Read De Bibel JHF 4. Mose 23 Bible Online

4. Mose 23 - De Bibel JHF bible

4. Mose 23

¹Un Bieleam säd to Balak: Bu mie hia 7 Aultoaren, un stal mie hia 7 junge Bolles un säwen Bakj reed.

²Un Balak deed, soo aus Bieleam jesajcht haud; un Balak un Bieleam opfaden eenen jungen Boll un eenen Bock opp jiedrem Aultoa.

³Un Bieleam säd to Balak: Stal die bie dienem Brauntopfa, un ekj well gonen; veleicht woat de Har mie entjäajen komen, un waut hee mie woat seenen loten, daut woa ekj die toweeten loten. Un hee jinkj opp eenen Aunboajch.

⁴Un Gott kaum Bieleam entjäajen; un disa räd to am: De 7 Aultoaren ha ekj jemoakt un opp jiedrem Aultoa eenen jungen Boll un eenen Bock jeopfat.

⁵Un de Har läd een Wuat en Bieleam sien Mul un säd: Go no Balak trigj, un soo saust du räden.

⁶Un hee jinkj no am trigj; un kjikj, hee stunt bie sienem Brauntopfa, hee un aule Ferschten von Moab.

⁷Doa hoof hee sienen Spruch aun un säd: Ut Aram haft Balak mie hiahäa jefieet, de Kjennich von Moab vonne Boaj vom Oosten: Komm, vefluch mie Jakob; jo, komm, vewensch Israel!

⁸Woo saul ekj vefluchen, däm Gott nich veflucht, un woo vewensche, däm de Har nich vewenscht haft?

⁹Dan vonne Boajchspetzen see ekj daut, un vonne Hechten rauf kjikj ekj doanopp; kjikj, een Volkj, daut aufjesondat wont un unja de Nazionen nich jeräakjent woat.

¹⁰Wäa kaun däm Stoff von Jakob talen un de Zol no, däm 4 Deel Israels? Miene Seel stoaw däm rajchtschaufnen Doot, un mien Enj es aus äa Enj!

¹¹Doa säd Balak too Bieleam: Waut hast du mie jedonen! Miene Fiend too vewensche ha ekj die holen loten, un kjikj, du hast an soogoa jesäajent!

¹²Un hee auntwuad un säd: Mott ekj nich doaropp achten, daut to räden, waut de Har en mienem Mul lajcht?

¹³Un Balak säd to am: Komm doch met mie aun eenem aundren Uat, von wua ut du daut seenen woascht; blooss sien Butaschtet woascht du seenen, un gaunz woascht du daut nich seenen; un vewensch daut mie von doa ut.

¹⁴Un hee naum am met nom Flekj de Wajchta, opp de Spetz von Pisga; un hee bud 7 Aultoaren un opfad eenen jungen Boll un eenen Bock opp janem Aultoa.

¹⁵Un hee säd to Balak: Stal die hia bie dienem Brauntopfa, un ekj, ekj well doa eene Bejäajnunk sieekjen.

¹⁶Un de Har kaum däm Bieleam entjäajen un läd een Wuat en sienem Mul un säd: Go no Balak trigj, un soo saust du räden.

¹⁷Un hee kaum no am, un kjikj, hee stunt bie sienem Brauntopfa, un de Ferschten von Moab met am. Un Balak säd to am: Waut haft de Har jerät?

¹⁸Doa hoof hee sien Spruch aun un säd: Sto opp, Balak, un hia! Hea opp mie, Zippor sien Sän!

¹⁹Gott es nich een Mensch, daut hee lieejen kaun, noch een Menschensän, daut et am leet deit. Sull hee jerät ha un daut nich doonen, un jerät ha un daut nich hoolen?

²⁰Kjikj, too säajnen ha ekj (däm Oppdrach) jekjräajen; un hee haft jesäajent, un ekj kaun daut nich trigjjenjich moaken.

²¹Hee sitt kjeene Ojjerajchtichkjeit en Jakob un sitt kjeen Orrajcht en Israel; de Har, sien Gott, es met am, un Jubeljeschrecht aus om eenen Kjennich es unja an.

²²Gott haft an ut Ägipten rutjefieet; siene Krauft es aus eenem Biffel siene.

²³Dan doa es kjeene Zaubarie jäajen Jakob, un kjeene Woasajerie jäajen Israel. Om dise Tiet woat von Jakob un von Israel jesajcht woaren, waut Gott bewirkjt haft.

²⁴Kjikj, een Volkj: Aus eene Muttaleiw steit daut opp, un aus een Leiw häft sikj daut opp! Daut lajcht sikj nich dol, bat hee däm Raup jefräten un daut Bloot de Jeschloagne jedrunken haft.

²⁵Doa säd Balak too Bieleam: Du saust daut goanich vewensche, un du saust daut nich säajnen.

²⁶Un Bieleam auntwuad un säd to Balak: Ha ekj nich to die jerät un jesajcht: Aules, waut de Har räden woat, daut woa ekj doonen?

²⁷Un Balak räd too Bieleam: Komm doch, ekj well die aun eenem aundren Uat metnämen; veleicht woat daut enne Uagen Gottes rajcht sennen, daut du daut mie von doa ut vewenschst.

²⁸Un Balak naum däm Bieleam met oppe Spetz vom Peor, dee äwa de Wiltnis es.

²⁹Un Bieleam säd to Balak: Bu mie hia 7 Aultoaren, un stal mie hia 7 junge Bolles un säwen Bakj reed.

³⁰Un Balak deed, soo aus Bieleam jesajcht haud; un hee opfad eenen jungen Boll un eenen Bock opp jiedren Aultoa.