Read De Bibel JHF Hosea 11 Bible Online

Hosea 11 - De Bibel JHF bible

Hosea 11

¹Aus Israel jung wia, doa leewd ekj an, un ut Ägipten ha ekj mien Sän jeroopen.

²Soo foaken see (de Profeeten) an roopten, jinjen see von äarem Aunjesecht wajch: See opfaden däm Baal un rieekjade dän jeschnädnen Bilda.

³Un ekj, ekj lieed Efraim gonen, - hee naum an opp siene Oarms - oba see erkjanen nich, daut ekj an heeld.

⁴Met menschlichem Baunt (Krauft) trock ekj an, met leewtolje Strenj; un ekj wort an aus soone, dee daut Joch opp äare Kjeen (Jenekj) aunhäwen, un saunft jäajen an, jeef ekj an too Äten.

⁵See woaren nich nodäm Ägiptenlaunt trigjgonen; sonda de Assura, dee woat sien Kjennich sennen, wiels see sikj jeweat ha omtodreien.

⁶Un daut Schwieet woat en siene Städa omhäa gonen un siene Rijel venichten, un woat fräten om äare Rotschläaj wellen;

⁷dan mien Volkj henjt aun däm Auffaul von mie, un roopt maun daut no bowen, kjeena von an häft sikj opp.

⁸Woo saul ekj die hanjäwen, Efraim, die hanjäwen, Israel? Woo sull ekj die aus Adama moaken, aus Zebojim die saten? Mien Hoat haft sikj en mie omjedreit, erräacht sent aul miene Erboarmungen.

⁹Ekj well nich miene Zorngloot utfieren, nich wada Efraim vedoawen; dan ekj sie Gott un nich een Mensch, dee Heilja en diene Medd, un ekj well nich en Zorngloot komen. -

¹⁰See woaren däm Harn hinjaraun gonen: Aus een Leiw woat hee brelle, un zetrich woaren de Kjinja vom Mäa no am komen;

¹¹aus de Väajel woaren see ut Ägipten komen un aus Duwen ut däm Launt de Assura; un woa an en äare Hiesa wonen loten, sajcht de Har.