Read De Bibel JHF 4. Mose 25 Bible Online

4. Mose 25 - De Bibel JHF bible

4. Mose 25

¹Un Israel bleef en Sittim. Un daut Volkj funk aun too huaren met de Dajchta Moab;

²un dise loden daut Volkj to de Opfa äare Jetta en, un daut Volkj aut un bekjten sikj ver äare Jetta.

³Un Israel henjd sikj aun de Baal-Peor; un de Oaja Gottes flaumd jäajen Israel opp.

⁴Doa räd de Har too Moses: Nemm aule Heipta vom Volkj un henj an ver Gott (Jahwe) opp enne Sonn, doamet de Zorngloot Gottes sikj von Israel aufdreit.

⁵Un Moses räd to de Rechta Israels: Brinjt een jiedra siene Lied om, dee sikj aun däm Baal-Peor jehongen ha!

⁶Un kjikj, een Maun vonne Kjinja Israel kaum un brocht eene Midianitin no sienem Brooda, ver de Uagen Moses un ver de Uagen de gaunze Jemeent de Kjinja Israel, aus dise aun däm Engank vom Zelt de Bejäajnunk hielden.

⁷Un aus Pinehas, Eleasar sien Sän, von Aaron sienen Sän, däm Priesta, daut sach, doa stunt hee opp ut de Medd de Jemeent un neem een Spies en siene Haunt;

⁸un hee jinkj däm Israelischen Maun no em Ennalichen vom Zelt un derchstuak an beid, dän Israelischen Maun un de Fru, derch däm Buck. Doa hieed de Ploag von de Kjinja Israel opp.

⁹Un daut wieren dee aun de Ploag storwen, 24 000.

¹⁰Un de Har räd too Moses un säd:

¹¹Pinehas, Eleasar sien Sän, von Aaron sienen Sän, däm Priesta, haft mien Jrim von de Kjinja Israel aufjedreit, endäm hee en mienem Iewa en äare Medd jeiewat haft, soo daut ekj de Kjinja Israel nich en mienem Iewa vetilcht ha.

¹²Doarom saj: Kjikj, ekj jäw am mienen Frädensbunt;

¹³un hee woat am un sienem Somen no am een Bunt von eewjen Priestatum sennen, doarom daut hee fa sienen Gott jeiewat un fa de Kjinja Israel Veseenunk jedonen haft.

¹⁴Un de Nomen vom erschloagnen Israelischen Maun, dee met de Midianitin dootjeschloagen wort, wia Simri, Salus sien Sän, de Ferscht von eenem Vodahus de Simeonita;

¹⁵un de Nomen von de erschloagne midianitische Fru wia Kosbi, Zur siene Dochta; hee wia Staumeshaupt von eenem Vodahus unja de Midianita.

¹⁶Un de Har räd too Moses un säd:

¹⁷Bedrenjt de Midianita un schlot an;

¹⁸dan see ha junt bedrenjt derch äare Lest, met waut see junt äwalest ha en Peor siene Sach un de Sach de Kosbi, de Dochta von eenem Ferscht von Midian, äare Sesta, dee aum Dach de Ploag wäajen Peor dootjeschloagen wort.

¹⁹Un daut passieed no de Ploag,