Read De Bibel JHF Amos 5 Bible Online

Amos 5 - De Bibel JHF bible

Amos 5

¹Hieet dit Wuat, daut ekj äwa junt erhäw, een Kloagleet, Hus Israel!

²See es jefollen, de Junkfru Israel, see woat nich wada oppstonen; see licht hanjeschmäten opp äarem Launt, kjeena recht ar opp.

³Dan soo sajcht de Har, Gott: De Staut, dee too 1000 utgonen, woat 100 äwahoolen, un dee too 100 utgonen, woat 10 äwahoolen fa daut Hus Israel.

⁴Dan soo sajcht de Har toom Hus Israel: Sieekjt mie un läft.

⁵Un sieekjt nich Betel opp, un got nich no Gilgal, un got nich äwa no Beerscheba; dan Gilgal woat wajchjefieet un Betel (Bat-Awen) woat toom Onheil woaren {Hos.4,15}.

⁶Sieekjt Gott un läft, doamet hee nich en daut Hus Josef nendrinjt aus een Fia un daut vebrent, un fa Betel kjeena doa es, dee daut lascht -

⁷see vewaundlen daut Rajcht en Warmät un schmieten de Jerajchtichkjeit oppe Ieed; -

⁸sieekjt däm, dee daut Säwenjestärn un däm Orion jemoakt haft, un däm Doodesschauten en Zemorjes vewaundelt un däm Dach too Nacht vedunkelt, dee de Wota em Mäa roopt un an utjit äwa däm Ieedboddem: Jahwe es sien Nomen;

⁹dee Vewustunk loosbräakjen lat äwa däm Stoakjen, un Vewustunk kjemt äwa de Fastinj.

¹⁰See haussen däm, dee em Dooa jerajcht Recht, un veaufschue däm, dee opprechtich räd.

¹¹Doarom, wiels jie de Oame doltraumple un Jeträajd von an nämen, ha jie Hiesa von 4 akjje Steena jebut un woaren nich doabennen wonen, scheene Wiengoades aunjeplaunt un woaren däm Wien nich drinkjen.

¹²Dan ekj weet, daut june Äwaträdunk un daut june Sinden väl sent; - see bedrenjen däm Jerajchten, nämen Leesjelt un bieejen daut Rajcht de Oame em Dooa.

¹³Doarom es de Ensechtja en dise Tiet stell, dan daut es eene beese Tiet.

¹⁴Tracht nom Gooden un nich nom Beesen, om daut jie läwen; un de Har, dee Gott de Häaschoa, woat soo met junt sennen, aus jie sajen.

¹⁵Haust daut Beese un leeft daut Goode, un recht em Dooa daut Rajcht opp; veleicht woat de Har, dee Gott de Häaschoa, de Äwaje von Josef jnädich sennen.

¹⁶Doarom sajcht de Har, dee Gott de Häaschoa, de Har, aulsoo: Opp aule Plauz Weekloagen! Un opp aule Gaussen woat maun sajen: Wee, wee! Un maun woat däm Akamaun toom Trua roopen, un dee daut Kloagleet utroopen toom Weekloagen;

¹⁷un en aule Wiengoades woat Weekloagen sennen. Dan ekj woa derch diene Medd gonen, sajcht de Har.

¹⁸Wee dän, dee sikj däm Dach Gottes wenschen! Too waut saul junt de Dach Gottes sennen? Hee woat Diestanis sennen un nich Licht:

¹⁹Soo aus wan wäa ver däm Leiw rant, un daut bejäajent am een Boa; un hee kjemt no Hus un stett siene Haunt aune Waunt, un doa bit am eene Schlang.

²⁰Woat dan nich de Dach Gottes Diestanis sennen un nich Licht, un Dunkelheit un nich Glauns?

²¹Ekj hauss, ekj veacht june Faste, un june fastliche Vesaumlungen mucht ekj nich rikjen:

²²Dan wan jie mie Brauntopfa un june Speisopfa opfren, ha ekj kjeen Wooljefaulen doaraun; un daut Frädensopfa von june jemaste Kjalwa mucht ekj nich aunkjikjen.

²³Doo däm Loarm von diene Leeda von mie wajch, un daut Späl, diene Hoapenspell mucht ekj nich hieren.

²⁴Oba daut Rajcht wällst sikj omhäa aus Wota, un de Jerajchtichkjeit aus een emma ranenda Stroom!

²⁵Jie ha mie 40 Joa en de Wieste Schlachtopfa un Speisopfa jebrocht, Hus Israel?

²⁶Jo, jie ha dän Sikkut von junem Kjennich un daut Jestall von june Jetzenbilda jedroacht, un daut Stearnbilt von junem Gott, dee jie junt jemoakt hauden.

²⁷Soo woa ekj junt äwa Damaskus wajchfieren, sajcht de Har, Gott de Häaschoa es sien Nomen.