Read De Bibel JHF Amos 8 Bible Online

Amos 8 - De Bibel JHF bible

Amos 8

¹Soo leet mie de Har, Gott, seenen: Kjikj, een Korf met riepen Oft.

²Un hee säd: Waut sitst du, Amos? Un ekj säd: Eenem Korf met riepen Oft. Un de Har säd to mie: Daut Enj es äwa mien Volkj Israel jekomen, ekj woa nich mea schoonent aun am vebiegonen.

³Un de Jesank em Paulaust woat sikj aun janem Dach en Hielen vewaundlen, sajcht de Har, Gott. Väl Doodes ligjen aun jiedrem Uat — Stell!, dee hee hanjeschmäten haft.

⁴Dit hieet, dee jie de Älendje unjadrekjen un de Deemootje em Launt venichten,

⁵un sajcht: Wanea es de Niemon vebie, daut wie Jeträajd vekjeepen, un de Sabat, daut wie de Jeträajde Spikjasch opmoaken; om daut Efa too vekjlandren un däm Schekel too vejratren un de Wichtschol toom Bedrach to faulschen;

⁶om de Oame fa Jelt {3Mo.25,39}, un däm Älenden fa een Poa Schoo to kjeepen; un doamet wie däm Aufgank vom Jeträajd vekjeepen?

⁷De Har haft bie de Huachheit von Jakob jeschwuaren: Wan ekj aule äare Woakjen eewich vejäten woa!

⁸Sull daut Launt doawäajen nich bäben, un jiedra, dee doa wont, nich truaren? Un daut woat aules toop nohecht stieen aus de Niel, un äwaschwamen un trigjgonen aus de Stroom en Ägipten.

⁹Un daut woat passieren aun janem Dach, sajcht de Har, Gott, doa woa ekj de Sonn unjagonen loten aum Meddach un Diestanis äwa de Ieed brinjen aum hallichten Dach.

¹⁰Un ekj woa june Faste en Trua vewaundlen un aul jun Jesank en Kloagleeda, un woa opp aule Lenden Sakduak un opp jiedret Haupt eene Glauts brinjen; un ekj woa daut aus de Trua om däm Eenjebuarnen moaken, un daut Enj doavon aus eenen bettren Dach.

¹¹Kjikj, daut komen Doag, sajcht de Har, Gott, doa woa ekj Hunga en daut Launt schekjen, nich eenen Hunga no Broot un nich eenen Darscht no Wota, sonda nom Wuat Gottes to hieren.

¹²Un see woaren omhäa gonen vom Mäa toom Mäa un vom Nuaden bat nom Oosten; see woaren omhäa ranen, om daut Wuat Gottes too sieekjen, un woaren daut nich finjen.

¹³Aun janem Dach woaren de Junkfrues un de Jinjlinje fa Darscht veschmachten,

¹⁴dee doa schwieren bie de Schult Samaria un sajen: „Soo woa dien Gott läft, Dan!“ Un: „Soo woa de Wajch no Beerscheba läft!“ Un see woaren faulen un nich mea oppstonen.