Read De Bibel JHF Hosea 6 Bible Online

Hosea 6 - De Bibel JHF bible

Hosea 6

¹«Komt un lot ons nodäm Harn trigjgonen; dan hee haft veräten un woat ons heelen, hee haft jeschloagen un woat ons vebinjen.

²Hee woat ons no twee Doag wada läwendich moaken, aum dredden Dach ons opprechten; un soo woa wie ver sienem Aunjesecht läwen.

³Soo lot ons däm Harn erkjanen, jo, lot ons trachten no siene Erkjantnis! Sien Erschienen es secha aus daut Morjenroot; un hee woat fa ons komen aus de Räajen, aus de Loträajen de Ieed feicht moakt».

⁴Waut saul ekj die doonen, Efraim, waut saul ekj die doonen, Juda, doa june Frommheit aus de Morjewolkj es, aus de Deiw, de tiedich veschwinjt?

⁵Doawäajen ha ekj an beschnäden derch de Profeeten, ha an dootjemoakt derch de Wieed ut mienem Mul; un mien Jerecht jeit väa aus daut Licht.

⁶Dan aun Frommheit ha ekj Jefaulen un nich aum Schlachtopfa, un aun de Erkjantnis Gottes mea aus aun Brauntopfa.

⁷Oba see ha däm Bunt äwaträden aus Adam, ha doa ontru jäajen mie jehaundelt.

⁸Gilead es eene Staut von Iebel doonende, voll Blootspuaren.

⁹Un aus een Gaussen-Reiba luat, soo de Priesta-Baund; see morden opp däm Wajch no Sichem, jo, see eewen Schaunddoten.

¹⁰Em Hus Israel ha ekj Schudahauftet jeseenen: Doa selfst drift Efraim Huararie, Israel haft sikj veonreinicht.

¹¹Uk äwa die, Juda, es eene Arnt bestemt, wan ekj de Jefangenschoft von mienem Volkj dreien woa.