Read De Bibel JHF Hesekiel 6 Bible Online

Hesekiel 6 - De Bibel JHF bible

Hesekiel 6

¹Un daut Wuat Gottes wia to mie aulsoo:

²Menschensän, recht dien Aunjesecht jäajen de Boaj Israels, un profezei äwa an,

³un saj: Boaj Israels, hieet daut Wuat vom Harn, Gottes! Soo sajcht de Har, Gott, to de Boaj, un to de Aunboajch, to de Läachten un to däm Grunt: Kjikj, ekj, ekj brinj daut Schwieet äwa junt un woa june Hechten vedoawen;

⁴un june Aultoaren sellen vewust un june Sonnenstendasch vebroaken woaren. Un ekj woa june Jeschloagne ver june Jetzen wajchschmieten;

⁵un de Doodeskjarpa de Kjinja Israel woa ekj ver äare Jetzen hanlajen un june Knoakes runtom june Aultoaren streie.

⁶En aule june Wonstäden sellen de Städa ladich un de Hechten vewust woaren, om daut june Aultoaren ladich un wiest, un june Jetta vebroaken un venicht, un june Sonnenstendasch omjehakt un june jemoakte Woakjen vetilcht woaren;

⁷un Jeschloagne sellen en june Medd faulen. Un jie woaren weeten, daut ekj de Har sie.

⁸Doch ekj well Eenje äwa loten, endäm jie unja de Nazionen soone haben woaren, dee daut Schwieet entkomen sent, wan jie en de Lenda vestreit sent.

⁹Un june Wajchjeranden woaren unja de Nazionen aun mie denkjen, wuahan see jefangen wajchjefieet sent, wan ekj mie äa huararischet Hoat, daut von mie aufjegonen es, un äare Uagen, dee äare Jetzen nohuaden, veschloagen haben woa; un see woaren aun sikj selfst Äakjel ha wäajen de Iebeldot, dee see no aule äare Aufschu begonen ha.

¹⁰Un see woaren weeten, daut ekj de Har sie. Nich emsonst ha ekj jerät, daut ekj an dit Iebel doonen wudd.

¹¹Soo sajcht de Har, Gott: Schloh en diene Henj un staump met diene Feet un saj: Wee äwa aule beese Aufschu vom Hus Israel! Dan see motten derch daut Schwieet faulen, derch Hunga un derch de Past!

¹²Wäa wiet auf es, woat aun de Past stoawen, un wäa dichtbie es, woat derch daut Schwieet faulen, un wäa äwajebläwen un bewoat worden es, woat fa Hunga stoawen; un ekj woa mien Jrim aun an vollbrinjen.

¹³Un jie woaren weeten, daut ekj de Har sie, wan äare Jeschloagne medden unja äare Jetzen sennen woaren, om äare Aultoaren häa, opp jiedrem Huagen Aunboaj, opp aule Spetzen de Boaj un unja jiedrem jreenen Boom un unja jiedre dichte Ieekj, aun däm Uat, woa see aule äare Jetzen leeftoljen Jeroch jebrocht ha.

¹⁴Un ekj woa miene Haunt jäajen an utstrakjen un daut Launt too eene Wieste un vewustung moaken, mea aus de Wieste Diblat, en aul äare Wonstäden. Un see woaren weeten, daut ekj de Har sie.