Read De Bibel JHF 4. Mose 28 Bible Online

4. Mose 28 - De Bibel JHF bible

4. Mose 28

¹Un Gott (Jahwe) räd too Moses un säd:

²Befäl de Kjinja Israel un saj to an: Miene Opfagow, mien Broot von mienem Fiaopfa, mie toom leeftoljen Jeroch, sell jie hoolen to siene Tiet, daut jie mie daut opfren.

³Un saj to an: Dit es daut Fiaopfa, daut jie däm Harn brinjen sellen; twee eenjoasche Lama onen Fäla, jieda Dach, aus bestendjet Brauntopfa.

⁴Daut eene Laum saust du Zemorjes opfren, un daut tweede Laum saust tweschen de beid Owents opfren;

⁵un toom Speisopfa een 10-del Efa fienet Mäl, jemischt met eenem vieedel Hin jestaumtet Eelj,

⁶(een bestendjet Brauntopfa, daut aum Boajch Sinai enjesat wort, toom leeftoljen Jeroch, een Fiaopfa däm Harn;)

⁷un sien Drinkjopfa, een vieedel Hin to däm eenem Laum; em Heilichtum saust du daut Drinkjopfa von stoakjet Jedrenkj däm Harn opfren.

⁸Un daut tweede Laum saust du tweschen de beid Owents opfren; aus daut Speisopfa Zemorjes un sien Drinkjopfa, soo saust du to disem opfren, een Fiaopfa leeftoljen Jeroch däm Harn.

⁹Un aum Sabatdoag twee eenjoasche Lama onen Fäla, un aus Speisopfa twee tieendel fienet Mäl, jemischt met Eelj, un sien Drinkjopfa.

¹⁰Daut es daut Brauntopfa fa jiedren Sabat, buta däm bestendjen Brauntopfa un sienem Drinkjopfa.

¹¹Un aum Aunfank june Moonaten sell jie däm Harn een Brauntopfa brinjen; twee junge Bolles un eenen Bock, säwen eenjoasche Lama onen Fäla;

¹²un to jiedrem Boll dree tieendel fienet Mäl, jemischt met Eelj, aus Speisopfa; un to däm eenen Bock twee tieendel fienet Mäl, jemischt met Eelj, aus Speisopfa;

¹³un to jiedrem Laum een tieendel fienet Mäl, jemischt met Eelj, aus Speisopfa. Daut es een Brauntopfa, een leeftolja Jeroch, een Fiaopfa däm Harn.

¹⁴Un äare Drinkjopfa; een haulwet Hin Wien saul too eenen jungen Boll sennen, un een dreddel Hin to eenem Bock, un een vieedel Hin to eenem Laum. Daut es daut Moonatliche Brauntopfa en jiedrem Moonat, no de Moonaten vom Joa.

¹⁵Un een Kosenbock toom Sindopfa däm Harn saul biem bestendjen Brauntopfa un sienem Drinkjopfa jeopfat woaren.

¹⁶Un em ieeschten Moonat, aum 14-den Dach em Moonat, es Passa däm Harn.

¹⁷Un aum 15-den Dach en disem Moonat es daut Fast; säwen Doag saul onjesuadet jejäten woaren.

¹⁸Aum ieeschten Dach saul eene heilje Vesaumlunk sennen; kjeene Deenstoabeit sell jie doonen.

¹⁹Un jie sellen däm Harn een Fiaopfa, een Brauntopfa brinjen, twee junge Bolles un eenen Bock un säwen eenjoasche Lama; onen Fäla sellen see sennen;

²⁰un äa Speisopfa, fienet Mäl, jemischt met Eelj; dree tieendel sell jie opfren to eenem Boll, un twee tieendel toom Bock;

²¹een tieendel saust du opfren too jiedrem Laum, to de säwen Lama;

²²un 1-en Kosebock aus Sindopfa, om Veseenunk fa junt to doonen.

²³Buta däm Morjen-Brauntopfa, daut toom bestendjen Brauntopfa es, daut sell jie opfren.

²⁴Daut sell jie jieda Dach opfren, säwen Doag lank, aus Broot to eenem Fiaopfa leeftoljen Jeroch däm Harn; biem bestendjen Brauntopfa un sienem Drinkjopfa saul daut jeopfat woaren.

²⁵Un aum säwenden Dach sell jie eene Heilje Vesaumlunk hoolen; kjeene Deenstoabeit sell jie doonen.

²⁶Un aum Dach de Ieeschte Frucht, wan jie däm Harn een nieet Speisopfa brinjen, aun junem Wäakjenfast sell jie eene heilje Vesaumlunk hoolen; kjeene Deenstoabeit sell jie doonen.

²⁷Un jie sellen een Brauntopfa brinjen toom leeftoljen Jeroch däm Harn; twee junge Bolles, eenen Bock, säwen eenjoasche Lama;

²⁸un äa Speisopfa, fienet Mäl, jemischt met Eelj; dree tieendel too jiedrem Boll, twee tieendel to däm eenen Bock,

²⁹een tieendel too jiedrem Laum, to de säwen Lama;

³⁰un eenen Kosenbock, om Veseenunk fa junt to doonen.

³¹Butrem bestendjen Brauntopfa un sienem Speisopfa sell jie an opfren - onen Fäla sellen see sennen, doatoo june Drinkjopfa.