enon sennen, de Jrens von Damaskus; un däm Nuaden betrafs nuadlich, soo es Hamat de Jrens. Un daut es de Nuadsied.

¹⁸Un waut de Oostsied betraft, soo es tweschen Hauran un Damaskus un Gilead un däm Launt Israel de Jordan; vonne Nuadjrens nom oostlichen Mäa han sell jie mäten. Un daut es de Oostsied.

¹⁹Un de Meddachsied siedlich: Von Tamar bat nom Jezankwota Kades, un nom Ägipten Bach han bat aun daut groote Mäa. Un daut es de Meddachsied nom Sieden.

²⁰Un de Wastsied: daut groote Mäa, vonne Siedjrens, bat maun Hamat jäajenäwa kjemt; daut es de Wastsied.

²¹Un dit Launt sell jie unja junt vedeelen no de Stam Israels.

²²Un daut saul passieren: Junt un de Framde, dee en june Medd sent, dee en june Medd Kjinja jekjräajen ha, sell jie daut aus Oawgoot velossen; un see sellen junt aus de Eenjebuarne unja de Kjinja Israel sennen; met junt sellen see om een Oawgoot lossen enne Medd de Stam Israels.

²³Un daut saul passieren, en däm Staum, bie däm de Framda es, doa sell jie am sien Oawgoot jäwen, sajcht de Har, Gott.