Read De Bibel JHF Hosea 8 Bible Online

Hosea 8 - De Bibel JHF bible

Hosea 8

¹De Posaun aun dienem Mul! Aus een Odla felt hee opp daut Hus Gottes, wiels see mienen Bunt äwaträden un jäajen mien Jesaz jefräfelt ha.

²See woaren to mie schrieen: Mien Gott, wie kjanen die, wie, Israel! ...

³Israel haft daut Goode veschmäten: De Fient vefolcht an!

⁴See ha Kjennichs jemoakt, oba nich von mie ut; see ha Ferschten enjesat, un ekj wist daut nich. Von äarem Selwa un von äarem Golt ha see sikj Jetzenbilda jemoakt, doamet see venicht woaren.

⁵Hee haft dien Kaulf veschmäten, Samaria: Mien Oaja es jäajen an oppjeflaumt. Woo lang noch sent see de Reinheit onfäich?

⁶Dan uk dit es von Israel; een Kjensla haft daut jemoakt, un daut es kjeen Gott, dan daut Kaulf Samarias woat too Stekja woaren.

⁷Dan see seien Wint, un arnten Storm; Halma haft daut nich, daut utjelotne brinjt kjeen Mäl; wan daut uk Mäl brocht, soo wudden Framde daut veschlinjen.

⁸Israel es veschlungen; nu sent see unja de Nazionen aus een Jefäss jeworden, aun däm maun kjeen Jefaulen haft.

⁹Dan see sent no Assierien enopp jegonen. De Wiltäsel blift fa sikj auleen, oba Efraim haft Leefhaba aunjewoawen.

¹⁰Auf see uk unja de Velkja aunwoawen, nu well ekj an saumlen; un see woaren aunfangen, auftonämen wäajen de Laust vonne Ferschten de Kjennichs {Jes.10,8}.

¹¹Dan Efraim haft de Aultoaren vemieet toom Vesindjung, un de Aultoaren sent am to Vesindjung jeworden.

¹²Ekj schriew am 10 000 Jebooten ut mienem Jesaz väa: Aus Framdet woaren see jeacht.

¹³Aus Schlachtopfa, von miene Opfagow opfren see Fleesch un äten daut; de Har haft kjeen Wooljefaulen aun däm seljen. Nu woat hee äare Ojjerajchtichkjeit jedenkjen un äare Sinden bestrofen: See woaren no Ägipten trigjgonen.

¹⁴Un Israel haft däm vejäten, dee daut jemoakt, un haft Paulausten jebut, un Juda haft de fauste Städa vemieet; oba ekj woa een Fia en siene Städa schekjen, daut siene Paulausten vetäaren woat.