Read De Bibel JHF 4. Mose 27 Bible Online

4. Mose 27 - De Bibel JHF bible

4. Mose 27

¹Un daut kaumen de Dochta Zelofchad, vom Sän Hefer, vom Sän Gilead, vom Sän Makir, vom Sän Manasse, vom Jeschlajcht Manasse, von Josef sienen Sän; un dit wieren de Nomes siene Dajchta: Machla, Noa un Hogla un Milka un Tirza.

²Un see kaumen ver Moses un ver Eleasar, däm Priesta, un ver de Ferschten un de gaunze Jemeent aun däm Engank vom Zelt de Bejäajnunk un säden:

³Ons Voda es enne Wieste jestorwen; oba hee wia nich unja de Aunhenja Korah, dee sikj jäajen däm Harn toopjedonen hauden, sonda hee es en siene Sind jestorwen; un hee haud kjeene Säns.

⁴Wuarom saul de Nomen von onsem Voda unjagonen ut sienem Jeschlajcht siene Medd, wiels hee kjeen Sän haft? Jeff ons een Ieejentum unja onsem Voda siene Breeda!

⁵Un Moses brocht äare Rajchtsach ver däm Harn.

⁶Un de Har räd too Moses un säd:

⁷De Dajchta Zelofchad räden rajcht; du saust an secha een Oawgoot unja de Breeda von äarem Voda jäwen, un saust daut Oawgoot von äarem Voda opp an äwagonen loten.

⁸Un to de Kjinja Israel saust du räden un sajen: Wan een Maun stoaft un kjeenen Sän haft, soo sell jie sien Oawdeel opp siene Dochta äwagonen loten.

⁹Un wan hee kjeene Dochta haft, soo saul hee sien Oawgoot siene Breeda jäwen.

¹⁰Un wan hee kjeenen Brooda haft, soo sell jie sien Oawgoot de Breeda von sienem Voda jäwen.

¹¹Un wan sien Voda kjeene Breeda haft, soo sell jie sien Oawgoot sienem Blootfrindschauft jäwen, däm, dee am aum dichtsten stunt, ut sienem Jeschlajcht, daut hee daut oaft. Un daut saul de Kjinja Israel een Jesaz un Rajcht sennen, soo aus de Har däm Moses befoolen haft.

¹²Un de Har räd too Moses: Go opp disem Boajch Abarim un bekjikj daut Launt, daut ekj de Kjinja Israel jejäft ha.

¹³Un hast du daut jeseenen, soo woascht uk du no diene Vodasch vesaumelt woaren, soo aus dien Brooda Aaron es vesaumelt worden;

¹⁴wiels jie enne Wieste Zin, biem Striet de Jemeent, wadaspanstich jewast sent jäajen mienen Befäl, aus jie mie ver äare Uagen derch daut Wota heilje sullen. (Daut es daut Striedwota von Kades enne Wieste Zin).

¹⁵Un Moses räd to däm Harn un säd:

¹⁶Daut bestal de Har, de Gott de Jeista von aulem Fleesch, eenen Maun äwa de Jemeent,

¹⁷dee ver an häa ut- un ennjeit, un dee an ut- un ennfieet; doamet de Jemeent Gottes nich es aus Schop, dee kjeenen Hoad ha.

¹⁸Un de Har räd too Moses: Nemm die Josua, däm Sän Nuns, eenen Maun, en däm de Jeist es, un laj diene Haunt opp am;

¹⁹un stal am ver Eleasar, däm Priesta, un ver de gaunze Jemeent, un jeff am Befäl ver äare Uagen,

²⁰un laj von diene Huagheit opp am, doamet de gaunze Jemeent de Kjinja Israel am jehorchen.

²¹Un hee saul ver Eleasar, däm Priesta, komen, un dee saul fa am om Rot froagen, derch däm Jebruck de Urim, ver däm Harn; no sienem Befäl sellen see ut- un nengonen, hee un aule Kjinja Israel met am, jo de gaunze Jemeent.

²²Un Moses deed, soo aus de Har am befoolen haud, un naum Josua un stald am ver Eleasar, däm Priesta, un ver de gaunze Jemeent,

²³un hee läd siene Henj opp am un jeef am Befäl, soo aus de Har derch Moses jerät haud.