Read De Bibel JHF Hosea 5 Bible Online

Hosea 5 - De Bibel JHF bible

Hosea 5

¹Dit hieet, jie Priesta, un moakjt opp, Hus Israel! Un jie, Kjennichshus, nämt daut to Uaren! Dan junt jelt daut Jerecht; dan jie sent eene Schlenj fa Mizpa jeworden un een utjebreednet Nat opp däm Tabor;

²un daut Vedoawen ha de Auftranje wiet jedräwen. Oba ekj woa an aula trajchtwiesen.

³Ekj kjan Efraim goot, un Israel es ver mie nich veborjen; dan nu hast du Huararie jedräwen, Efraim, Israel haft sikj veonreinicht.

⁴Äare Haundlungen erlauben an nich, no äarem Gott trigjtokomen; dan de Jeist de Huararie es en äarem Ennalichen, un däm Har kjanen see nich.

⁵Un de Stolt Israels zeicht am em Aunjesecht, un Israel un Efraim woaren faulen derch äare Schult (Veschuldjungen); uk Juda fält met an.

⁶Met äarem Kjlienvee un met äare Rinda woaren see hangonen, om däm Harn too sieekjen, un woaren am nich finjen: Hee haft sikj von an trigjjetrocken.

⁷See ha ontru jäajen däm Harn jehaundelt, dan see ha framde Kjinja jebuaren; nu woat an de Niemon vetäaren met äarem Oawgoot.

⁸Steet en de Posaun too Gibea, en de Trompeeten too Rama; roopt lud too Bat-Awen: De Fient es hinja die häa, Benjamin!

⁹Efraim woat too Wieste woaren aum Strofdach; äwa de Stam Israels ha ekj duarhauftet Onjlekj vekjindicht.

¹⁰De Ferschten von Juda sent aus deejanje jeworden, dee de Jrensen veschuwe; äwa an woa ekj mien Oaja utjeeten aus Wota.

¹¹Efraim es bedrekjt, veschloagen vom Jerecht; dan wellich waundeld daut no Menschen Jebooten.

¹²Un ekj woa fa Efraim aus eene Motte sennen, un fa daut Hus Juda aus de Worm.

¹³Un Efraim sach siene Krankheit, un Juda sien Jeschwäa; un Efraim jinkj no Assur un schekjt nodäm Kjennich Jareb; oba dee kunn uk nich heelen un woat jun Jeschwäa nich vedriewe (von junt nämen).

¹⁴Dan ekj woa fa Efraim aus een Leiw sennen, un fa daut Hus Juda aus een junga Leiw. Ekj, ekj woa verieten un wajchgonen; ekj woa wajchdroagen, un kjeena woat raden.

¹⁵Ekj woa wajchgonen, aun mienem Uat trigjgonen, bat see äare Schult bekjanen un mien Aunjesecht sieekjen. En äare Bedrenkjnis woaren see mie iernsthauft sieekjen.