Read De Bibel JHF Daniel 4 Bible Online

Daniel 4 - De Bibel JHF bible

Daniel 4

¹Ekj, Nebukadnezar, wia ruich en mienem Hus un haud jedeie en mienem Paulaust.

²Ekj sach eenen Droom, hee erschrakjt mie; un Jedanken opp mienem Loaga un Jesechta (Bilda Visionen) en mienem Haupt enjsten mie.

³Un von mie wort Befäl jejäft, aule Weise von Babel ver mie to brinjen, om daut see mie de Diedinj vom Droom dieden.

⁴Doaropp kaumen de Schreftjelieede, de Beschwäara, de Chaldäa un de Woasaja doahan; un ekj vetald an däm Droom, oba see deelden mie siene Diedinj nich met.

⁵Un aus latsta kjeem ver mie Daniel, däm sien Nomen Beltschazar es, nodäm Nomen von mienem Gott, un en däm de Jeist de heilje Jetta es; un ekj vetald am däm Droom:

⁶Beltschazar, du Bowaschta de Schreftjelieede, doa ekj weet, daut de Jeist de heilje Jetta en die es, un daut kjeen Jeheemnis die too schwoa es, soo saj mie dee Jesechta von mienem Droom, däm ekj jeseenen ha, un siene Diedinj.

⁷Waut nu dee Jesechta en mienem Haupt opp mienem Loaga betraft, soo sach ekj: Un kjikj, een Boom stunt medden oppe Ieed, un siene Hecht wia jewaultich.

⁸De Boom wort groot un stoakj, un siene Hecht rieekjt bat aun däm Himmel, un hee wort jeseenen bat aun daut Enj de gaunze Ieed;

⁹sien Loof wia scheen un siene Frucht väl, un daut wia Noarinj aun am fa aule; de Tieren vom Flekj fungen Schauten unja am, un de Väajel vom Himmel wonden en siene Asta, un aulet Fleesch aut sikj von am saut.

¹⁰Ekj sach en de Jesechta en mienem Haupt opp mienem Loaga, un kjikj, een Wajchta un Heilja stieech vom Himmel rauf.

¹¹Hee roopt met Macht un säd aulsoo: Heiwt däm Boom om un schnied siene Asta auf; streept sien Loof auf un vestreit siene Frucht! De Tieren unja am sellen wajchranen un de Väajel ut siene Asta!

¹²Doch sienen Wartelstock lot enne Ieed, un zwoa en Faslen von Iesa un Koppa, em Grauss oppem Flekj; un von däm Himmelsdeiw woat hee naut, un met de Tieren haft hee deel aun däm Krut de Ieed.

¹³Sien Menschenhoat woat vewaundelt un daut Hoat von eenem Tia am jejäft; un 7 Tieden sellen äwa am vegonen.

¹⁴Derch Beschluss de Wajchtasch es dis utspruch, un een Befäl de Heilje es dise Sach: doamet daut de Läwendje erkjanen, daut de Hechsta äwa daut Kjennichtum de Menschen harscht un daut jeft, wäm hee well, un däm Kjlienen de Menschen doaräwa stalt.

¹⁵Disem Droom ha ekj, de Kjennich Nebukadnezar, jeseenen; un du, Beltschazar, saj siene Diedinj, doa aule Weise von mienem Kjennichrikj mie de Diedinj nich sajen kunne; oba du kaust daut, wiels de Jeist de heilje Jetta en die es.

¹⁶Doa entsatzt sikj Daniel, däm sien Nomen Beltschazar es, eene Tietlank, un siene Jedanken muaken am Angst. De Kjennich funk aun un säd: Beltschazar, de Droom un siene Diedinj beenjst die nich. Beltschazar auntwuad un säd: Mien Har, de Droom jelt diene Haussa un siene Diedinj diene Fiend!

¹⁷De Boom, däm du jeseenen hast, de groot un stoakj wort, däm siene Hecht aun däm Himmel rieekjt, un dee äwa de gaunze Ieed han jeseenen wort;

¹⁸un däm sien Loof scheen un siene Frucht väl es, un aun däm Noarinj fa aule wia; unja däm de Tieren vom Flekj wonen, un en däm siene Asta de Väajel vom Himmel sikj opphilden:

¹⁹Daut best du, oo Kjennich, dee du groot un stoakj jeworden best; un diene Grootheit woss un rieekjt bat aun däm Himmel, un diene Harschoft bat aun daut Enj de Ieed.

