Read De Bibel JHF Daniel 7 Bible Online

Daniel 7 - De Bibel JHF bible

Daniel 7

¹Aum ieeschten Joa Belsazar, däm Kjennich von Babel, sach Daniel eenen Droom un Jesechta met sienem Haupt opp sienem Loaga. Dan schreef hee däm Droom opp, de Somm de Sach berecht hee.

²Daniel funk aun un säd: Ekj sach de Nacht en mienem Jesecht, un kjikj, dee vea Wind vom Himmel bruaken loos opp daut groote Mäa.

³Un 4 groote Tieren stieejen ut daut Mäa enopp, eent vom aundren veschiedne Oate.

⁴Daut ieeschte wia aus een Leiw un haud Odlaflichte; ekj kjikjt, bat siene Flichten utjeräten worden, un daut von de Ieed oppjehowen un aus een Mensch opp siene Feet jestalt un am een Menschenhoat jejäft wort.

⁵Un kjikj, een aundret, tweede Tia, aus een Boa; un daut recht sikj opp eene Sied opp, un daut haud 3 Rebben en sienem Mul tweschen siene Tänen; un maun säd to am aulsoo: Sto opp, frat väl Fleesch!

⁶No disem sach ekj, un kjikj, een aundret, aus een Panta; un daut haud 4 Flichten von eenem Voagel opp sienem Rigjen; un daut Tia haud 4 Kjap, un Harschoft wort am jejäft.

⁷No disem sach ekj de Nacht en Jesechta: Un kjikj, een vieedet Tia, schrakjlich un furchtboa un sea stoakj, un daut haud groote Iesane Tänen; daut fraut un vemold, un waut äwa bleef, veklunjd daut met siene Feet; un daut wia aundasch aus aule Tieren, dee ver am jewast, un daut haud 10 Hieena.

⁸Wäarent ekj opp de Hieena acht jeef, kjikj, doa stieech een aundret, kjlienet Huarn tweschen an huach, un 3 von de ieeschte Hieena worden ver am utjeräten; un kjikj, aun disem Huarn wieren Uagen aus Menschenuage, un een Mul, daut groote Dinj räd.

⁹Ekj sach, bat Troons oppjestalt worden un een Oola aun Doag sikj sad: Sien Kjleet wia witt aus Schnee, un daut Hoa opp sienem Haupt aus reine Woll; sien Troon Fiaflaumen, un siene Räda een brennendet Fia.

¹⁰Een Stroom von Fia rand un jinkj von am ut; 1 000 mol 1 000-de deenden am, un 10 000 mol 10 000 stunden ver am. Daut Jerecht sad sikj, un Bieekja worden opjemoakt.

¹¹Donn kjikjt ekj wäajen de Stemm - dee groote Wieed, dee daut Huarn räd: Ekj kjikjt, bat daut Tia dootjemoakt wort, un sien Lief venicht un däm Braunt von Fia äwajäft wort.

¹²Un waut de äwaje Tieren betraft: Äare Harschoft wort wajchjenomen, oba Velenjrung vom Läwen wort an jejäft bat opp Tiet un Stund.

¹³Ekj kjikjt en Jesechta de Nacht: Un kjikj, met de Wolkjen vom Himmel kjeem eena aus een Menschensän; un hee kjeem nodäm Oolen aun Doag un wort ver däm seljen jebrocht.

¹⁴Un am wort Harschoft un Harlichkjeit (Iea) un Kjennichtum jejäft, un aule Velkja, Nazionen un Sproaken deenden am; siene Harschoft es eene eewje Harschoft, dee nich vegonen, un sien Kjennichtum soo eent, daut niemols venicht woaren woat.

¹⁵Mie, Daniel, wia mien Jeist en mie sea aunjejräpen, un de Jesechta en mienem Haupt enjsten mie.

¹⁶Ekj kaum noda no eenem de Doastonende, om von am Jewesheit äwa dit aules too bedden. Un hee säd to mie, daut hee mie de Diedinj de Dinj utlajen well:

¹⁷Dise groote Tieren, dee 4 wieren, sent 4 Kjennichs, dee von de Ieed oppstonen woaren.

¹⁸Oba de Heilje vom Hechsten woaren daut Rikj emfangen, un woaren daut Rikj besetten bat en Eewichkjeit, jo, bat enne Eewichkjeit de Eewichkjeit.

¹⁹Doaropp bedd ekj om Jewesheit äwa daut vieede Tia, daut von aule aundre veschieden wia, sea schrakjlich, däm siene Tänen von Iesa un siene Kleiwe von Koppa wieren, daut fraut, vemold, un waut äwableef, met siene Feet veklunjd;

²⁰un äwa de 10 Hieena opp sienem Kopp; un äwa daut aundre Huarn, daut nohecht stieech, un fa däm 3 auffollen; un daut Huarn haud Uagen un een Mul, dee groote Dinj räd, un sien utseenen wia jrata aus daut von siene Jenosse.

²¹Ekj sach, woo dit Huarn Kjrich jäajen de Heilje fieed un an besiejd,

²²bat de Oola aun Doag kaum, un daut Jerecht däm Heiljen de hechste Uaten jejäft wort, un de Tiet kaum, doa de Heilje daut Rikj aus Ieejentum naumen.

²³Hee säd, aulsoo: Daut vieede Tia: Een vieedet Kjennichrikj woat opp de Ieed sennen, daut von aule Kjennichrikjs veschieden sennen woat; un daut woat de gaunze Ieed fräten un dee veklunjen un dee vemolen.

²⁴Un de 10 Hieena: Ut janem Kjennichrikj woaren 10 Kjennichs oppstonen; un een aundra woat no an oppstonen, un disa woat aundasch sennen von de aundre un woat 3 Kjennichs doldrekjen.

²⁵Un hee woat Wieed räden jäajen däm Hechsten un dee Heilje de hechste Uaten venichten; un hee woat doaraun denkjen, Tieden un Jesaz too endren, un see woaren eene Tiet un Tieden un eene haulwe Tiet en siene Haunt jejäft woaren.

²⁶Oba daut Jerecht woat sikj saten; un maun woat siene Harschoft wajchnäme, om an bat toom Enj to venichten un to venielen.

²⁷Un daut Kjennichtum un de Macht un de Grootheit de Kjennichrikjs unja däm gaunzen Himmel woat däm Volkj de Heilje dee hechste Uaten jejäft woaren. Sien Rikj es een eewjet Rikj, un aule Harschoften woaren am deenen un jehorchen.

²⁸Bat hiahäa daut Enj de Räd. Mie, Daniel, muaken miene Jedanken sea Angst, un miene Jesechtsfoaw veendad sikj aun mie; un ekj bewoad de Sach en mienem Hoaten.