Read De Bibel JHF Hosea 9 Bible Online

Hosea 9 - De Bibel JHF bible

Hosea 9

¹Frei die nich, Israel, aus de Velkja jublen; dan du hast die von dienem Gott wajch jehuat, hast Huarenloon jeleeft opp aule Jeträajd Dälen.

²Draschdäl un Wienkjala woaren ar nich foodren, un de junga Wien woat an teischen.

³See woaren nich em Launt Gottes bliewen, sonda Efraim woat no Ägipten trigjgonen, un see woaren Orreinet äten en Assierien.

⁴See woaren däm Harn kjeen Wien spende, un äare Schlachtopfa woaren am nich aunjenäm sennen: aus Truabroot woat daut an sennen; aula, dee doavon äten, woaren sikj veonreinjen; dan fa äarem Hunga woat äa Äten sennen, en daut Hus Gottes woaren see nich komen.

⁵Waut woa jie aum Heljedach doonen un aum Fastdach Gottes?

⁶Un kjikj, see sent wajchjegonen wäajen de Vewustunk; Ägipten woat an saumlen, Memfis an begrowen; äare Kostboakjeite aun Selwa woat daut Brennkrut nämen, Hachels woaren en äare Zelten sennen.

⁷Jekomen sent de Toldoag, jekomen de Vejeltungsdoag; Israel woat daut erfoaren. De Profeet woat derchenaunda sennen, de jeistlicha Maun wonsennich, wäajen diene groote Ojjerajchtichkjeit un de groote Fintseelichkjeit.

⁸Efraim luat opp Openboarungen nich von mienem Gott; de Profeet - de Schlenj von eenem Voageljriepa es opp aule siene Wäaj, Fientseelichkjeit es em Hus von sienem Gott.

⁹See ha sikj sea (deep) vedorwen, aus aun de Doag von Gibea. Hee woat äare Onjerajchtichkjeiten jedenkjen, hee woat äare Sinden bestrofen.

¹⁰Ekj funk Israel aus Wiendruwen enne Wieste; aus eene tiedje Frucht aum Fiejenboom, en siene ieeschte Tiet, erwäld ekj june Vodasch. Oba see jinjen no Baal-Peor un weiden sikj de Schaund un see worden oaja aus äare Bolles.

¹¹Efraim - äare Harlichkjeit woat aus een Voagel wajchfläaje. Kjeen jebäaren un kjeen aundra Omstaunt un kjeen Emfangen:

¹²Jo, wan see uk äare Säns grootmoaken, soo woa ekj an doch Kjinjaloos moaken, soo daut kjeen Maun mea blift; dan wee an wan ekj von an wajchgonen woa!

¹³Efraim, aus ekj hankjikjt, wia een Tierus, oppe Stap jeplaunt; oba Efraim mott siene Säns toom aufwarje rutbrinjen.

¹⁴Jeff an, Har; waut woascht du an jäwen? Jeff an eenen Onfruchtboaren Muttalief un drieeje Brosten!

¹⁵Aule äare Boosheit es en Gilgal, dan doa ha ekj an jehaust. Wäajen de Boosheit äare Haundlungen woa ekj an ut mienem Hus vejoagen; ekj woa an nich mea leewen; aul äare Ferschten sent Auftranich.

¹⁶Efraim es jeschloagen: Äare Wartel es vedrieecht, see woaren kjeene Frucht brinjen; selfst wan see jebäaren, woa ekj de Leefkjinja von äarem Lief dootmoaken.

¹⁷Mien Gott veschmiet an, wiels see nich opp am jehieet ha; un see sellen Flichtlinja sennen unja de Nazionen.