Read De Bibel JHF Hosea 10 Bible Online

Hosea 10 - De Bibel JHF bible

Hosea 10

¹Israel es een jalsta Wienstock, dee siene Frucht aunsat; no de Menj siene Frucht haft hee de Aultoaren vemieet, nodäm Gooden en sienem Launt ha see de Biltstendasch vescheenat (schmocka jemoakt).

²Heichlarisch wia äa Hoat, nu woaren see daut busse: Hee woat äare Aultoaren veschlonen, äare Biltstendasch vebräakjen.

³Jo, nu woaren see sajen: Wie ha kjeenen Kjennich; dan wie ha fa däm Harn nich Angst jehaut, un de Kjennich, waut woat hee fa ons doonen?

⁴See ha ladje Wieed jerät, faulsch jeschwuaren, Bundnisse jeschloten: soo woat daut Jerecht utloten aus Jeftkrut en de Foaren oppem Flekj.

⁵De Bewona von Samaria woaren om daut Kaulf von Bat-Awen Angst haben; jo, sien Volkj woat äwa daut selje truaren, un siene Jetzenpriesta woaren sienthaulwen zetren, wäajen siene Harlichkjeit, wiels see von am wajchjegonen es;

⁶uk dit woat no Assierien jebrocht woaren aus Jeschenkj fa däm Kjennich Jareb. Schaund woat Efraim ennholen, un Israel woat too Schaund woaren wäajen sienem Rot.

⁷Wajch es Samaria un sien Kjennich, aus een Spletta opp däm Wotaspieejel.

⁸Un de Hechten von Awen, de Sind Israels, woaren vetilcht woaren; Hachels un Distlen woaren äwa äare Aultoaren waussen. Un see woaren to de Boaj sajen: Bedakjt ons! Un to de Aunboaj: Fault opp ons!

⁹Von de Doag en Gibea hast du jesindicht, Israel: Doa sent see stonen jebläwen; errieekjt an nich en Gibea de Striet jäajen de wadaspanstje Kjinja.

¹⁰No miene Lost woa ekj an strofen, un Velkja woaren jäajen an vesaumelt woaren, wan ekj an aun äare beid Sinden binjen woa.

¹¹Un Efraim es eene aum Joch jewande junge Koo, dee daut draschen leeft; un ekj, ekj sie äwa äarem scheenem Hauls häajefoaren: Ekj woa Efraim ennspaune, Juda saul plieejen, Jakob saul äajde.

¹²Seit junt Jerajchtichkjeit, arnt doano de Frommheit; plieecht junt eenen Niebroak: Dan daut es Tiet, däm Harn too sieekjen, bat hee kjemt un äwa junt Jerajchtichkjeit räajnen lat.

¹³Jie ha Jesazloosichkjeit jeplieecht, Orrajcht jearnt, de Frucht de Läajes jejäten; dan du hast opp dienem Wajch vetrut, opp de Menj diene Helden.

¹⁴Un daut woat sikj een Kjrichsjeschrech erhäwen unja diene Velkja, un aul diene vesechade Städen woaren doljeräten woaren, aus Schalman Bat-Arbel dolreet aum Kjrichsdach; de Mutta met äare Kjinja wort veschmatat.

¹⁵Aulsoo haft Betel uk jedonen om de Boosheit - june Boosheit wellen: Met däm Morjenroot woat Israels Kjennich jenslich venicht sennen.