Read De Bibel JHF Amos 6 Bible Online

Amos 6 - De Bibel JHF bible

Amos 6

¹Wee dän Sorjloosen en Zion un de Sechren (Sorjloosen) opp däm Boajch von Samara, de Väanämen de ieeschte de Nazionen, to dän daut Hus Israel kjemt!

²Got äwa no Kalne un kjikjt, un got von doa no Hamat, de groote Staut, un got rauf no Gat de Filista: Sent dee bäta aus dise Kjennichrikjs, ooda es äare Jrens jrata aus june Jrens?

³Jie, dee däm Ojjlekjsdach rutschuwe un däm Troon de Jewault dichta schuwen;

⁴dee opp Aulfenbeen Loaga ligjen un opp äarem Rubad sikj strakjen, un äten Lama ut de Häad un de jemaste Kjalwa;

⁵dee doa spälen oppe Hoap, aus David sikj Leeda un Musikj utdenkjen;

⁶dee Wien ut Schiewen drinkjen un met de baste Eelj sikj saulwen, un sikj nich jräme äwa Josef siene Wunden.

⁷Doarom woaren see nu wajchjefieet woaren aun de Spetz de Wajchjefieede, un daut Jeschrecht de Hanjestrakjte woat opphieren.

⁸De Har, Gott, haft bie sikj selfst jeschwuaren, sajcht de Har, dee Gott de Häaschoa: Ekj veaufschue Jakob sien Huachmoot un hauss siene Paulausten; un ekj woa de Staut hanjäwen un aules, waut en ar es.

⁹Un daut woat passieren, wan 10 Mana en eenem Hus äwabliewen, soo woaren see stoawen.

¹⁰Un häft eenem de Jestorwne sien Vewaunta un sien Vebrenna (wiels daut soo väl Doodes sennen woaren, daut maun dee vebrennen mott) opp, om de Doodes ut däm Hus ruttoschaufen, un saj to däm, dee em Ennalichen vom Hus es: Es noch wäa bie die? Un disa sajcht: Kjeena; soo woat hee sajen: Sie Stell! Dan de Nomen Gottes doaf nich erwänt woaren.

¹¹Dan kjikj, de Har befält, un maun schleit daut groote Hus en Trimma un daut kjliene Hus en Stekja.

¹²Ranen Pieed opp Steena, ooda plieecht maun met Rinda doa boowen? Daut jie daut Rajcht en Jeft un de Frucht de Jerajchtichkjeit en Warmät vewaundelt ha.

¹³Dee jie junt äwa Nuschtjet freien, dee jie sajen: Ha wie ons nich derch onse Krauft Hieena veschauft?

¹⁴Dan kjikj, ekj woa jäajen junt, Hus Israel, eene Nazion erwakjen, sajcht de Har, dee Gott de Häaschoa; un see woaren junt bedrekjen vom Engank Hamat aun bat nom Stroom aune Stap {2Kjen.14,25}.