Read De Bibel JHF Hosea 13 Bible Online

Hosea 13 - De Bibel JHF bible

Hosea 13

¹Wan Efraim räd, wia Schrakj; hee hoof sikj en Israel. Oba hee veschuldicht sikj derch Baal un storf.

²Un nu doonen see wiedahan sindjen un moaken sikj von äarem Selwa jegotne Bilda, Jetzenbilda no äarem Vestaunt, aula toop een Kjenslawoakj; krakjt von disem sajcht maun: De Menschen, dee doa opfren, kussen de Kjalwa!

³Doarom woaren see aus de Morjen-Wolkjen sennen un aus de Deiw, de tiedich veschwinjt, aus Sprie, dee vonne Däl doahan flicht, un aus Ruak ut däm Schorsteen.

⁴Oba ekj sie de Har, dien Gott, vom Launt Ägipten häa; un du kjanst kjeenen Gott buta mie, un doa es kjeen Rada aus ekj.

⁵Ekj ha die enne Wieste erkjant, em Launt de Gluaje.

⁶Aus äare Weid wia soo worden see saut, see worden saut, un äa Hoat erhoow sikj; doawäajen ha see mie vejäten.

⁷Un soo wort ekj an aus een Leiw; aus een Leopard lua ekj aum Wajch;

⁸Ekj woa an äwafaule aus eene Boarenmutta, däa de Junge jenomen sent, un woa dän Veschlut äare Brost verieten; un ekj woa an doa selfst vetäaren aus een Leiw; de Tieren vom Flekj woaren an verieten.

⁹Daut haft die too Grunt jebrocht, Israel, daut du jäajen mie, jäajen diene Help, best.

¹⁰Wua es dan nu dien Kjennich, daut hee die rad en aule diene Städa, un woa diene Rechta, von dän du sädst: Jeff mie eenen Kjennich un Ferschten?

¹¹Ekj jeef die eenen Kjennich en mienem Oaja, un naum am wajch en mienem Jrim.

¹²De Ojjerajchtichkjeit Efraims es toopjebungen, siene Sind es oppbewoat;

¹³De Weedoag eene Jebäarende woaren an aunkomen. Hee es een onweisa Sän; dan wan de Tiet doa es, stalt hee sikj nich en too Jeburt (toom derchbräakjen - de Kjinja).

¹⁴Vonne Jewault em Doodenrikj (griechisch: Hades) (Scheol) woa ekj an erleesen, vom Doot an frie moaken! Wua es, oo Doot, diene Past? Wua es, oo Doodenrikj (griechisch: Hades), dien Vedoawen? Metleet es ver miene Uagen vestoaken.

¹⁵Dan hee woat Frucht droagen unja de Breeda. Een Oostwint woat komen, een Wint Gottes vonne Wieste raufkomen, un sien Borm woat utdräjen un siene Kjwal veschwinjt; hee woat de Schauzkoma von aulem kostboaren Jereetschoft plindre.