Read De Bibel JHF Daniel 11 Bible Online

Daniel 11 - De Bibel JHF bible

Daniel 11

¹Un uk ekj stunt aum ieeschten Joa Darius, däm Meeda, am bie - aus Helpa un Schutz.

²Un nu well ekj die de Woarheit toweeten loten: Kjikj, daut woaren noch 3 Kjennichs en Persien oppstonen, un de vieeda woat jratret Rikjtum erlangen aus aule; un wan hee derch sien Rikjtum stoakj jeworden es, woat hee aules jäajen daut Kjennichrikj Griechenlaunt oppräaje.

³Un een jewaultja Kjennich woat oppstonen, un hee woat met groote Macht harschen un no sienem Gootdenkjen haundlen.

⁴Un sooboolt hee oppjestonen es, woat sien Rikj uteneen bräakjen un no de 4 Himmelswinde han vedeelt woaren. Oba nich fa siene Nokomen woat daut sennen un nich no de Macht, met dee hee jeharscht haud; dan sien Rikj woat utjerot un aundre toom deel woaren, buta von jane.

⁵Un de Kjennich vom Sieden, un zwoa eena von siene Bowaschten, woat stoakj woaren. Un eena woat stoakja woaren aus hee un woat harschen: Siene Harschoft woat eene groote Harschoft sennen.

⁶Un nom vegonen von Joaren woaren see sikj vebinjen; un de Dochta vom Kjennich vom Sieden woat nom Kjennich vom Nuaden komen, om eenen Utjlikj too bewirkjen. Oba see woat de Oarmkrauft nich behoolen, un hee woat nich bestonen noch sien Oarm; un see woat doahan jejäft woaren, see un dee ar en jefieet ha, un dee ar jebuaren, un dee ar en jane Tieden unjastett ha.

⁷Doch eena von de Auflaja von äare Wartel woat aun siene Städ oppstonen; un hee woat jäajen de Häamacht komen, un woat enne Kjennichsfastinj vom Nuaden nenn drinjen un met an nom Gootdenkjen vefoaren, un woat siejen.

⁸Un hee woat uk äare Jetta met äare jegotne Bilda, met äa kostboaret Jereetschoft, Selwa un Golt, no Ägipten en de Jefangenschoft fieren; un hee woat Joaren lank staunthoolen ver däm Kjennich vom Nuaden.

⁹Un disa woat en daut Rikj vom Kjennich vom Sieden komen, oba en sien Launt trigjgonen.

¹⁰Oba siene Säns woaren sikj toom Kjrich reedmoaken un eene Menj groote Häasch toopbrinjen; un eena woat komen un äwaschwamen un äwastreemen; un hee woat wadakomen, un see woaren Kjrich fieren bat no siene Fastinj.

¹¹Un de Kjennich vom Sieden woat sikj oajren un woat uttrakjen un met am, däm Kjennich vom Nuaden, strieden; un disa woat eene groote Menj oppstalen, oba de Menj woat en siene Haunt jejäft woaren.

¹²Un aus de Menj wajchjenomen woat, woat sien Hoat sikj erhäwen; un hee woat 10 000 dolschmieten, oba nich too Macht komen.

¹³Un de Kjennich vom Nuaden woat wadakomen un een Häa oppstalen, een jratret aus daut ieeschte; un no eenje Joa woat hee met eenem grootem Häa un met groote Striedkrauft komen.

¹⁴Un en jane Tieden woaren väl oppstonen jäajen däm Kjennich vom Sieden; un Jewaultje ut dienem Volkj woaren sikj erhäwen, om daut Jesecht too erfellen, un woaren toom Faul komen.

¹⁵Un de Kjennich vom Nuaden woat komen un eenen Waul oppschedde un eene fauste Staut nämen; un de Striedkjrafte vom Sieden woaren nich staunthoolen, selfst sien uterläsnet Volkj woat kjeene Krauft haben, om staunttohoolen.

¹⁶Un dee, dee jäajen am jekomen es, woat no sienem Gootdenkjen haundlen, un kjeena woat ver am bestonen; un hee woat sienen Staund ennämen em Launt de Pracht, un Vetiljung woat en siene Haunt sennen.

¹⁷Un hee woat sien Aunjesecht doaropp rechten, met de Macht von sienem gaunzen Rikj too komen, endäm hee eenen Utjlikj em Senn haft, un hee woat am bewirkjen; un hee woat am (den Kjennich vom Sieden) eene Dochta de Frues jäwen, too äarem Vedoawen; un see woat nich bestonen un woat nuscht fa am sennen.

¹⁸Un hee woat sien Aunjesecht no de Inslen handreien un väl nämen; oba een Feldharr woat sienem Spott een Enj moaken, doatoo noch sienen Spott am trigjjäwen.

¹⁹Un hee woat sien Aunjesecht no de vesechade Städen en sienem Launt handreien, un woat stolpren un faulen un nich mea jefungen woaren.

²⁰Un aun siene Städ woat eena oppstonen, dee eenen Ennbrinja de Gowen derch de Harlichkjeit vom Rikj trakjen lat; oba en eenje Doag woat hee veschmatat woaren, un zwoa nich derch Oaja noch derch Kjrich.

²¹Un aun siene Städ woat een Veachta oppstonen, opp däm maun nich de Iea (Glauns) vom Kjennichtum lajen woat; un hee woat onverhoffs komen un derch Schmeichlen sikj daut Kjennichtum bemajchtje.

