Read De Bibel JHF Daniel 8 Bible Online

Daniel 8 - De Bibel JHF bible

Daniel 8

¹Aum dredden Joa de Rejierunk vom Kjennich Belsazar wees sikj mie, Daniel, een Jesecht, nodäm janjen, daut mie aum Aunfank jewast wia.

²Un ekj sach em Jesecht; un daut passieed, aus ekj kjikjt, doa wia ekj en de Burjch Susan, dee en de Launtschoft Elam es; un ekj sach em Jesecht, un ekj wia aum Fluss Ulai.

³Un ekj hoof miene Uagen un sach: Un kjikj, een Bock stunt ver däm Fluss, dee haud 2 Hieena; un de twee Hieena wieren huach, un daut eene wia hecha aus daut aundre, un daut hejchre stieech toolatst nohecht.

⁴Ekj sach däm Bock nom Wasten un nom Nuaden un nom Sieden steeten, un kjeen Tia kunn ver am bestonen, un kjeena rad ut siene Haunt; un hee haundeld no sienem Gootdenkjen un wort groot.

⁵Un aus ekj acht jeef, kjikj, doa kaum een Kosenbock vom Wasten häa äwa de gaunze Ieed, un hee beread nich de Ieed; un de Bock haud een aunseenendet Huarn tweschen siene Uagen.

⁶Un hee kjeem bat nodäm Bock met de twee Hieena, däm ekj haud ver däm Fluss stonen seenen; un hee rand am aun, en Wutt met siene Krauft.

⁷Un ekj sach am bie däm Bock aunkomen, un hee vebettad sikj jäajen am, un hee stad däm Bock un vebruak siene beid Hieena; un en däm Bock wia kjeene Krauft, om ver am to bestonen. Un hee schmeet am toom Boddem un veklunjd am, un kjeena rad däm Bock ut siene Haunt.

⁸Un de Kosenbock wort äwa de Mot groot; un aus hee stoakj jeworden wia, vebruak daut groote Huarn, un 4 aunjeseenen Hieena wosse aun siene Städ no de 4 Himmelswinde han.

⁹Un ut däm eenen von an kaum een kjlienet Huarn väa; un daut wort butajeweenlich groot jäajen Sieden un jäajen Oosten un jäajen daut Prachtlaunt.

¹⁰Un daut wort groot bat toom Himmelshäa, un daut schmeet von däm Häa un von de Stierns oppe Ieed rauf un veklunjd an.

¹¹Selfst bat toom Ferscht vom Häa deed sikj daut groot; un daut neem am daut bestendje Opfa wajch, un de Städ von sienem Heilichtum wort doljeschmäten.

¹²Un daut Häa wort doahan jejäft met däm bestendjen Opfa, om daut Fräfels wellen. Un daut schmeet de Woarheit oppe Ieed un haundeld un haud Jelinje.

¹³Un ekj hieed eenem Heiljen räden too janem, dee doa räd: Bat wan jeit daut Jesecht von däm bestendjen Opfa un von däm vewustendem Fräfel, daut soo aus daut Heilichtum aus uk daut Häa toom veklunjen hanjejäft es?

¹⁴Un hee säd to mie: Bat too 2300 Owens un Morjes; dan woat daut Heilichtum jerajchtfoadicht woaren.

¹⁵Un daut passieed, aus ekj, Daniel, daut Jesecht sach, doa socht ekj om Vestentnis doaräwa; un kjikj, doa stunt ver mie, aus eene Maunsjestault.

¹⁶Un ekj hieed eene Menschenstemm tweschen de Eewasch von Ulai, dee doa roopt un säd: Gabriel, jeff disem daut Jesecht too vestonen!

¹⁷Un hee kaum aun däm Uat, woa ekj stunt; un aus hee doatoo kaum, vefieed ekj mie un foll opp mien Aunjesecht. Un hee säd to mie: Bejriep, Menschensän! Dan daut Jesecht jeit opp de Enjtiet.

¹⁸Un aus hee met mie räd, sunk ekj beteibt opp mien Aunjesecht too Ieed. Oba hee schieed mie aun un stald mie opp mienem Plauz.

¹⁹Un hee säd: Kjikj, ekj well die wiesen, waut enne latste Tiet vom Oaja passieren woat; dan daut jeit opp de bestemde Tiet aum Enj.

²⁰De Bock met de twee Hieena, däm du jeseenen hast, sent de Kjennichs von Media un Persien.

²¹Un de hoaja Kosenbock es de Kjennich von Griechenlaunt; un daut groote Huarn, daut tweschen siene Uagen wia, es de ieeschta Kjennich.

²²Un daut et vebruak un 4 - aun siene Städ oppkomen: 4 Kjennichrikjs woaren ut dise Nazion oppstonen, oba nich met siene Macht.

²³Un aum Enj von äarem Kjennichtum, wan dee Fräfel daut Mot voll jemoakt woaren haben, woat een Kjennich oppstonen, frajch un lestich (jeftalich) von Aunjesecht.

²⁴Un siene Krauft woat stoakj sennen, oba nich derch siene ieejne Krauft; un hee woat erstaunlichet Vedoawen aunrechten, un Jelinjen ha un haundlen; un hee woat Stoakje un daut Volkj de Heilje vedoawen.

²⁵Un derch siene Kluakheit woat de Droch en siene Haunt jelinjen; un hee woat en sienem Hoat groot doonen un onveseenen väle vedoawen. Un jäajen däm Ferscht de Ferschten woat hee oppstonen, oba onen Menschenhaunt veschmatat woaren.

²⁶Un daut Jesecht von de Owens un von de Morjes wuavon jerät wort, es Woarheit; un du, veschlut daut Jesecht, dan daut sent noch väl Doag bat doahan.

²⁷Un ekj, Daniel, wia marood un wia eenje Doag krank. Dan stunt ekj opp un verecht de Jeschafte vom Kjennich. Un ekj wia entsat äwa daut Jesecht, un kjeena vestund daut.