Read De Bibel JHF 4. Mose 21 Bible Online

4. Mose 21 - De Bibel JHF bible

4. Mose 21

¹Un de Kanaanita, de Kjennich von Arad, dee em Sieden wonden, hieeden, daut Israel oppem Wajch no Atarim kaum, un hee street jäajen Israel un fieed Jefangne von an wajch.

²Doa deed Israel däm Harn een Vespräakjen un säd: Wan du dit Volkj jewess en miene Haunt jefst, soo woa ekj siene Städa vebaunen.

³Un de Har hieed opp de Stemm Israels un jeef de Kanaanita en siene Haunt; un vebaunde an un äare Städa. Un maun gauf däm Uat däm Nomen Horma [Venichtunk].

⁴Un see jinjen vom Boajch Hor wieda, oppem Wajch nom Schelpmäa, om daut Launt Edom too omgonen. Oba de Volkjsseel wia oppem Wajch onjeduldich;

⁵un daut Volkj räd jäajen Gott un jäajen Moses: Wuarom ha jie ons ut Ägipten noppjefieet, daut wie enne Wieste stoawen? Dan doa es kjeen Broot un kjeen Wota, un onse Seelen äakjlen sikj fa disem schlajchten Äten.

⁶Doa schekjt de Har fiaje Schlangen unja daut Volkj, un see beeten daut Volkj; un daut storf väl Volkj en Israel.

⁷Doa kaum daut Volkj no Moses, un see säden: Wie ha jesindicht, daut wie jäajen däm Harn un jäajen die jerät ha; bedd to däm Harn, daut hee de Schlangen von ons wajch nemt. Un Moses bedd fa daut Volkj.

⁸Un de Har räd too Moses: Moak die eene Schlang un doo dee opp eene Stang; un daut woat passieren, jiedra, dee jebäte es un ar aunkjikjt, dee woat aum Läwen bliewen.

⁹Un Moses muak eene Schlang von Koppa un deed dee oppe Stang; un daut passieed, wan eene Schlang wäm jebäte haud, un hee kjikjt nohecht no de koppane Schlang, soo bleef hee aum Läwen.

¹⁰Un de Kjinja Israel jinjen wieda un loagaden sikj en Obot.

¹¹Un see jinjen wieda von Obot un loagaden sikj en Ijje-Abarim, enne Wieste, dee ver Moab jäajen Sonnenoppgank es.

¹²Von doa jinjen see wieda un loagaden sikj aum Bach Sered.

¹³Von doa jinjen see wieda un loagaden sikj jantsied von Arnon, daut enne Wieste es, un ut dee Jäajent de Amorita väakjemt. Dan de Arnon es de Jrens von Moab, tweschen Moab un de Amorita.

¹⁴Doarom heet daut em Kjrichsbuak Gottes: Waheb en Sufa un de Rieen von Arnon;

¹⁵un de Wotajrens de Läachten, dee sikj no de Wonsett Ar-Moab utstrakjt, un sikj aune Jrens von Moab länt.

¹⁶Un von doa jinjen see no Beer; daut es de Borm, von däm de Har too Moses räd: Vesaumel daut Volkj, un ekj well an Wota jäwen.

¹⁷Doa sung Israel dit Leet: Komt nom Borm! Sinjt von am!

¹⁸Borm, däm de Ferschten growe, dän de Väanämen vom Volkj, met de Jesazjäwa, jegroft ha met äare Stakja!

¹⁹Un ut de Wieste jinjen see no Mattana; un von Mattana no Nachaliel, un von Nachaliel no Bamot;

²⁰un von Bamot nodäm Tol, daut en Moab sienem Flekj es, nom huagen Boajch Pisga, dee jäajen de Wieste kjikjt.

²¹Un Israel schekjt Bootschofta no Sihon, däm Kjennich äwa de Amorita, un leet am sajen:

²²Lot mie derch dien Launt gonen! Wie wellen nich em Akalaunt un de Wienboaj gonen, wie wellen kjeen Wota ut de Borms drinkjen; oppem Kjennichswajch well wie gonen, bat wie derch diene Jäajent sent.

²³Oba Sihon leet Israel nich, derch siene Jäajent gonen; un Sihon vesaumeld aul sien Volkj un jinkj ut, Israel enne Wieste entjäajen, un kaum no Jahaz un kjamft jäajen Israel.

²⁴Un Israel schluach am met dän schoapen Schwieet un neem sien Launt en, vom Arnon bat aun Jabbok, bat de Kjinja Amon; dan de Jrens de Kjinja Amon wia faust.

²⁵Un Israel neem aul dise Städa, un Israel wond en aule städa de Amorita, en Hesbon un en aule siene Darpa.

²⁶Dan Hesbon wia de Staut von Sihon, däm Kjennich äwa de Amorita; un dise hauden verhäa met däm Kjennich äwa de Moabita jesträden un haud sien gaunzet Launt bat däm Arnon ut siene Haunt jenomen.

²⁷Doahäa sajen de Spruchrädna: Komt no Hesbon; oppjebut un faust jemoakt wort de Staut Sihon!

²⁸Dan Fia jinkj ut von Hesbon, eene Flaum von de Staut Sihon; daut freet Ar-Moab, de Haren de Hechten von Arnon.

²⁹Wee die, Moab; Volkj von Kamos, du best veloare! Hee haft siene Säns too Flichtlinkje jemoakt un siene Dajchta enne Jefangenschoft Sihon jefieet, vom Kjennich äwa de Amorita.

³⁰Doa ha wie opp an jeschote; Hesbon es veloaren bat Dibon; doa ha wie vewust bat Nofach - Fia bat Medeba!

³¹Un Israel wond em Launt de Amorita.

³²Un Moses schekjt Mana ut, om Jasa auntoseenen; un see neemen äare Darpa en, un hee dreef de Amorita rut, dee doa wieren.

³³Un see dreiden sikj un jinjen nopp oppem Wajch no Baschan; un Og, de Kjennich von Baschan, jinkj ut, an entjäajen, hee un aul sien Volkj, toom Kaumf no Edrei.

³⁴Un de Har räd too Moses: Enjst die nich fa am! Dan en diene Haunt ha ekj am jejäft un aul sien Volkj un sien Launt; un doo am, soo aus du Sihon, däm Kjennich äwa de Amorita, jedonen hast, dee en Hesbon wond.

³⁵Un see schluagen am un siene Säns un aul sien Volkj, bat am kjeen Wajchjeranda äwableef; un see neemen sien Launt en.