²⁰Un daut de Kjennich eenen Wajchta un Heiljen vom Himmel raufstieen sach, dee doa säd: Heiwt däm Boom om un vedoaft am! Doch sienen Wartelstock lot enne Ieed, un zwoa en Faslen von Iesa un Koppa, em Grauss oppem Flekj; un von däm Himmelsdeiw woat hee naut, un hee haft sien Deel met de Tieren vom Flekj, bat 7 Tieden äwa am vegonen -

²¹dit es de Diedinj, oo Kjennich, un dit de Beschluss vom Hechsten, dee äwa mienem Harn, däm Kjennich, komen woat:

²²Maun woat die von de Menschen utsteeten, un bie de Tieren oppem Flekj woat diene Wonunk sennen; un maun woat die Krut to äten jäwen, aus de Rinda, un die von däm Himmelsdeiw naut woaren loten; un daut woaren 7 Tieden äwa die vegonen, bat du erkjanst, daut de Hechsta äwa daut Kjennichtum de Menschen harscht un daut jeft, wäm hee well.

²³Un daut maun jesajcht haft, däm Wartelstock vom Boom to loten - dien Kjennichtum woat die erhoolen bliewen, sooboolt du erkjant haben woascht, daut de Himmel harscht.

²⁴Doarom, oo Kjennich, lot die mien Rot jefaulen, un bräakj met diene Sinden derch Jerajchtichkjeit un met diene Misdoten derch Boarmhoatichkjeit jäajen Älendje, wan dien Jlekj duarhauft sennen saul.

²⁵Aules daut kaum äwa däm Kjennich Nebukadnezar.

²⁶Nom vegonen von 12 Moonat waundeld hee omhäa oppe kjennichliche Paulausten von Babel;

²⁷un de Kjennich funk aun un säd: Es daut nich daut groote Babel, daut ekj toom Kjennichswonsett oppjebut ha derch de Krauft miene Macht un to Iea miene Harlichkjeit?

²⁸Daut Wuat wia noch em Kjennichsmul, doa kjeem eene Stemm vom Himmel rauf: Die, Kjennich Nebukadnezar, woat jesajcht: Daut Kjennichtum es von die jenomen!

²⁹Un maun woat die von de Menschen utsteeten, un bie de Tieren oppem Flekj woat diene Wonunk sennen, un maun woat die Krut toom äten jäwen aus de Rinda; un daut woaren 7 Tieden äwa die vegonen, bat du erkjanst, daut de Hechsta äwa daut Kjennichtum de Menschen harscht un daut jeft, wäm hee well.

³⁰En däm seljen Uagenblekj wort daut Wuat äwa Nebukadnezar vollbrocht; un hee wort von de Menschen utjestat, un hee aut Krut aus de Rinda, un sien Lief wort von däm Himmelsdeiw naut, bat sien Hoa woss aus Odlafadre un siene Näajel aus Voagelkralen.

³¹Un aum Enj de Doag erhoow ekj, Nebukadnezar, miene Uagen nom Himmel, un mien Vestaunt kaum mie wada; un ekj lowd däm Hechsten, un ekj riemd un veharlicht dän eewich Läwenden, däm siene Harschoft eene eewje Harschoft es, un däm sien Rikj von Jeschlajcht too Jeschlajcht blift.

³²Un aule Bewona de Ieed woaren aus nuscht jeacht, un no sienem Wellen deit hee däm Häa em Himmel un met de Bewona de Ieed; un doa es kjeena, dee siene Haunt wäat un to am sajen kaun: Waut deist du?

³³Too selje Tiet kaum mie mien Vestaunt wada, un to Iea von mienem Kjennichtum kaum miene Harlichkjeit un mien Glauns mie wada; un miene Rotjäwa un miene Jewaultje sochten mie opp, un ekj wort wada en mien Kjennichtum enjesat, un butajeweenliche Macht wort mie doatoo jejäft.

³⁴Nu riem ekj, Nebukadnezar, un erhäw un veharlich däm Himmelskjennich, däm siene Wäaj Rajcht sent, un dee deemutje kaun, dee en Huachmoot waundlen.