Read De Bibel JHF Daniel 12 Bible Online

Daniel 12 - De Bibel JHF bible

Daniel 12

¹Un en jane Tiet woat Michael oppstonen, de groota Ferscht, dee fa de Kjinja en dienem Volkj steit; un daut woat eene Tiet de Noot sennen, aus noch nich jewast es, von doa eene Nazion besteit bat to jane Tiet. Un en jane Tiet woat dien Volkj jerat woaren, een jiedra, dee em Buak jeschräwen jefungen woat.

²Un väle von dän, dee em Stoff de Ieed schlopen, woaren oppwakjen: Dise toom eewjen Läwen, un jane too Schaund, too eewje Aufschu.

³Un de Vestendje woaren dachen aus de Himmelsglauns, un dee, dee de Väle too Jerajchtichkjeit han weesen, aus de Stierns, emma un eewich.

⁴Un du, Daniel, veschlut de Wieed un vesäajel daut Buak bat to Enjtiet. Väle woaren daut derchforschen, un de Erkjantnis woat sikj vemieren.

⁵Un ekj, Daniel, sach: Un kjikj, twee aundre stunden doa, eena hia aum Eewa vom Stroom, un eena doa aum Eewa vom Stroom.

⁶Un eena säd to däm Maun en Leiwent jekjleet, dee bowen äwa däm Wotastroom wia: Woo lang woat daut Enj dise wundaboare Dinj dieren?

⁷Un ekj hieed däm Maun en Leiwent jekjleet, dee bowen äwa däm Wotastroom wia, un hee hoof siene Rajchte un siene Linkje nom Himmel un schwua bie däm, dee eewich läft: Eene Tiet, Tieden un eene haulwe Tiet; un wan de Vetäajung de Krauft vom heiljen Volkj vollbrocht sennen woat, dan woaren aule dise Dinj erfelt sennen.

⁸Un ekj hieed daut, oba ekj vestund daut nich; un ekj säd: Mien Har, waut woat de Utgank von disem sennen?

⁹Un hee säd: Go han, Daniel; dan de Wieed sellen veschloten un vesäajelt sennen bat to Enjtiet.

¹⁰Väle woaren sikj reinjen un witt moaken un utjeproowt, oba de Gottloose woaren gottloos haundlen; un kjeena de Gottloose woat daut vestonen, oba dee Vestendje woaren daut vestonen.

¹¹Un von dee Tiet aun, doa daut bestendje Opfa aufjeschauft woat, un zwoa om däm vewustendem Aufschu opptostalen, sent 1290 Doag.

¹²Jlekjseelich dee, dee uthelt un 1335 Doag errieekjt!

¹³Oba du go han bat toom Enj; un du woascht ruen, un woascht oppstonen too dienem Loss aum Enj de Doag.