Read De Bibel JHF Daniel 5 Bible Online

Daniel 5 - De Bibel JHF bible

Daniel 5

¹De Kjennich Belsazar muak fa siene 1000 Jewaultje een grootet Mol, un hee drunk Wien ver dee 1000.

²Belsazar befool, aus de Wien am schmakjt, daut maun de goldne un selwane Jefässa doatobrocht, dee sien Voda Nebukadnezar ut däm Tempel en Jerusalem wajchjenomen haud, om daut de Kjennich un siene Jewaultje, siene Frues un siene Näbenfrues doarut drunken.

³Dan brocht maun de goldne Jefässa, dee maun ut däm Tempel utem Hus Gottes en Jerusalem wajchjenomen haud; un de Kjennich un siene Jewaultje, siene Frues un siene Näbenfrues drunken doarut.

⁴See drunken Wien un riemde de Jetta von Golt un Selwa, von Koppa, Iesa, Holt un Steen.

⁵En däm seljen Uagenblekj kjeemen Finja, eene Menschenhaunt, väa un schreewen, däm Lichtstenda jäajenäwa, opp däm Kaulkj de Waunt em kjennichlichen Paulaust; un de Kjennich sach de Haunt, dee doa schreef.

⁶Doa veendad sikj de Jesechtsfoaw vom Kjennich, un siene Jedanken enjsten am; un de Benja aun siene Hoften leesden sikj, un siene Kjnee schluagen jäajen eenaunda.

⁷De Kjennich roopt met Macht, daut maun de Beschwäara, de Chaldäa un de Woasaja nenn brinjt; un de Kjennich funk aun un säd to de Weise von Babel: Jiedra, dee dise Schreft leesen un äare Diedinj mie sajen woat, dee saul met Purpur bekjleet woaren, met eene goldne Kjäd om sienen Hauls, un hee saul aus dredda em Kjennichrikj harschen.

⁸Donn kaumen aule Weise vom Kjennich doahan; oba see kunnen nich de Schreft läsen, noch de Diedinj däm Kjennich too dieden.

⁹Doa kjeem de Kjennich Belsazar en groote Angst, un siene Jesechtsfoaw veendad sikj aun am; un siene Jewaultje worden erschrakjt.

¹⁰No de Wieed vom Kjennich un siene Jewaultje kjeem de Kjennijin (Kjennichsmutta) en daut Hus doa jefiat wort. De Kjennijin funk aun un säd: Oo Kjennich, läw eewich! Lot diene Jedanken die nich enjsten un diene Jesechtsfoaw sikj nich veendren!

¹¹Doa es een Maun en dienem Kjennichrikj, en däm de Jeist de heilje Jetta es; un en de Doag von dienem Voda wort Ensecht un Vestaunt un Weisheit aus de Weisheit de Jetta bie am jefungen; un de Kjennich Nebukadnezar, dien Voda, haft am toom Bowaschten de Schreftjelieede, de Beschwäara (Jeistabefroaga/dee, waut met de Jeista räden), de Chaldäa un de Woasaja erhowen, dien Voda, oo Kjennich!

¹²Doarom daut een butajeweenlicha Jeist, un Kjantnis un Vestaunt, een Jeist de Droomdiedung un de Knoppes too leesen bie am jefungen wort, bie Daniel, däm de Kjennich däm Nomen Beltschazar jejäft haft. Soo woat nu Daniel jeroopt, un hee woat de Diedinj utlajen.

¹³Doaropp wort Daniel ver däm Kjennich jefieet. De Kjennich funk aun un säd to Daniel: Best du Daniel, eena de Wajchjefieede von Juda, däm de Kjennich, mien Voda, ut Juda häajebrocht haft?

¹⁴Un ekj ha von die jehieet, daut de Jeist de Jetta en die es, un daut Kjantnis un Vestaunt un butajeweenliche Weisheit bie die jefungen woat.

¹⁵Un nu sent de Weise, de Beschwäara, ver mie jebrocht worden, doamet see dise Schreft läsen un äare Diedinj mie toweeten loten; oba see kunnen nich, de Diedinj de Sach utlajen.

¹⁶Oba ekj ha von die jehieet, daut du Diedinj to jäwen un Knoppes too leesen kaust. Nu, wan du dise Schreft too läsen un äare Diedinj mie sajen kaust, soo saust du met Purpur bekjleet woaren, met eene goldne Kjäd om dienen Hauls, un du saust aus dredda em Kjennichrikj harschen.

¹⁷Doa auntwuad Daniel un säd toom Kjennich: Diene Gowen muchten die vebliewen, un diene Jeschenkja jeff eenem aundren; doch woa ekj de Schreft däm Kjennich läsen un de Diedinj am utlajen.

¹⁸Du, oo Kjennich! De hechsta Gott haft Nebukadnezar, dienem Voda, daut Kjennichtum un de Macht un de Iea un de Harlichkjeit jejäft;

¹⁹un wäajen de Macht, dee hee am gauf, zettaden un enjsten sikj ver am aule Velkja, Nazionen un Sproaken. Wäm hee wull, moakt hee doot, un wäm hee wull leet hee läwen; un wäm hee wull, erhoow hee, un wäm hee wull, sad hee rauf.

²⁰Oba aus sien Hoat sikj erhoow un bat sien Jeist Äwamootich wort un sikj vestokt, wort hee von sienem Kjennichstroon jeschmäten, un maun naum am siene Iea.

²¹Un hee wort von de Menschenkjinja utjestat, un sien Hoat wort aus de Tieren äat, un siene Wonunk wia bie de Wille Esel; maun jeef am Krut to äten aus de Rinda, un sien Lief wort met Himmelsdeiw naut - bat hee erkjand, daut de hechsta Gott äwa daut Kjennichtum de Menschen harscht, un doaräwa sat, wäm hee well.

²²Un du, Belsazar, sien Sän, hast dien Hoat nich jedeemooticht, zwoa du dit aules jewist hast.

²³Un du hast die äwa däm Harn de Himmel erhowen; un maun haft de Jefässa von sienem Hus ver die jebrocht, un du un diene Jewaultje, diene Frues un diene Näbenfrues, jie ha Wien doarut jedrunken. Un du hast de Jetta von Selwa un Golt, von Koppa, Iesa, Holt un Steen jeriemt, dee nich seenen un nich hieren un nich woanämen; oba däm Gott, en däm siene Haunt dien Odem es, un bie däm aule diene Wäaj sent, hast du nich jeieet.

²⁴Doa wort von am dise Haunt jeschekjt un dise Schreft jeschräwen.

²⁵Un dit es de Schreft, dee jeschräwen worden es: Mene, mene, tekel uparsin.

²⁶Un dit es de Diedinj de Sach: Mene - Gott haft dien Kjennichtum jetalt un moakt am een Enj.

²⁷Tekel - du best opp de Wichtschol jewoage un to leicht jefungen worden.

²⁸Perez - dien Kjennichrikj woat vedeelt un dän Meeda un Persa jejäft.

²⁹Un dan befool Belsazar, un maun bekjleed Daniel met Purpur, met eene goldne Kjäd om sienen Hauls; un maun roopt äwa am ut, daut hee de dredda Harscha em Kjennichrikj sennen sull.

³⁰En dee selje Nacht wort Belsazar, de Kjennich äwa de Chaldäa, omjebrocht.