Read De Bibel JHF Hesekiel 8 Bible Online

Hesekiel 8 - De Bibel JHF bible

Hesekiel 8

¹Un daut wia aum sasten Joa, em sasten Moonat, däm feften em Moonat: Ekj saut en mienem Hus, un de Eltestasch von Juda sauten ver mie, — doa foll selfst de Haunt vom Harn, Gottes, opp mie.

²Un ekj sach: Un kjikj, eene Jestault aus daut utseenen von Fia: Von äare Lenden ne unjen wia daut utseenen aus een Lichtglauns, aus de Aunblekj von jlenzenden Metol.

³Un hee strakjt, aus een Bilt, eene Haunt ut un naum mie aune Hoa opp mienem Haupt; un de Jeist hoof mie tweschen Ieed un Himmel nohecht un brocht mie em Jesecht Gottes no Jerusalem, aun däm Engank vom Dooa nom bennaschten Väahoff, dee jäajen Nuaden kjikjt, woa de Städ vom Bilt de Aufgonst wia, daut toom Iewa reizt.

⁴Un kjikj, doa selfst wia de Harlichkjeit Gottes Israels, aus daut Jesecht, daut ekj em Tol jeseenen haud.

⁵Un hee säd to mie: Menschensän, häw diene Uagen nom Nuaden opp! Un ekj hoof miene Uagen jäajen Nuaden han opp, un kjikj, nom Nuaden vom Aultoa Dooa wia dit Bilt de Aufgonst, em Engank.

⁶Un hee säd to mie: Menschensän, sitst du, waut see doonen, de groote Aufschu, dee daut Hus Israel hia veeewt, doamet ekj mie von mienem Heilichtum trigjtrakj? Un du saust noch wieda han groote Aufschu seenen.

⁷Un hee brocht mie aun däm Engank vom Väahoff; un ekj sach: Un kjikj, een Loch wia en de Mia.

⁸Un hee säd to mie: Menschensän, derchbrakj doch de Mia. Un ekj derchbruak de Mia; un kjikj, doa wia eene Däa.

⁹Un hee säd to mie: Go nenn un see de beese Aufschu, dee see hia veeewen.

¹⁰Un ekj jinkj nenn un sach: Un kjikj, doa wia aulalei Aufbilda von oppscheisliche Warm un Vee, un aulalei Jetzen vom Hus Israel, runtom aun de Waunt ennjehackt.

¹¹Un 70 Mana von de Eltestasch utem Hus Israel, un Jaasanja, de Sän Schafan, stunt en äare Medd, stunden doaväa, jiedra met sienem Rieekjajefäss en siene Haunt; un de Duft, eene Ruakwolkj jinkj nohecht.

¹²Un hee säd to mie: hast du jeseenen, Menschensän, waut de Eltestasch vom Hus Israel em Diestren doonen, een jiedra en siene Biltkoma? Dan see sajen: De Har sitt ons nich, de Har haft daut Launt veloten!

¹³Un hee säd to mie: Du saust nich mea groote Aufschu seenen, dee see veeewen.

¹⁴Un hee brocht mie aun däm Engank nom Dooa von Hus Gottes, daut jäajen Nuaden es; un kjikj, doa sauten de Frues, dee äwa däm Tammuz hielden.

¹⁵Un hee säd to mie: Hast du jeseenen, Menschensän? Du saust wiedahan noch jratren Aufschu aus dise seenen.

¹⁶Un hee brocht mie en däm bennaschten Väahoff vom Hus Gottes; un kjikj, aum Engank vom Tempel Gottes, tweschen de Haul un däm Aultoa, wieren 25 Mana, äare Rigjes jäajen däm Tempel Gottes un äare Aunjesechta jäajen Oosten jerecht; un see bekjten sikj jäajen Oosten han ver de Sonn.

¹⁷Un hee säd to mie: Hast du jeseenen, Menschensän? Es daut däm Hus Juda too jerinj, de Aufschu too veeewen, dee see hia veeewen, daut see uk daut Launt met Jewault fellen un mie emma wada reizen? Dan kjikj, see hoolen de Asta aun äare Näs.

¹⁸Soo well uk ekj em Jrim haundlen, mien Uag saul nich schoonen, un ekj woa mie nich erboarmen; un wan see uk met ne lude Stemm ver miene Uaren roopen, soo woa ekj an doch nich hieren.