Read De Bibel JHF 4. Mose 13 Bible Online

4. Mose 13 - De Bibel JHF bible

4. Mose 13

¹Un de Har räd too Moses un säd:

²Schekj Mana ut, daut see daut Launt Kanaan beseenen, daut ekj de Kjinja Israel jäwen well; je eenen Maun von däm Staum siene Vodasch sell jie schekjen, jiedra een Ferscht unja an.

³Un Moses schekjt an ut de Wieste Paran nom Befäl Gottes, aules Mana, dee Heipta de Kjinja Israel wieren.

⁴Un dit sent de Nomes: Fa däm Staum Ruben, Schammua, Sakkur sien Sän;

⁵fa däm Staum Simeon, Schafat, Choris sien Sän;

⁶fa däm Staum Juda, Kaleb, Jefunnes sien Sän;

⁷fa däm Staum Isachar, Jigal, Josef sien Sän;

⁸fa däm Staum Efraim, Hosea, Nuns sien Sän;

⁹fa däm Staum Benjamin, Palti, Rafu sien Sän;

¹⁰fa dän Staum Sebulon, Gaddiel, Sodi sien Sän;

¹¹fa däm Staum Josef, fa däm Staum Manasse, Gaddi, Susi sien Sän;

¹²fa däm Staum Dan, Ammiel, Gemalli sien Sän;

¹³fa däm Staum Aser, Sethur, Michael sien Sän;

¹⁴fa däm Staum Naftali, Nachbi, Wafsi sien Sän;

¹⁵fa däm Staum Gad, Geuel, Maki sien Sän.

¹⁶Daut sent de Nomes de Mana, dee Moses utschekjt, om daut Launt too beseenen. Un Moses nand Hosea, Nuns sienen Sän, Josua.

¹⁷Un Moses schekj an, om daut Launt Kanaan too beseenen, un säd to an: Got hia nopp derch daut Siedliche Launt, un got oppe Boajch,

¹⁸un bekjikjt daut Launt, woo daut es; un daut Volkj, daut doa wont, aus daut stoakj ooda schwak, auf daut jerinj ooda väl es;

¹⁹un woo daut Launt es, en däm daut wont, auf daut goot ooda schlajcht es; un woo de Städa sent, en dee see wonen, auf daut en Loaga ooda en Fastinj wont;

²⁰un woo daut Launt es, auf daut fat ooda moaga es, auf doa Beem sent ooda nich. Un fot Moot un nämt vonne Laundesfrucht. Oba de Doag wieren de Doag de ieeschte Druwen.

²¹Un see jinjen ut un bekjikjten daut Launt, vonne Wieste Zin bat Rechob, wan maun no Hamat jeit.

²²Un see jinjen aune siedliche Sied nopp un kaumen bat Hebron, un doa läwden Achiman, Scheschai un Talmai, de Kjinja Enaks. Oba Hebron wia säwen Joa ver Zoan en Ägipten jebut worden.

²³Un see kaumen bat en däm Tol Eskol un schneeden doa eene Wienrank met Wiendruwen auf un druagen dee too 2 aune Stang, uk Grenautapel un Fiejen.

²⁴Jan Uat nand maun Tol Eskol wäajen de Druwen, dee de Kjinja Israel doa aufjeschnäden hauden.

²⁵Un see kaumen no 40 Doag von däm Launt beseenen trigj.

²⁶Un see jinjen un kaumen no Moses un Aaron un no de gaunze Jemeent de Kjinja Israel en de Wieste Paran no Kades; un see brochten an un de gaunze Jemeent een Berecht un weesen an de Laundesfrucht.

²⁷Un see vetalden an un säden: Wie sent en daut Launt jekomen, wuahan du ons jeschekjt hast; un werkjlich, daut rant von Malkj un Honnich, un dit es siene Frucht.

²⁸Blooss daut et Volkj stoakj es, daut en däm Launt wont, un fauste Städa, sea groot; un uk de Kjinja Enaks ha wie doa jeseenen.

²⁹Amalek wont em Launt em Sieden, un de Hetita un de Jebusita un de Amorita wonen oppe Boaj, un de Kanaanita wonen aum Mäa un aune Sied vom Jordan.

³⁰Un Kaleb beschwicht daut Volkj jäajen Moses un säd: Lot ons noppgonen un daut Launt ennämen, dan wie woaren daut jewess äwawaultjen.

³¹Oba de Mana, dee met am noppjegonen wieren, säden: Wie kjennen nich jäajen daut Volkj noppgonen, dan daut es stoakja aus wie.

³²Un see brochten unjre Kjinja Israel een beeset Jeräd äwa daut Launt, daut see beseenen hauden, un säden: Daut Launt, daut wie derchjegonen ha, om daut to beseenen, es een Launt, daut siene Bewona frat; un aulet Volkj, daut wie doa jeseenen ha, sent huach jewossne Lied;

³³wie ha doa uk Riesen jeseenen, de Kjinja Enaks, vonne Riesen; un wie wieren en onse Uagen aus Heischrakjen, un aulsoo wieren uk wie en äare Uagen.