²²Un de äwaschwamende Striedkjrafte woaren ver am äwaschwamt un veschloagen woaren, un soogoa een Ferscht vom Bunt.

²³Dan von doa aun hee sikj met am vebungen haft, woat hee Droch eewen, un woat nopptrakjen un met weinich Volkj Macht jewennen.

²⁴Onveseenen woat hee en de fate Jäajenden de Launtschoft enndrinjen un doonen, waut nich siene Vodasch noch de Vodasch siene Vodasch jedonen ha: Raup un Hab un Goot woat hee an vestreien un jäajen de vesechade Städen siene Aunschläaj ersennen, un zwoa eene Tietlank.

²⁵Un hee woat siene Krauft un sienen Moot jäajen däm Kjennich vom Sieden erwakjen met een grootet Häa. Un de Kjennich vom Sieden woat sikj toom Kjrich reedmoaken met een grootet un sea stoakjet Häa; oba hee woat nich bestonen, dan maun woat Aunschläaj jäajen am ersennen;

²⁶un dee siene Tofelkost äten, woaren am veschmatre; un sien Häa woat äwaschwamen, un väl Jeschloagne woaren faulen.

²⁷Un de beid Kjennichs: äare Hoaten woaren opp Beeset bedocht sennen, un aun eenem Desch woaren see Läajes räden; oba daut woat nich Jelinjen, dan daut Enj vetrakjt sikj noch bat to bestemde Tiet.

²⁸Un hee woat met grootem Rikjtum en sien Launt trigjkomen, un sien Hoat woat jäajen däm heiljen Bunt jerecht sennen; un hee woat haundlen un en sien Launt trigjgonen.

²⁹Too bestemde Tiet woat hee wadakomen un jäajen däm Sieden trakjen, oba daut woat toolatst nich soo sennen aus aum Aunfank.

³⁰Dan Schäp von Kittim woaren wada han komen; un hee woat vezoagen un trigjgonen, un hee woat jäajen däm heiljen Bunt oajalich sennen un haundlen: Hee woat trigjgonen un siene Oppmoakjsomkjeit opp deejanje rechten, dee däm heiljen Bunt veloten.

³¹Un Striedkjrafte von am woaren doa stonen; un see woaren daut Heilichtum, de Fastinj, entheiljen, un woaren daut bestendje Opfa aufschaufen un däm vewustendem Aufschu oppstalen.

³²Un deejanje, dee jäajen däm Bunt gottloos haundlen, woat hee derch Schmeichlen toom Auffaul veleiden; oba daut Volkj, daut sienen Gott kjant, woat sikj stoakj erwiesen un haundlen.

³³Un de Vestendje unja däm Volkj woaren de väle belieren, oba dee woaren derch daut Schwieet un Flaumen faulen, derch Jefangenschoft un Raup, eene Tietlank.

³⁴Un wan see faulen, woat an met eene kjliene Help jeholpen woaren; un väle woaren sikj an met Heichlen aunschluten.

³⁵Un vonne Vestendje woaren eenje faulen, om an uttoproowen un to reinjen un witt too moaken bat de Enjtiet; dan daut vetrakjt sikj noch bat ne bestemde Tiet.

³⁶Un de Kjennich woat no sienem Gootdenkjen haundlen, un hee woat sikj erhäwen un groot moaken äwa jiedrem Gott, un jäajen däm Gott de Jetta woat hee Erstaunlichet räden; un hee woat jelinjen ha, bat de Oaja toenj es, dan woat daut faust Beschlotne vollbrocht.

³⁷Un opp däm Gott siene Vodasch woat hee nich achten, un noch opp de Kostboakjeit (däm Leeflinkj) de Frues noch opp irjent eenen Gott woat hee achten, sonda hee woat sikj äwa aules erhäwen.

³⁸Un aun siene Städ woat hee däm Gott de vesechade Städen ieren; däm Gott, däm siene Vodasch nich jekjant ha, woat hee met Golt un met Selwa un met Adelsteen un met Kostboakjeite ieren.

³⁹Un hee woat jäajen de stoakje vesechade Städen soo vefoaren met däm framden Gott: Wäa am aunerkjant, däm woat hee väl Iea erwiesen, un hee woat am Harschoft jäwen äwa de Väle un daut Launt toom Loon utdeelen.

⁴⁰Un too Enjtiet woat de Kjennich vom Sieden met am toopsteeten, un de Kjennich vom Nuaden woat jäajen am aunstorme met Woages un met Ritta un met väl Schäp; un hee woat en de Lenda enndrinjen un woat an äwaschwamen un äwaranen.

⁴¹Un hee woat en daut Launt de Pracht enndrinjen, un väl Lenda woaren toom Faul komen; oba dise woaren siene Haunt entranen: Edom un Moab un de Väanämen de Kjinja Amon.

⁴²Un hee woat siene Haunt aun de Lenda lajen, un daut Launt Ägipten woat nich entranen;

⁴³un hee woat daut Schauz aun Golt un Selwa un aule Kostboakjeit Ägiptens en siene Jewault brinjen, un Libia un Ätiopien (Kischite, Mohre) woaren en sienem (am) Unjadon sennen.

⁴⁴Oba Norechten vom Oosten un vom Nuaden häa woaren am erschrakjen; un hee woat uttrakjen en grootem Oaja, om väle to venichten.

⁴⁵Un hee woat sien Paulaustzelt oppschlonen tweschen daut Mäa un däm Boajch de heilje Scheenheit. Un hee woat too sienem Enj komen, un kjeena woat am halpen.