Read De Bibel JHF Amos 9 Bible Online

Amos 9 - De Bibel JHF bible

Amos 9

¹Un ekj sach däm Harn aun däm Aultoa stonen; un hee säd: Schlo opp däm Knupps, daut de Schwalen bäben, un veschmata dee opp äa aula Haupt: Un ekj woa äare Latste met daut Schwieet ombrinjen; kjeen Flichtlinkj von an saul wajchranen un kjeena doavon Ranenda von an entkomen.

²Wan see en däm Scheol enbräakjen, woat miene Haunt an von doa holen; un wan see em Himmel noppstieen, woa ekj an von doa raufschmieten;

³un wan see sikj oppe Spetz vom Karmel vestoppen, ekj woa an doa sieekjen un holen; un wan see sikj, ver miene Uagen, opp däm Mäaresgrunt vestoppen, woa ekj von doa de Schlang befälen, un dee woat an bieten;

⁴un wan see ver äare Fiend häa - en Jefangenschoft gonen, woa ekj von doa daut Schwieet befälen, un daut woat an ombrinjen. Un ekj woa mien Uag jäajen an rechten toom Beesen un nich toom Gooden.

⁵Un de Har, Gott de Häaschoa, dee daut Launt aunschieet, un dee veschmelt, un daut truaren aula, dee opp äa wonen, un daut komen aula nohecht, aus de Nil, un sinkjt trigj, aus de Stroom Ägiptens;

⁶dee siene Bowastowen em Himmel jebut haft un siene Rundunge äwa de Ieed aus Grunt jelajcht haft; dee de Wota vom Mäa roopt un dee äwa de Ieed utjit: Jahwe es sien Nomen.

⁷Sent jie mie nich aus de Ätiopia, Kjinja Israel? Sajcht de Har. Ha ekj nich Israel ut däm Ägiptenlaunt noppjefieet, un de Filista ut Kaftor un de Siera ut Kir?

⁸Kjikj, de Uagen vom Harn, Jahwe, sent jäajen daut sindjen Kjennichrikj, un ekj well daut vom Ieedboddem vetiljen; blooss daut ekj daut Hus Jakob nich gaunz vetiljen woa, sajcht de Har.

⁹Dan kjikj, ekj well befälen un well daut Hus Israel unja aule Nazionen vestreien, aus Jeträajd en eenem Säw jesäwt woat; un nich een Kornkje woat oppe Ieed faulen.

¹⁰Aule Sinda en mienem Volkj woaren derch daut Schwieet faulen, dee doa sajen: Daut Onjlekj woat aun ons nich nodakomen un ons nich bejäajnen.

¹¹Aun janem Dach woa ekj David sien vefollnet Zelt opprechten un äare Räten toomiaren un äare Trimma opprechten, un ekj woa an buen aus aun de oole Doag;

¹²om daut see de Äwaje von Edom un aul de Nazionen aus Ieejentum nämen, äwa dee mien Nomen jenant woaren woat, sajcht de Har, dee dit deit.

¹³Kjikj, doa komen Doag, sajcht de Har, doa de Pläajenda aun däm Eifsta un de Wiendruwen klunja aun däm Seimaun wieda jäwen woat; un de Boaj woaren von jungen Wien lakje, un aule Aunboaj woaren veranen.

¹⁴Un ekj woa mienem Volkj Israel siene Jefangenschoft dreien; un see woaren de vewuste Städa oppbuen un bewonen, un Wiengoades plaunten un doavon Wien drinkjen, un Goades aunlajen un doavon Frucht äten.

¹⁵Un ekj woa an en äarem Launt plaunten; un see sellen nich mea rutjeräten woaren ut äarem Launt, daut ekj an jejäft ha, sajcht de Har, dien Gott.