Read De Bibel JHF Amos 7 Bible Online

Amos 7 - De Bibel JHF bible

Amos 7

¹Aulsoo leet mie de Har, Gott, seenen: Kjikj, hee muak Grauss Heischrakjen aum Aunfank vom Lotsomma; un kjikj, daut wia daut Lotgrauss no de Heiarnt de Kjennichs.

²Un daut passieed, aus see daut Krut vonne Ieed aufjefräten hauden, doa säd ekj: Har, Gott, vezei doch! Woo saul Jakob bestonen? Dan hee es kjlien.

³Gott deed daut leet: Daut saul nich passieren, sajcht de Har.

⁴Aulsoo leet mie de Har, Gott, seenen: Kjikj, de Har, Gott roopt, om met Fia too rechten {Jes.66,16}; un daut freet däm groote Stroom un freet daut Akalaunt (Oawdeel).

⁵Doa säd ekj: Har, Gott, lot doch auf! Woo saul Jakob bestonen? Dan hee es kjlien.

⁶Gott deed daut leet: Uk daut saul nich passieren, säd de Har, Gott.

⁷Aulsoo leet hee mie seenen: Kjikj, de Har stunt opp eene jlikje Mia, un eene Blieschnua wia en siene Haunt.

⁸Un de Har säd to mie: Waut sitst du, Amos? Un ekj säd: Eene Blieschnua. Un de Har säd: Kjikj, ekj laj eene Blieschnua aun mien Volkj Israel, en siene Medd; ekj woa wiedahan nich mea schoonent aun am vebie gonen.

⁹Un Isaak siene Hecht woat vewuste un de Heilichtums Israels venicht woaren, un ekj woa met daut Schwieet jäajen daut Hus Jerobeam oppstonen.

¹⁰Doa schekjt Amazja, de Priesta von Betel, no Jerobeam, däm Kjennich von Israel, un leet am sajen: Amos haft eene Veschwierunk jäajen die, enne Medd em Hus Israel, enjehizt; daut Launt woat aul siene Wieed nich vedroagen kjennen;

¹¹dan soo sajcht Amos: Jerobeam woat derch daut Schwieet stoawen, un Israel woat jewess ut sienem Launt wajchjefieet woaren.

¹²Un Amazja säd to Amos: Seena (em Verut seenen), go, ran en daut Launt Juda; un at dort dien Broot, un doa kaust du profezeien.

¹³Oba en Betel saust du nich mea profezeien; dan dit es een Heilichtum vom Kjennich, un hia es de Tempel vom Kjennichrikj.

¹⁴Un Amos auntwuad un säd to Amazja: Ekj wia kjeen Profeet un wia kjeen Profeeten Sän {1Kjen.20,35}, sonda ekj wia een Veehoad un laus Mulbäaren.

¹⁵Un de Har naum mie vonne Häad, un de Har säd to mie: Go han, profezei mienem Volkj Israel.

¹⁶Un nu hia daut Wuat Gottes: Du sajchst: Du saust nich profezeien äwa Israel un saust nich räden äwa daut Hus Isaak.

¹⁷Doarom sajcht de Har aulsoo: Diene Fru woat enne Staut eene Hoa woaren, un diene Säns un diene Dajchta woaren derch daut Schwieet faulen, un dien Launt woat vedeelt woaren met de Motschnua, un du selfst woascht en eenem orreinen Launt stoawen; un Israel woat jewess ut sienem Launt wajchjefieet woaren.