Read De Bibel JHF 4. Mose 22 Bible Online

4. Mose 22 - De Bibel JHF bible

4. Mose 22

¹Un de Kjinja Israel jinjen wieda un loagaden sikj enne Läacht Moab, jantsied vom Jordan, Jericho jäajenäwa.

²Un Balak, Zippor sien Sän, sach aules, waut Israel de Amorita jedonen haud.

³Un Moab enjst sikj sea ver däm Volkj, wiels daut groot wia, un daut gruld Moab ver de Kjinja Israel.

⁴Un Moab säd to de Eltestasch von Midian: Nu woat dis Hupe aules om ons häa oppfräten, aus daut Rind daut Jreene oppe Stap auffrat. Un Balak, Zippor sien Sän, wia too jane Tiet Kjennich von Moab.

⁵Un hee schekjt Bootschofta no Bieleam, Beor sienem Sän, no Pathor, daut aum Stroom [Efrat] es, en daut Launt siene Volkjskjinja, om am to roopen, un hee leet am sajen: Kjikj, een Volkj es ut Ägipten jekomen; kjikj, daut bedakjt daut gaunze Launt, un daut licht mie jäajenäwa.

⁶Un nu, komm doch, vefluch mie dit Volkj, dan daut es stoakja aus ekj. Veleicht jelinjt mie daut, daut wie daut schlonen un ekj daut utem Launt vejoag; dan ekj weet, wäm du säajenst, dee es jesäajent, un wäm du vefluchst, dee es veflucht.

⁷Un de Eltestasch von Moab un de Eltestasch von Midian jinjen met däm Woasaja Loon enne Haunt han. Un see kaumen no Bieleam un räden met am de Wieed von Balak.

⁸Un hee säd to an: Äwanacht dise Nacht hia, un ekj woa junt Auntwuat brinjen, soo aus de Har to mie räden woat. Un de Ferschten von Moab bleewen bie Bieleam.

⁹Un Gott kaum no Bieleam un säd: Wäa sent dise Mana?

¹⁰Un Bieleam räd too Gott: Balak, Zippor sien Sän, de Kjennich von Moab, haft no mie jeschekjt:

¹¹Kjikj, daut Volkj, daut ut Ägipten jegonen es, daut bedakjt daut gaunze Launt; komm nu, vewensch mie daut, veleicht kaun ekj jäajen an strieden un daut vejoagen.

¹²Un Gott säd to Bieleam: Du saust nich met an gonen; du saust daut Volkj nich vefluchen, dan daut es jesäajent.

¹³Un Bieleam stunt Zemorjes opp un säd to Balak siene Ferschten: Got en jun Launt; dan de Har haft sikj jewäat, mie too erlauben, met junt too gonen.

¹⁴Un de Ferschten von Moab muaken sikj opp un kaumen no Balak un säden: Bieleam haft sikj jewäat, met ons too gonen.

¹⁵Doa schekjt Balak noch eenmol Ferschten, mea un jratre aus jane.

¹⁶Un see kaumen no Bieleam un säden to am: Soo sajcht Balak, Zippor sien Sän: Lot die doch nich aufhoolen, no mie too komen;

¹⁷dan sea huach well ekj die ieren, un aules, waut du mie sajen woascht, well ekj doonen; soo komm doch, un vewensch mie dit Volkj!

¹⁸Un Bieleam auntwuad un säd to de Kjnajchts von Balak: Wan Balak mie sien Hus voll Selwa un Golt jeef, soo kunn ekj nich däm Befäl Gottes, mienem Gott, äwaträden, om Kjlienet ooda Grootet to doonen.

¹⁹Un nu blift doch hia, uk jie, dise Nacht, un ekj woa erfoaren, waut de Har wiedahan met mie räden woat.

²⁰Doa kaum Gott de Nacht no Bieleam un säd to am: Wan de Mana jekomen sent, om die to roopen, soo moak die opp, go met an; oba blooss daut, waut ekj die sajen woa, saust du doonen.

²¹Un Bieleam muak sikj Zemorjes opp un sodeld siene Äselin un jinkj met de Ferschten von Moab.

