Read De Bibel JHF Hesekiel 9 Bible Online

Hesekiel 9 - De Bibel JHF bible

Hesekiel 9

¹Un hee roopt ver miene Uaren met ne lude Stemm un säd: Komt noda, jie Oppsechta de Staut, een jiedra met sienem Jereetschoft toom Venichten en siene Haunt!

²Un kjikj, 6 Mana kaumen oppem Wajch vom bowaschten Dooa, daut jäajen Nuaden steit, een jiedra met sienem Jereetschoft toom veschlonen en siene Haunt; un een Maun wia en äare Medd, en Leiwent jekjleet, met eenen Schriewjriffel aun siene Sied; un see kaumen un stalden sikj aun däm koppanen Aultoa.

³Un de Harlichkjeit Gottes Israels erhoow sikj von däm Cherub, äwa däm see wia, no de Schwal aum Hus han. Un hee roopt däm em Leiwent jekjleedem Maun, dee däm Schriewjriffel aun siene Sied haud,

⁴un de Har säd to am: Go medden derch de Staut, medden derch Jerusalem, un moak een Tieekjen aun däm Stiern de Lied, dee doa seften un jaumre äwa aul de Aufschu, dee en äare Medd passieren.

⁵Un too jane säd hee ver miene Uaren: Got hinja am häa derch de Staut un schlot; jun Uag saul nich schoonen, un junt nich erboarmen.

⁶Brinjt om toom Vetiljen Jreisen, Jinjlinje un Junkfrues un Kjinja un Frues! Oba got aun kjeenem noda, aun däm daut Tieekjen es; un bie mienem Heilichtum sell jie aunfangen. Un see fungen bie de oole Mana aun, dee ver däm Hus wieren.

⁷Un hee säd to an: Veonreinicht daut Hus un felt de Väahäw met Jeschloagne; got rut! Un see jinjen rut un schluagen enne Staut.

⁸Un daut passieed, aus see schluagen, un ekj auleen äwa bleef, doa foll ekj dol opp mien Aunjesecht un schrieech un säd: Ach, Har, Gott! West du de gaunze Äwajebläwne Israels vedoawen, endäm du dienen Jrim äwa Jerusalem utjitst?

⁹Un hee säd to mie: De Schult vom Hus Israel un Juda es äwa de Mot groot, un daut Launt es met Jewault erfelt, un de Staut es voll Orrajcht; dan see sajen: De Har haft daut Launt veloten, un de Har sitt ons nich!

¹⁰Soo uk ekj, — mien Uag saul nich schoonen, un ekj woa mie nich erboarmen; äarem Wajch well ekj opp äarem Kopp brinjen.

¹¹Un kjikj, dee en Leiwent jekjleeda Maun, dee däm Schriewjriffel aun siene Sied haud, brocht de Auntwuat un säd: Ekj ha jedonen, waut du mie befoolen hast.