Read De Bibel JHF Amos 2 Bible Online

Amos 2 - De Bibel JHF bible

Amos 2

¹Soo räd de Har: Wäajen 3 Fräfeldoten von Moab un wäajen 4 woa ekj daut nich trigjjenjich moaken: Wiels see däm Kjennijskjarpa von Edom too Kaulkj vebrent ha,

²soo woa ekj een Fia no Moab schekjen, un daut woat de Paulausten von Kerijot vebrennen; un Moab woat em Jetimmel stoawen, unja Kjrichsjeschrech, unja Posaunenschaul;

³un ekj woa däm Rechta ut äare Medd utroden un aule siene Ferschten met am ombrinjen, sajcht de Har.

⁴Soo räd de Har: Wäajen 3 Fräfeldoten von Juda un wäajen 4 woa ekj daut nich trigjjenjich moaken: Wiels see daut Jesaz Gottes veschmäten un siene Jebooten nich bewoat ha, un äare Läajes an vefieren, dän äare Vodasch nojegonen sent,

⁵soo woa ekj een Fia no Juda schekjen, un daut woat de Paulausten en Jerusalem vebrennen.

⁶Soo räd de Har: Wäajen 3 Fräfeldoten von Israel un wäajen 4 woa ekj daut nich trigjjenjich moaken: Wiels see däm Jerajchten fa Jelt un däm Oamen fa een Poa Schoo vekoften;

⁷see, dee doano luaren, dän Stoff vonne Ieed opp däm Kopp de Oame to seenen, un däm Wajch de Deemootje kromm moaken; un een Maun un sien Voda gonen no dee selje Hua, om mienem heiljen Nomen too entheiljen;

⁸un bie jiedrem Aultoa strakjen see sikj han opp jeliede Kjleeda, {2Mo.22,26.27; 5Mo.24,12.13} un em Hus von äarem Gott drinkjen see Wien vom Jelt de Jestroofte.

⁹Un doch ha ekj de Amorita ver an vetilcht, dee soo huach wia aus de Zeeda, un soo stoakj aus de Ieekj; un ekj ha siene Frucht von bowen un siene Wartlen von unjen vetilcht.

¹⁰Un doch ha ekj junt ut däm Ägiptenlaunt noppjefieet un junt 40 Joa enne Wieste jeleit, doamet jie daut Launt de Amorita besetten.

¹¹Un ekj ha Profeeten erwakjt ut june Säns un Nazara ut june Jinjlinje. Jo, es daut nich aulsoo, jie Kjinja Israel, sajcht de Har?

¹²Oba jie ha de Nazara Wien toom drinkjen jejäft, un de Profeeten befoolen un jesajcht: Jie sellen nich profezeien!

¹³Kjikj, ekj woa junt doldrekjen, aus de Woagen drekjt, dee voll Goawen es.

¹⁴Un däm Haustjen woat daut wajchranen vegonen; un de Stoakja woat siene Krauft nich derchsaten, un de Held sien Läwen nich raden;

¹⁵un dee met däm Boagen kjamft, woat nich staunthoolen; un dee doa schwind ranen kaun woat nich wajchranen, un dee oppem Pieet ritt woat sien Läwen nich raden;

¹⁶un de Browa unja de Helden woat aun janem Dach noaktich wajchranen, sajcht de Har.