Read De Bibel JHF Amos 3 Bible Online

Amos 3 - De Bibel JHF bible

Amos 3

¹Hieet dit Wuat, daut de Har äwa junt räd, jie Kjinja Israel, äwa daut gaunze Jeschlajcht, daut ekj ut däm Launt Ägipten noppjefieet ha! Endäm hee sajcht:

²Blooss junt ha ekj von aule Jeschlajchta de Ieed erkjant; doarom woa ekj aule june Misdoten aun junt strofen.

³Gonen uk twee metenaunda, see sent dan eent unjarenaunda?

⁴Brelt de Leiw em Woolt, wan hee kjeen Raup haft? Lat de junge Leiw siene Stemm ut siene Heel schaule, buta wan hee waut jejräpen haft?

⁵Fält de Voagel en de Schlenj oppe Ieed, wan am kjeene Schlenj jelajcht es? Häft maun de Schlenj von de Ieed nohecht, wan dee noch nuscht jejräpen haft?

⁶Ooda woat de Posaun en de Staut jeblost, un daut Volkj sull nich erschrakjen? Ooda passieet een Onjlekj enne Staut, daut de Har nich deit?

⁷Dan de Har, Gott, deit nuscht, hee openboat dan sien Jeheemnis de Profeeten, siene Kjnajchts.

⁸De Leiw brelt, wäa sull sikj nich enjsten? De Har, Gott, haft jerät, wäa sull nich profezeien?

⁹Vekjindicht äwa de Paulausten en Aschdod un äwa de Paulausten em Ägiptenlaunt un sajcht: Vesaumelt junt opp de Boaj von Samara, un kjikjt, de groote Vewerrunk en siene Medd un de Bedrekjte en sienem Ennalichen!

¹⁰Un see weeten nich waut Rajcht es, sajcht de Har, see, dee Jewault un Venichtunk saumlen en äare Paulausten.

¹¹Doarom, soo sajcht de Har, Gott: De Fient, es zwoa om daut Launt häa! Un hee woat diene Macht von die rauf rieten, un diene Paulausten woaren jeplindat woaren.

¹²Soo sajcht de Har: Soo aus de Hoad twee Been ooda eene Ualepp ut däm Rach de Leiws rad, aulsoo woaren de Kjinja Israel jerat woaren, dee en Samara enne Polstaakj un opp däm Damast vom Rubad setten.

¹³Hieet un bezeicht daut däm Hus Jakob, sajcht de Har, Gott, dee Gott de Häaschoa:

¹⁴Aun däm Dach, doa ekj Israels Äwaträdungen aun am bestrofen woa, woa ekj uk de Aultoaren von Betel strofen; un de Hieena von Aultoa sellen aufjebroaken woaren un oppe Ieed faulen.

¹⁵Un ekj woa daut Wintahus met däm Sommahus veschlonen; un de Aulfenbeen Hiesa woaren too Grunt gonen, de groote Hiesa woaren veschwinjen, sajcht de Har.