Read De Bibel JHF 4. Mose 12 Bible Online

4. Mose 12 - De Bibel JHF bible

4. Mose 12

¹Un Mirjam un Aaron räden jäajen Moses wäajen dee kuschitische Fru, daut hee jenomen haud; dan hee haud eene kuschitische Fru jenomen.

²Un see säden: Haft de Har blooss to die auleen jerät? Haft hee nich uk met ons jerät? Un de Har hieed daut.

³Oba de Maun Moses wia sea saunftmootich, mea aus aule Menschen, dee oppem Ieedboddem wieren.

⁴Doa säd de Har plazlich too Moses un Aaron un to Mirjam: Got rut, jie 3, nom Zelt de Bejäajnunk! Un see jinjen rut, dee 3.

⁵Un de Har kaum en däm Wolkjestenda rauf un stunt aum Engank vom Zelt; un hee roopt Aaron un Mirjam, un de beid jinjen rut.

⁶Un hee säd: Hieet doch miene Wieed! Wan een Profeet unja junt es, däm well ekj, de Har, en eenem Jesecht mie too erkjanen jäwen, en eenem Droom well ekj met am räden.

⁷Nich aulsoo mien Kjnajcht Moses. Hee es tru en mienem gaunzen Hus;

⁸met am räd ekj von Mul too Mul, un dietlich un nich en Rotsel, un daut Bilt Gottes sitt hee. Un wuarom ha jie junt nich jefercht, jäajen mienen Kjnajcht, jäajen Moses, to räden?

⁹Un de Oaja Gottes flaumd jäajen an opp, un hee jinkj wajch.

¹⁰Un de Wolkj jinkj vom Zelt wajch, un kjikj, Mirjam wia utsauzich aus Schnee; un Aaron dreid sikj no Mirjam, un kjikj, see wia utsauzich.

¹¹Doa säd Aaron too Moses: Ach, mien Har! Laj doch nich de Sind opp ons, derch dee wie onweis jehaundelt un ons vesindicht ha!

¹²Mucht see doch nich aus een doodjet Kjint sennen, dee äa Fleesch, wan daut ut sienem Muttalief kjemt, aul haulf vewest es!

¹³Un Moses schrieech to däm Harn un säd: Oo Gott, ekj bedd die, heel ar doch!

¹⁴Un Gott (Jahwe) räd too Moses: Haud äa Voda ar veleicht em Aunjesecht jespäajen, sull see sikj nich säwen Doag lank schämen? See saul säwen Doag butrem Loaga enjeschloten woaren, un nodäm mucht see wada oppjenomen woaren.

¹⁵Un Mirjam wort säwen Doag butrem Loaga enjeschloten; un daut Volkj jinkj nich wieda, bat Mirjam wada oppjenomen wia.

¹⁶Oba nodäm jinkj daut Volkj von Hazerot un see loagaden sikj enne Wieste Paran.