Read De Bibel JHF Hosea 12 Bible Online

Hosea 12 - De Bibel JHF bible

Hosea 12

¹Met Läajes haft Efraim mie omrinjt, un daut Hus Israel met Droch; un Juda es emma noch wankent jäajen Gott un jäajen däm Heiljen, dee tru es.

²Efraim weid sikj aum Wint un jajcht däm Oostwint no; däm gaunzen Dach vemieet daut Läajes un Jewaultdoten; un see schluten eenen Bunt met Assur, un Eelj woat no Ägipten jebrocht.

³Uk met Juda haft de Har een Rajchtstriet; un hee woat Jakob no siene Wäaj strofen, no siene Haundlungen am vejelten. -

⁴Em Muttalief hilt hee sienem Brooda siene Hacken, un en siene Maunskrauft kjamft hee met Gott:

⁵Hee kjamft met däm Enjel un siecht, hee hild un bedd am; en Betel funk hee am, doa räd hee selfst met ons.

⁶Un de Har, dee Gott de Häaschoa - Jah es sien Nomen.

⁷Dan du, komm trigj no dienem Gott; bewoa Leew un Rajcht, un hop emma opp dienem Gott.

⁸Een Haundelsmaun es hee; en siene Haunt es eene faulsche Wichtschol, hee leeft sien Väadeel.

⁹Un Efraim sajcht: Ekj sie doch rikj jeworden, ha mie Vemäajen erwoawen; en aul mienem Jewenst woat maun mie kjeene Ojjerajchtichkjeit oppwiesen, dee doa eene Sind wia.

¹⁰Oba ekj sie de Har, dien Gott; vom Launt Ägipten häa; ekj woa die wada en Zelten wonen loten aus aun de Fastdoag.

¹¹Un ekj ha to de Profeeten jerät, jo, ekj ha Jesechta vemieet un derch de Profeeten en Jlikjnisen jerät.

¹²Wan Gilead Fräfel es, soo woaren see too Nuscht woaren. En Gilgal opfaden see Bolles; soo woaren uk äare Aultoaren aus Steenhupes sennen opp de Foaren oppem Flekj.

¹³Un Jakob rand no de Launtschoft von Aram, un Israel deend fa eene Fru un heed fa eene Fru.

¹⁴Un de Har fieed Israel derch eenem Profeet ut Ägipten enopp, un derch eenem Profeet wort daut jeheet.

¹⁵Efraim haft am bettalich jeoajat (jekjrenkjt), un sien Har woat siene Blootschult opp am loten un siene Schmach am vejelten.