²²Doa flaumd de Oaja Gottes opp, daut hee hanjinkj; un de Enjel Gottes stald sikj em Wajch, am to wadastonen. Oba hee reet opp siene Äselin, un siene beid Jinjlinje wieren met am.

²³Un de Äselin sach däm Enjel Gottes oppem Wajch met sienem jetrocknem Schwieet enne Haunt stonen, un de Äselin buag von Wajch auf un jinkj oppem Flekj; un Bieleam schluach de Äselin, om ar wada oppem Wajch too lenkjen.

²⁴Doa kaum de Enjel Gottes en eene enje Städ tweschen de Wienboaj: Eene Mia wia opp dise, un eene Mia aun jane Sied.

²⁵Un de Äselin sach däm Enjel Gottes un drenjd sikj aune Waunt un drekjt Bieleam sienen Foot aune Waunt; un hee schluach ar noch eenmol.

²⁶Doa jinkj de Enjel Gottes nochmol wieda un jinkj aun eenem enjen Uat, woa kjeen Wajch wia om auftobäaje, noch no rajchtsch noch linkjsch.

²⁷Un aus de Äselin däm Enjel Gottes sach, läd see sikj unja Bieleam han; un daut flaumd de Oaja en Bieleam opp, un hee schluach de Äselin met däm Stock.

²⁸Doa deed de Har daut Mul de Äselin op, un see säd to Bieleam: Waut ha ekj die jedonen, daut du mie dree Mol jeschloagen hast?

²⁹Un Bieleam säd to de Äselin: Wiels du met mie Spott jedräwen hast; wan ekj een Schwieet en miene Haunt haud, soo haud ekj die nu omjebrocht.

³⁰Un de Äselin räd too Bieleam: Sie ekj nich diene Äselin, opp de du aul emma bat opp disem Dach jeräde hast? Wia ekj von jeehäa jewant, die aulsoo to doonen? Un hee säd: Ne.

³¹Doa muak de Har Bieleam siene Uagen op, un hee sach däm Enjel Gottes oppem Wajch stonen, met sienem jetrocknem Schwieet enne Haunt; un hee bekjt sikj un schmeet sikj opp sien Aunjesecht han.

³²Un de Enjel Gottes säd to am: Wuarom hast du diene Äselin dree Mol jeschloagen? Kjikj, ekj sie utjegonen, die too wadastonen, dan de Wajch däm du ver mie jeist fieet die em Vedoawen.

³³Un de Äselin sach mie un buag ver mie dree Mol auf; wan see nich ver mie aufjeboagen wia, soo haud ekj die nu omjebrocht, oba ar aum Läwen jeloten.

³⁴Un Bieleam säd toom Enjel Gottes: Ekj ha jesindicht, dan ekj wist nich, daut du mie oppem Wajch entjäajen stundst; un nu, wan daut en diene Uagen Iebel es, soo well ekj trigjdreien.

³⁵Un de Enjel Gottes säd to Bieleam: Go met de Mana; oba blooss daut, waut ekj die sajen woa, saust du räden. Un Bieleam jinkj met Balak siene Ferschten.

³⁶Un aus Balak hieed, daut Bieleam kjemt, doa jinkj hee ut, am entjäajen, no de Staut Ir-Moab, aun de Jrens von Arnon, dee aun de butaschte Jrens licht.

³⁷Un Balak säd to Bieleam: Ha ekj nich no die jeschekjt, om die to roopen? Wuarom best du nich no mie jekomen? Kaun ekj die nich ieren?

³⁸Un Bieleam säd to Balak: Kjikj, ekj sie no die jekomen; kaun ekj nu waut räden? Daut Wuat, daut Gott mie em Mul lajcht, daut woa ekj räden.

³⁹Un Bieleam jinkj met Balak; un see kaumen no Kirjat-Chuzoth.

⁴⁰Un Balak opfad Rinda un Kjlienvee un schekjt doavon däm Bieleam un de Ferschten, dee bie am wieren.

⁴¹Un Zemorjes passieed daut, doa naum Balak däm Bieleam un fieed am nopp no de Hechten von Baal, un hee sach von doa daut butaschte Deel vom Volkj.