Read De Bibel JHF 4. Mose 18 Bible Online

4. Mose 18 - De Bibel JHF bible

4. Mose 18

¹Un Gott (Jahwe) räd too Aaron: Du un diene Säns un dien Vodahus met die, jie sellen de Strof (Ojjerajchtichkjeit) vom Heilichtum droagen; jie sellen de Sind von junem Priestatum droagen.

²Un uk diene Breeda, däm Staum Levi, däm Staum von dienem Voda, lot met die nodakomen, daut see sikj die aunschluten un die deenen; oba du un diene Säns met die, jie sellen ver däm Zelt de Bejäajnunk deenen.

³Un see sellen dienen Deenst doonen un däm Deenst aum gaunzen Zelt; blooss daut Jereetschoft vom Heilichtum un däm Aultoa sellen see nich nodakomen, daut see nich stoawen, soo aus see aus uk jie.

⁴Un see sellen sikj die aunschluten un däm Deenst aum Zelt de Bejäajnunk doonen no aulem Deenst vom Zelt; oba kjeen Framda saul junt nodakomen.

⁵Un jie sellen däm Deenst von Heilichtum un däm Deenst aum Aultoa doonen, daut kjeen Oaja mea äwa de Kjinja Israel kjemt.

⁶Un ekj, kjikj, ekj ha june Breeda, de Leviten, ut de Medd de Kjinja Israel jenomen; junt aus Jeschenkj - sent see däm Harn jejäft, om däm Deenst vom Zelt de Bejäajnunk too verechten.

⁷Oba du un diene Säns met die, jie sellen jun Priestatum doonen, en aulem, waut däm Aultoa betraft un hinjrem Väahank, un soo däm Deenst doonen; aus eenen jeschonknen Deenst jäw ekj junt - daut Priestatum. Oba de Framda, dee doatoo kjemt, saul stoawen.

⁸Un de Har räd too Aaron: Un ekj, kjikj, ekj ha die däm Deenst, miene Häwopfa jejäft; von aule heilje Dinj de Kjinja Israel ha ekj dee die un diene Säns jejäft, aus Saulwungsdeel, aus een eewjet Rajcht.

⁹Dit saul die jehieren von däm Huachheiljen, daut nich vebrent woat; aul äare Opfagowen no aul äare Speisopfa un no aul äare Sindopfa un no aul äare Schultopfa, dee see mie brinjen, aus een Huachheiljet saul daut die un diene Säns jehieren.

¹⁰Aun eenem huachheiljen Uat saust du daut äten, aulet Menliche saul daut äten; daut saul die heilich sennen.

¹¹Un dit saul die jehieren; de Häwopfa äare Gow, no aule Wäwopfa de Kjinja Israel; die un diene Säns un diene Dajchta met die toom eewjen Rajcht jejäft; jiedra Reina en dienem Hus saul daut äten.

¹²Aulet Baste vom Eelj un aulet Baste vom jungen Wien un Jeträajd, äa Ieeschtet, daut see däm Harn jäwen.

¹³De ieeschte Frucht von aulem, waut en äarem Launt waust, dee see däm Harn brinjen, saul die jehieren; jiedra Reina un dienem Hus saul doavon äten.

¹⁴Aules Jeweide en Israel saul die jehieren.

¹⁵Aules, waut de Muttaschoot derchbrakjt, von aulem Fleesch, daut see däm Harn brinjen, aun Mensch un Vee, saul die jehieren; blooss däm Ieeschtjebuarnen vom Mensch saust du leesen, un daut Ieeschtjebuarne vom orreinen Vee saust du leesen.

¹⁶Un dee too Leesende unja an saust du von eenem Moonat aun leesen, no dienem schaze, om 5 Schekel Selwa, nom Schekel vom Heilichtum, dee 20 Gera es.

¹⁷Oba de Ieeschtjebuarne vom Rind ooda daut Ieeschtjebuarne vonne Schop ooda daut Ieeschtjebuarne vonne Kose saust du nich leesen; see sent heilich. Äa Bloot saust du aun däm Aultoa spretzen, un äa Fat saust du aus Fiaopfa rieekjren toom leeftoljen Jeroch däm Harn.

¹⁸Un äa Fleesch saul die jehieren; aus de Brost vom Wäwopfa un aus de rajchta Schinkje saul daut die jehieren.

¹⁹Aule Häwopfa vonne heilje Gow, dee de Kjinja Israel däm Harn opphäwen, ha ekj die jejäft, un diene Säns un diene Dajchta met die, aus een eewjet Rajcht; daut es een eewjet Soltbunt ver däm Harn fa die un fa dienen Somen met die.

²⁰Un de Har räd too Aaron: En äarem Launt saust du nuscht oawen un saust kjeen Deel en äare Medd ha; ekj sie dien Deel un dien Oawgoot enne Medd de Kjinja Israel.

²¹Un kjikj, de Kjinja Levi ha ekj aulet 10-de en Israel toom Oawgoot fa äarem Deenst jejäft, däm see doonen, däm Deenst aun däm Zelt de Bejäajnunk.

²²Un de Kjinja Israel sellen nich mea nom Zelt de Bejäajnunk nodakomen, om Sinden opp sikj too loden, daut see stoawen;

²³välmea de Leviten sellen däm Deenst aum Zelt de Bejäajnunk verechten, un see sellen äare Misdot droagen; een eewjet Rajcht bie june Jeschlajchta. Oba see sellen enne Medd de Kjinja Israel kjeen Oawgoot kjrieen.

²⁴Dan dän Tieenden de Kjinja Israel, däm see däm Harn aus Häwopfa häwen; ha ekj de Leviten toom Oawgoot jejäft; doarom ha ekj to an jesajcht, daut see enne Medd de Kjinja Israel kjeen Oawgoot kjrieen sellen.

²⁵Un de Har räd too Moses un säd:

²⁶Un to de Leviten saust du räden un to an sajen: Wan jie von de Kjinja Israel daut 10-de nämen, däm ekj junt von an aus jun Oawgoot jejäft ha, soo sell jie doavon een Häwopfa fa däm Harn häwen, daut 10-de vom 10-den.

²⁷Un jun Häwopfa woat junt aunjeräakjent woaren aus daut Jeträajd vonne Draschdäl un aus de junga Wien von de Wienprass.

²⁸Aulsoo sell uk jie een Häwopfa fa däm Harn häwen von aul junem 10-den, daut jie von de Kjinja Israel nämen, un doavon daut Häwopfa fa däm Harn, Aaron, däm Priesta jäwen.

²⁹Von aulem, waut junt jejäft woat, sell jie däm Harn een Häwopfa jäwen, von aulem Basten daut jeheilichte Deel doavon.

³⁰Un du saust to an sajen: Wan jie daut Baste doavon häwen, soo saul daut de Leviten aunjeräakjent woaren aus eene Arnt de Draschdäl un aus de Arnt de Wienprass.

³¹Un jie derwen daut äten aun jiedrem Uat, jie un jun Hus; dan daut es jun Loon fa junem Deenst aum Zelt de Bejäajnunk.

³²Un jie woaren doawäajen kjeene Sind opp junt loden, wan jie daut Baste doavon häwen, un daut Jeheilichte de Kjinja Israel nich entheiljen un nich stoawen.