Read De Bibel JHF Hosea 2 Bible Online

Hosea 2 - De Bibel JHF bible

Hosea 2

¹Doch de Zol de Kjinja Israel woat aus de Saunt aum Mäa sennen, dee nich jemäten un nich jetalt woaren kaun; un daut woat passieren, aun däm Uat, wua to an jesajcht wort: Jie sent nich mien Volkj, woat to an jesajcht woaren: Kjinja vom läwendjen Gott.

²Un de Kjinja Juda un de Kjinja Israel woaren sikj metenaunda vesaumlen, un sikj een Haupt saten un ut däm Launt nopptrakjen; dan groot es de Dach von Jesreel.

³Sajcht to june Breeda: Mien Volkj, un to june Sestren: Bejnodichte.

⁴Recht met june Mutta, recht! - Dan see es nich miene Fru, un ekj sie nich äa Maun - doamet see äare Huararie von äa Aunjesecht wajchdeit un äaren Ehebruch tweschen äare Brosten wajchnemt:

⁵om daut ekj ar nich noaktich uttrakj un ar hanstal aus aun däm Dach, doa see jebuaren wort, un ekj ar aus ne Wieste moak un ar moak aus een drieejet Launt un ar stoawen lot fa Darscht.

⁶Un äwa äare Kjinja woa ekj mie nich erboarmen, wiels see Huarenkjinja sent.

⁷Dan äare Mutta haft jehuat, äare Mutta dee an jebuaren haft, haft Schaund jedräwen; dan see säd: Ekj well miene Bolles nogonen, dee mie mien Broot un mien Wota jäwen, miene Woll un mien Flauss, mien Eelj un mien Jedrenkj.

⁸Doarom kjikj, ekj well dien Wajch met Hachels auftienen, un ekj well ar eene Mia opprechten, daut see äare Stiej (Wajch) nich finjen saul.

⁹Un see woat äare Bolles hinjaraun ranen un an nich errieekjen, un see woat an sieekjen un nich finjen; un see woat sajen: Ekj well hangonen un no mienen ieeschten Maun trigjgonen, dan donn jinkj daut mie bäta aus nu.

¹⁰Un see erkjand nich, daut ekj ar daut Jeträajd un Wien un daut Eelj jeef, un ar Selwa un Golt vemieed, waut see fa däm Baal vebrukt ha.

¹¹Doarom woa ekj mien Jeträajd trigj nämen to siene Tiet, un mien Wien to siene bestemde Tiet, un woa ar miene Woll un mien Flaus wajchnämen, dee äaren noaktjen Kjarpa bedakjen sullen.

¹²Un nu woa ekj äare Schaund opdakjen ver de Uagen äare Bolles, un kjeena woat ar ut miene Haunt raden.

¹³Un ekj woa aul äare Freid, äare Faste, äare Niemonen un äare Sabaten un aul äare Fasttieden een Enj moaken.

¹⁴Un ekj woa äarem Wienstock un äarem Fiejenboom vewuste, von däm see säd: Dise sent mien Loon, däm mie miene Bolles jejäft ha. Un ekj woa dee selje to eenem Woolt moaken, un de Tieren vom Flekj woaren an auffräten.

¹⁵Un ekj woa aun ar de Doag de Baal strofen, doa see däm seljen rieekjad un sikj met äare Uarinj un äare Haulskjäd schmock muak un äare Bolles nojinkj; oba mie haft see vejäten, sajcht de Har.

¹⁶Doarom kjikj, ekj woa ar locke un ar en de Wieste fieren un äa too Hoaten räden;

¹⁷un ekj woa ar von doa ut äare Wiengoades jäwen, un de Läacht Achor (Onjlekj) to eene Däa de Hopninj. Un see woat doa selfst sinjen aus en de Doag äare Jugent, un aus aun de Doag, doa see ut däm Launt Ägipten nopptrocken.

¹⁸Un daut woat passieren aun janem Dach, sajcht de Har, doa woascht du mie nanen: mien Maun; un du woascht mie nich mea nanen: Mien Baal.

¹⁹Un ekj woa de Nomes de Baal ut äarem Mul wajchdoonen, un see woaren nich mea met äarem Nomen erwänt woaren.

²⁰Un ekj woa aun janem Dach eenen Bunt fa an schluten met de Tieren vom Flekj un met de Väajel vom Himmel un met de krupende Tieren de Ieed; un ekj woa Boages un Schwieet un däm Kjrich ut däm Launt vebräakjen un woa an en Sechaheit wonen loten.

²¹Un ekj well die mie veleewen en Eewichkjeit, un ekj well die mie veleewen en Jerajchtichkjeit un en Jerecht, un en Jnod un en Boarmhoatichkjeit,

²²un ekj well die mie veleewen en True; un du woascht däm Har erkjanen.

²³Un daut woat passieren aun janem Dach, doa woa ekj erhieren, sajcht de Har: Ekj woa däm Himmel erhieren, un disa woat de Ieed erhieren;

²⁴un de Ieed woat daut Jeträajd un däm Wien un daut Eelj erhieren; un see, see woaren Jesreel erhieren.

²⁵Un ekj well an fa mie seien en däm Launt un well mie äwa de Lo-Ruhama erboarmen. Un ekj well too Lo-Ami sajen: Du best mien Volkj; un daut Volkj woat sajen: Mien Gott.