Read De Bibel JHF Hosea 14 Bible Online

Hosea 14 - De Bibel JHF bible

Hosea 14

¹Samaria woat betolen, dan see sent wadaspanstich jäajen äarem Gott jewast; see woaren derch daut Schwieet faulen, äare Kjinja woaren veschmatat un äare Schwangre oppjeschlerzt woaren.

²Drei om, Israel, nodäm Harn, dienem Gott, dan du best jefollen derch diene Schult.

³Nämt Wieed met junt un dreit om nom Harn; sajcht to am: Vezei aule Schult, un nemm aun, waut goot es, daut wie de Frucht von onse Leppen aus Schlachtopfa brinjen.

⁴Assur woat ons nich raden; opp Pieed well wie nich rieden, un to däm jemoaktem Woakj onse Henj nich mea sajen: Ons Gott! Dan bie die finjen de Weise Erboarmen.

⁵Ekj well äare Auftranichkjeit heelen, well an wellich leewen; dan mien Oaja haft sikj von an aufjedreit.

⁶Ekj woa fa Israel aus Deiw sennen: Blieejen saul daut aus eene Lelje, un Wartlen schlonen aus de Libanon.

⁷Siene Asta sellen sikj utbreeden, un siene Pracht saul aus de Eeljboom sennen, un sien Jeroch aus de Libanon.

⁸Dee unja sienem Schauten wonen sellen aus daut Jeträajd wada oppläwen, un blieejen aus een Wienstock, däm sien Roop aus de Wien vom Libanon es.

⁹Efraim woat sajen: Waut ha ekj wiedahan met de Jetta too schaufen? Ekj, ekj ha am erhieet un opp am jekjikjt. - Ekj sie aus eene jreenende Ziepres. - Aun mie woat diene Frucht jefungen.

¹⁰Wäa weis es, dee woat dit vestonen; wäa vestendich es, dee woat daut erkjanen. Dan de Wäaj Gottes sent jlikj, un de Jerajchte woaren doabowen waundlen; oba de Iebel doonende woaren doabowen faulen.