Read De Bibel JHF Daniel 2 Bible Online

Daniel 2 - De Bibel JHF bible

Daniel 2

¹Un aum tweeden Joa de Rejierunk Nebukadnezars haud Nebukadnezar Dreem, un sien Jeist wort beorruicht, un sien Schlop wia fa am doahan.

²Un de Kjennich befool, daut maun de Schreftjelieede un de Beschwäara un de Zaubra un de Chaldäa roopen sull, om däm Kjennich siene Dreem too dieden; un see kaumen un kjeemen ver däm Kjennich.

³Un de Kjennich säd to an: Ekj ha eenen Droom jehaut, un mien Jeist es beorruicht , om däm Droom to weeten.

⁴Un de Chaldäa säden toom Kjennich opp arameisch: Oo Kjennich, läw eewich! Saj diene Kjnajchts däm Droom, soo well wie die diene Diedinj utlajen.

⁵De Kjennich auntwuad un säd to de Chaldäa: De Sach es von mie faust beschlooten: Wan jie mie däm Droom un siene Diedinj nich toweeten loten, soo sell jie en Stekja jehakt, un june Hiesa sellen too Mesthupes jemoakt woaren;

⁶oba wan jie mie däm Droom un siene Diedinj utlajen, soo sell jie Jeschenkja un Gowen un groote Iea von mie kjrieen. Doarom sajcht mie däm Droom un siene Diedinj.

⁷See auntwuaden toom tweeden Mol un säden: De Kjennich saj siene Kjnajchts däm Droom, soo well wie de Diedinj die sajen.

⁸De Kjennich auntwuad un säd: Ekj weet jewess, daut jie Tiet jewennen wellen, wiels jie seenen, daut de Sach von mie faust beschlooten es,

⁹daut, wan jie mie däm Droom nich dieden, daut bie junem Uadeel blift; Läajes un Onwoarheit ver mie to räden, dan jie ha junt beräd, bat de Tiet sikj endat. Doarom sajcht mie däm Droom, un ekj woa weeten, daut jie mie de Diedinj dieden kjennen.

¹⁰De Chaldäa auntwuaden däm Kjennich un säden: Kjeen Mensch es opp däm Ieedboddem, dee de Sach vom Kjennich dieden kaun; wiels kjeen groota un majchtja Kjennich jeemols eene Sach aus dise von irjent eenem Schreftjelieeden ooda Zaubra ooda Chaldäa velangt haft.

¹¹Dan de Sach, dee de Kjennich velangt, es schwoa; un daut jeft kjeenen aundren, dee daut däm Kjennich sajen kaun, aus blooss de Jetta, dee äare Wonunk nich biem Fleesch (Mensch) es.

¹²Doaräwa wort de Kjennich sea oajalich un veoajat, un hee befool, aule Weise von Babel omtobrinjen.

¹³Un de Befäl jinkj ut, un de Weise worden dootjemoakt; un maun socht Daniel un siene Frind, om an omtobrinjen.

¹⁴Doa wadaräd Daniel met Vestaunt un Ensecht däm Arioch, däm Bowaschten de Liefwajchta vom Kjennich, dee utjegonen wia, om de Weise von Babel omtobrinjen;

¹⁵hee auntwuad un säd to Arioch, däm bowaschten Beaumten vom Kjennich: Wuarom de strenja Befäl vom Kjennich? Doa deed Arioch de Sach däm Daniel to weeten.

¹⁶Un Daniel jinkj nenn un bedd von däm Kjennich, daut hee am eene Tiet jäwen mucht, om däm Kjennich de Diedinj too dieden.

¹⁷Doaropp jinkj Daniel en sien Hus; un hee deed de Sach siene Frind Hananja, Misael un Asarja to weeten,

¹⁸om daut see däm Gott em Himmel Boarmhoatichkjeit erbedde muchten wäajen dit Jeheemnis, doamet nich Daniel un siene Frind met dän äwajen Weise von Babel omkomen.

¹⁹Doaropp wort däm Daniel en eenem Nachtjesecht daut Jeheemnis jeopenboat. Doa lowd Daniel däm Gott em Himmel.

²⁰Daniel hoof aun un säd: Jepreist (jeloft) es de Nomen Gottes von Eewichkjeit too Eewichkjeit! Dan Weisheit un Macht, dee sent siene.

²¹Un hee endat Tieden un Tietpunkte, sat Kjennichs auf un sat Kjennichs en; hee jeft dän Weisen Weisheit un Vestaunt dän Vestendjen;

²²hee openboat daut Deepe un daut Vestoakne; hee weet, waut en de Diestanis es, un bie am wont daut Licht.

²³Die, Gott miene Vodasch, low un riem ekj, daut du mie Weisheit un Krauft jejäft, un mie nu toweeten loten hast, waut wie von die jebedd haben; dan du hast ons de Sach vom Kjennich toweeten loten.

²⁴Doawäajen jinkj Daniel no Arioch nenn, däm de Kjennich bestalt haud, de Weise von Babel omtobrinjen; hee jinkj han un säd to am aulsoo: Brinj de Weise von Babel nich om; leid mie ver däm Kjennich, un ekj woa däm Kjennich de Diedinj dieden.

²⁵Doa fieed Arioch ielig däm Daniel ver däm Kjennich, un säd to am aulsoo: Ekj ha eenen Maun unja de Wajchjefieede von Juda jefungen, dee däm Kjennich de Diedinj dieden woat.

