Read De Bibel JHF Amos 1 Bible Online

Amos 1 - De Bibel JHF bible

Amos 1

¹De Wieed von Amos, dee unja de Hoads von Tekoa wia, dee hee äwa Israel jeseenen haft en de Doag Usija, däm Kjennich von Juda, un enne Doag Jerobeam, däm Sän Joasch, däm Kjennich von Israel, twee Joa ver däm Ieedbäben.

²Un hee säd: Gott woat ut Zion schrieen un ut Jerusalem siene Stemm schaule loten, un de Stapenhoads woaren truarich sennen, un de Spetz vom Karmel woat vedrieejen.

³Soo räd de Har: Wäajen 3 Fräfeldoten von Damaskus un wäajen 4 woa ekj daut nich trigjjenjich moaken: Wiels see Gilead met iesane Draschschlädes jedrascht ha,

⁴soo woa ekj een Fia schekjen en daut Hus Hasael, un daut woat de Paulausten Ben-Hadad vebrennen;

⁵un ekj woa däm Rijel von Damaskus vebräakjen, un de Bewona ut de Läacht Awen utroden, un däm, dee daut Zepta helt, ut Bat-Eden; un daut Volkj von Sierien woat no Kir wajchjefieet woaren, sajcht de Har.

⁶Soo räd de Har: Wäajen 3 Fräfeldoten von Gasa un wäajen 4 woa ekj daut nich trigjjenjich moaken: Wiels see Jefangne en vollen Zol wajchjefieet ha, om an aun Edom uttoleewren,

⁷soo woa ekj een Fia schekjen en de Mia von Gasa, un daut woat äare Paulausten vebrennen;

⁸un ekj woa de Bewona utroden ut Aschdod, un däm, dee daut Zepta helt, ut Askalon; un ekj woa miene Haunt jäajen Ekron dreien, un de Äwajebläwne de Filista woat unjagonen, sajcht de Har, Gott.

⁹Soo räd de Har: Wäajen 3 Fräfeldoten von Tierus un wäajen 4 woa ekj daut nich trigjjenjich moaken: Wiels see Jefangne en vollen Zol aun Edom utjeleewat un aun däm Bunt met de Breeda nich jedocht ha,

¹⁰soo woa ekj een Fia schekjen en de Mia von Tierus, un daut woat äare Paulausten vebrennen.

¹¹Soo räd de Har: Wäajen 3 Fräfeldoten von Edom un wäajen 4 woa ekj daut nich trigjjenjich moaken: Wiels see äare Breeda met daut Schwieet vefolcht un äa Erboarmen von sikj jedonen ha, un wiels sien Oaja un sien Jrim emma bewoat (helt),

¹²soo woa ekj een Fia no Teman schekjen, un daut woat de Paulausten von Bozra vebrennen.

¹³Soo räd de Har: Wäajen 3 Fräfeldoten de Kjinja Amon un wäajen 4 woa ekj daut nich trigjjenjich moaken: Wiels see de Schwangre von Gilead oppjeschlerzt ha, om äare Jrensen wieda too moaken,

¹⁴soo woa ekj een Fia enne Mia von Rabba aunstekjen, un daut woat äare Paulausten vebrennen unja Kjrichsjeschrech aum Kjampfsdach, aum Onwada Stormdach;

¹⁵un äa Kjennich woat en de Jefangenschoft gonen, hee met siene Ferschten, sajcht de Har.