Read De Bibel JHF Jona 3 Bible Online

Jona 3 - De Bibel JHF bible

Jona 3

¹Un daut Wuat Gottes erjinkj toom tweeden Mol aun Jona aulsoo:

²Moak die opp, go no Ninive, de groote Staut, un roop äa de Bootschoft ut, dee ekj die sajen woa.

³Doa muak Jona sikj opp un jinkj no Ninive, nom Wuat Gottes. Oba Ninive wia eene groote Staut; ne reis von dree Doag.

⁴Un Jona funk aun enne Staut nenn too gonen, eene Dach reis wiet, un hee roopt un säd: Noch 40 Doag, soo woat Ninive unjagonen!

⁵Un de Lied von Ninive jleewden Gott; un see roopten een Fausten ut un kjleeden sikj en Sakduak, von äare Jratste bat äare Kjlanste.

⁶Un daut Wuat kjeem bat däm Kjennich von Ninive; un hee stunt von sienem Troon opp un läd sienen Mauntel auf, un kjleed sikj en Sakduak un sad sikj enne Ausch.

⁷Un hee leet en Ninive, opp Befäl vom Kjennich un siene Groote, utroopen un sajen: Menschen un Vee, Rinda un Kjlienvee sellen nuscht äten, see sellen nich weiden un kjeen Wota drinkjen;

⁸un Menschen un Vee sellen met Sakduak bedakjt sennen un sellen kjraftich too Gott roopen; un see sellen trigjdreien, een jiedra von sienem Beesen Wajch un von däm Orrajcht, daut en äare Henj es.

⁹Wäa weet? Gott mucht sikj erboarmen (dreien) un sikj daut leet doonen loten, un omdreien von siene Zorngloot, daut wie nich omkomen.

¹⁰Un Gott sach äare Woakjen, daut see von äare beese Wäaj omjedreit wieren; un Gott deed daut Iebel leet, von waut hee jerät haud, daut hee an doonen wull, un deed daut nich.