²⁶De Kjennich hoof aun un säd to Daniel, däm sien Nomen Beltschazar wia: Best du emstaunt, däm Droom, dän ekj jeseenen ha, un siene Diedinj mie uttolajen?

²⁷Daniel auntwuad däm Kjennich un säd: Daut Jeheemnis, daut de Kjennich velangt, kjeene Weise, Beschwäara, Schreftjelieede un Woasaja däm Kjennich nich dieden.

²⁸Oba daut es een Gott em Himmel, dee Jeheemnisen openboat; un hee haft däm Kjennich Nebukadnezar toweeten loten, waut aum Enj de Doag passieren woat. Dien Droom un de Jesechta von dienem Haupt opp dienem Loaga wieren dise:

²⁹Die, oo Kjennich, stieejen opp dienem Loaga Jedanken opp, waut no disem passieren woat; un dee, dee de Jeheemnisen openboat, haft die jewast, waut passieren woat.

³⁰Oba mie es nich derch Weisheit, dee en mie mea aus en aule Läwende wia, dit Jeheemnis jeopenboat jeworden, sonda doawäajen, doamet maun däm Kjennich de Diedinj to weeten lat un du de Jedanken von dienem Hoat erfoascht.

³¹Du, oo Kjennich, sachst: Un kjikj, een grootet Bilt; dit Bilt wia jewaultich, un sien Glauns butajeweenlich; daut stunt ver die, un sien utseenen wia schrakjlich.

³²Dit Bilt, sien Haupt wia von reinem Golt; siene Brost un siene Oarms von Selwa; sien Buck un siene Lenden von Koppa;

³³siene Schinkjes von Iesa; siene Feet deelwiess von Iesa un deelwiess von Leem.

³⁴Du sachst, bat een Steen sikj loosreet onen Henj, un daut Bilt, aun siene Feet von Iesa un Leem schluach un an vemold.

³⁵Doa worden tojlikj daut Iesa, de Leem daut Koppa, daut Selwa un daut Golt vemolt, un see worden aus Sprie oppe Draschdäl aum Somma; un de Wint fäajd an wajch, un daut wudd kjeene Städ fa an jefungen. Un de Steen, dee daut Bilt veschloagen haud, wort to eenem groote Boaj un feld de gaunze Ieed.

³⁶Daut es de Droom; un siene Diedinj well wie ver däm Kjennich aunsaje:

³⁷Du, oo Kjennich, du Kjennich äwa de Kjennichs, däm de Gott von Himmel daut Kjennichtum, de Macht un de Jewault un de Iea jejäft haft;

³⁸un äwaaul, woa Menschenkjinja, Tieren vom Flekj un Väajel vom Himmel wonen, haft hee an en diene Haunt jejäft un die toom Harscha äwa an aule jesat - du best daut Haupt von Golt.

³⁹Un no die woat een aundret Kjennichrikj oppstonen, läaja aus du; un een aundret, dreddet Kjennichrikj, von Koppa, daut äwa de gaunze Ieed harschen woat.

⁴⁰Un 1/4-det Kjennichrikj woat stoakj sennen aus Iesa; krakjt soo aus daut Iesa aules vemolt un veschleit, soo woat daut, aus daut Iesa, daut veschmatat, aul dise vemolen un veschmatre.

⁴¹Un daut du de Feet un de Teeen deels von Tapaleem un deels von Iesa jeseenen hast - daut woat een jedeeldet Kjennichrikj sennen; oba von de faustichkjeit von Iesa woat en am sennen, wiels du daut Iesa met Tapaleem vemischt jeseenen hast.

⁴²Un de Teeen aune Feet, deels von Iesa un deels von Leem: Toom Deel woat daut Kjennichrikj stoakj sennen, un een Deel woat bräakjlich sennen.

⁴³Daut du daut Iesa met Tapaleem vemischt jeseenen hast - see woaren sikj met däm Somen de Menschen vemische, oba see woaren nich met eenaunda bliewen: Soo aus sikj Iesa met Leem nich vemischt.

⁴⁴Un en dee Doag dise Kjennichs woat dee Gott det Himmels een Kjennichrikj opprechten, daut eewichlich nich venicht (entwei) un däm siene Harschoft kjeenem aundren Volkj äwaloten woaren woat; daut woat jane aule Kjennichrikjs vemolen un venichten, oba selfst eewich bestonen:

⁴⁵Wiels du jeseenen hast, daut von däm Boajch een Steen sikj loosreet onen Henj un daut Iesa, daut Koppa, däm Leem, daut Selwa un daut Golt vemold. De groota Gott haft däm Kjennich toweeten loten, waut no disem passieren woat; un de Droom es jewess un siene Diedinj toovelotich.

⁴⁶Doa foll de Kjennich Nebukadnezar dol opp sien Aunjesecht un bäd Daniel aun; un hee befool, am Speisopfa un Rieekjastoff (Weiruak, seeta Ruak) doatobrinjen.

⁴⁷De Kjennich auntwuad Daniel un säd: En Woarheit, jun Gott es dee Gott de Jetta un dee Har de Kjennichs, un een Openboara de Jeheemnisen, doa du dit Jeheemnis openboaren kust.

⁴⁸Doaropp muak de Kjennich däm Daniel groot un jeef am väl groote Jeschenkja, un hee sad am aus Harscha en äwa de gaunze Launtschoft Babel un toom Bowaschten äwa aule Weise von Babel.

⁴⁹Un Daniel bedd däm Kjennich, un hee stald Sadrach, Mesach un Abednego äwa de Vewaultunk de Launtschoft Babel. Un Daniel wia em Dooa vom Kjennich.