Read De Bibel JHF 4. Mose 24 Bible Online

4. Mose 24 - De Bibel JHF bible

4. Mose 24

¹Un aus Bieleam sach, daut et goot wia en de Uagen Gottes, Israel too säajnen, soo jinkj hee nich, aus de aundre Mol, ut opp Woasajen, sonda recht sien Aunjesecht no de Wieste han.

²Un Bieleam hoof sien Aunjesecht un sach Israel, jeloagat no siene Stam; un de Jeist Gottes kaum äwa am.

³Un hee hoof sien Spruch aun un säd: Daut räd Bieleam, Beor sien Sän, un daut räd de Maun, däm de Uagen opjemoakt wieren.

⁴Doa räd, dee doa hieet de Wieed Gottes, dee daut Jesecht vom Aulmajchtjen sitt, däm de Uagen opjemoakt woaren:

⁵Woo scheen sent diene Zelten, Jakob, diene Woninj, Israel!

⁶Aus de Läachten breeden see sikj ut, aus Goades aum Stroom, aus Zippelfieabeem, dee de Har jeplaunt haft, aus Zeeda aum Wota!

⁷Ut siene Amasch woat Wota ranen, un em groote Wota woat sien Somen sennen; un sien Kjennich woat hecha sennen aus Agag, un sien Kjennichrikj woat erhowen sennen.

⁸Gott haft am ut Ägipten rutjefieet; siene Krauft es aus een Biffel. Hee woat de Nazionen, siene Fiend, fräten un siene Knoakes vemolen un met siene Feilasch an dolstrakjen.

⁹Hee bekjt sikj, hee lajcht sikj dol aus een Leiw un aus eene Muttaleiw; wäa well am oppwakjen? Dee die säajnen, sent jesäajent, un dee die vefluchen, sent veflucht!

¹⁰Doa flaumd Balak sien Oaja jäajen Bieleam opp, un hee schluach siene Henj toop; un Balak säd to Bieleam: Miene Fiend too vewensche ha ekj die jeroopt, un kjikj, du hast an soogoa jesäajent, nu aul dree Mol !

¹¹Un nu go aun dienem Uat. Ekj haud jesajcht, ekj well junt die huach ieren; un kjikj, de Har haft die de Iea vewäat.

¹²Un Bieleam säd to Balak: Ha ekj nich uk too diene Bootschofta, dee du no mie jeschekjt hast, jerät un jesajcht:

¹³Wan Balak mie sien Hus voll Selwa un Golt jeft, soo kaun ekj nich däm Befäl Gottes äwaträden, om ut mienem ieejnen Hoaten Goodet ooda Beeset to doonen; waut de Har räden woat, daut woa ekj räden?

¹⁴Un nu kjikj, ekj go no mienem Volkj. Komm, ekj well die sajen, waut dit Volkj dienem Volkj doonen woat aum Enj de Doag.

¹⁵Un hee hoof sien Spruch aun un säd: Daut räd Bieleam, Beor sien Sän, un daut räd de Maun däm de Uagen opjemoakt sent.

¹⁶Daut räd, dee doa de Wieed Gottes hieet, un dee de Erkjantnis vom Hechsten haft, dee een Jesecht vom Aulmajchtjen sitt, un däm de Uagen opjemoakt sent:

¹⁷Un kaun am seenen, oba nich nu, ekj kjikj opp am, oba nich von dichtbie; daut kjemt een Stiern ut Jakob, un een Zepta erhäft sikj ut Israel un veschleit de Heipta von Moab un veschmatat aule Säns vom Jetimmel.

¹⁸Un Edom woat een Ieejentum sennen un Seir een Ieejentum, siene Fiend; un Israel woat Majchtjet doonen.

¹⁹Un eena ut Jakob woat harschen, un hee woat ut de Staut de Äwajebläwne vetiljen.

²⁰Un hee sach Amalek un hoof sien Spruch aun un säd: De Ieeschta de Nazionen wia Amalek, oba sien Latstet woat däm Unjagank vefaule.

²¹Un hee sach de Kenita un hoof sien Spruch aun un räd: Faust es diene Wonstäd, un oppem Steen jesat dien Nast;

²²doch de Kenita saul vetilcht woaren, bat Assur die jefangen wajchfieet.

²³Un hee hoof sien Spruch aun un räd: Wee! Wäa woat aum Läwen bliewen, sooboolt Gott dit erfelt?

²⁴Un Schäp woaren von Kittim [Zupern] komen un woaren Assur deemutje, un Heber deemutje, un uk hee woat däm Unjagank vefaule.

²⁵Un Bieleam muak sikj opp un jinkj, un kaum aun sienem Uat trigj; un uk Balak jinkj sienen Wajch.