Read De Bibel JHF Hesekiel 5 Bible Online

Hesekiel 5 - De Bibel JHF bible

Hesekiel 5

¹Un du, Menschensän, nemm die een schoapet Schwieet: Aus Schäamassa saust du die daut nämen un doamet äwa dien Haupt un äwa dienen Boat foaren; un nemm die Wäajerieschiewe un deel de Hoa.

²Een dreddel saust du met Fia vebrennen enne Medd de Staut, wan de Beloagrungs Doag voll sent; un een dreddel saust du nämen, un runtom an häa met daut Schwieet schlonen; un een dreddel saust du em Wint streie, dan ekj woa daut Schwieet hinja an häa trakjen.

³Un du saust doavon eene kjliene Zol nämen un en diene Rockakj binjen.

⁴Un von dise saust du nochmol nämen un dee medden em Fia schmieten un an met Fia vebrennen; doavon woat een Fia jäajen daut gaunze Hus Israel utgonen.

⁵Soo sajcht de Har, Gott: Dit Jerusalem, enne Medd de Nazionen ha ekj daut jesat, un Lenda runtom ar häa.

⁶Un daut wia wadaspanstich jäajen miene Rajchte en Gottloosichkjeit, mea aus de Nazionen, un jäajen miene Sazungen, mea aus de Lenda, dee runtom ar häa sent; dan miene Rajchte ha see veschmäten, un en miene Sazungen ha see nich jewaundelt.

⁷Doarom sajcht de Har, Gott, aulsoo: Wiels jie jetoobt ha, mea aus de Nazionen, dee runtom junt häa sent, en miene Sazungen nich jewaundelt un miene Rajchte nich jedonen ha, jo, selfst no de Rajchte de Nazionen, dee runtom junt häa sent, nich jedonen ha,

⁸doarom sajcht de Har, Gott, aulsoo: Kjikj, uk ekj well jäajen die sennen, un well Jerecht en diene Medd eewen ver de Uagen de Nazionen.

⁹Un ekj well aun die doonen, waut ekj nich jedonen ha un ekj wiedahan nich wada doonen woa, om aul dienen Aufschu wellen.

¹⁰Doarom woaren Vodasch äare Kjinja äten en diene Medd, un Kjinja woaren äare Vodasch äten; un ekj well Jerecht aun die eewen, un well diene gaunze Äwajebläwne en aule vea Wind vestreien.

¹¹Doarom, soo woa ekj läw, sajcht de Har, Gott: Woarhauft, wiels du mien Heilichtum veonreinicht hast derch aul diene schlajchte Doten un derch aul dien Aufschu, soo well uk ekj miene Uagen aufdreien onen Metleet, un uk ekj well mie nich erboarmen.

¹²Een dreddel von die saul aun de Past stoawen un derch Hunga en diene Medd omkomen; un een dreddel saul derch daut Schwieet runtom die häa faulen; un een dreddel woa ekj en aule vea Wind vestreien, un ekj woa daut Schwieet hinja an häa trakjen.

¹³Un mien Oaja saul sikj vollbrinjen, un mien Jrim woa ekj aun an vollbrinjen un Rach nämen. Un wan ekj mien Jrim aun an vollbrinj, soo woaren see weeten, daut ekj, de Har, en mienem Iewa jerät ha.

¹⁴Un ekj woa die to eene Wieste moaken un toom Spiet unja de Nazionen, dee runtom die häa sent, ver de Uagen jiedrem Vebiegonenden.

¹⁵Un daut saul een Spiet un een Spott sennen, eene Woahrnung un een Entsaten fa de Nazionen, dee runtom die häa sent, wan ekj Jerecht aun die eewen woa em Oaja un em Jrim un en Zichtjung vom Jrim. Ekj, de Har, ha jerät.

¹⁶Wan ekj de beese Hungafeilasch jäajen an schekj, dee toom vedoawen sennen woaren, dee ekj schekjen woa, om junt too vedoawen, soo woa ekj däm Hunga äwa junt brinjen un junt dee Brootstett vebräakjen.

¹⁷Un ekj woa Hunga äwa junt schekjen un beese Tieren, daut see die de Kjinja beroowen; un Past un Bloot sellen äwa die trakjen, un daut Schwieet woa ekj äwa die brinjen. Ekj, de Har, ha jerät.