Read De Bibel JHF 4. Mose 3 Bible Online

4. Mose 3 - De Bibel JHF bible

4. Mose 3

¹Un dit sent de Jeschlajchta von Aaron un Moses, aun däm Dach, doa de Har oppem Boajch Sinai met Moses räd.

²Un dit sent de Nomes von Aaron siene Säns: De Ieeschtjebuarna Nadab, un Abihu, Eleasar un Ithamar.

³Dit sent de Nomes von Aaron siene Säns, däm jesaulwten Priesta, dee jeweit wieren, om däm Priestadeenst to doonen.

⁴Un Nadab un Abihu storwen ver Gott, aus see en de Wieste Sinai framdet Fia ver däm Harn brochten; un see hauden kjeene Säns. Un Eleasar un Ithamar deeden däm Priestadeenst ver äarem Voda Aaron.

⁵Un de Har räd too Moses un säd:

⁶Lot däm Staum Levi nodakomen en stal am ver Aaron, däm Priesta, daut see am deenen;

⁷un see sellen däm Deenst fa am doonen un däm Deenst fa de gaunze Jemeent ver däm Zelt de Bejäajnunk too doonen, om däm Deenst aun de Wonunk to doonen;

⁸un see sellen sorjen fa aulet Jereetschoft vom Zelt de Bejäajnunk un däm Deenst aun de Kjinja Israel doonen, om däm Deenst de Wonunk to doonen.

⁹Un du saust de Leviten däm Aaron un siene Säns jäwen; gaunz too ieejen sent see am jejäft vonne Kjinja Israel.

¹⁰Un Aaron un siene Säns saust du befälen, daut see äa Priestatum doonen. Oba de Framda, dee doatoo kjemt, saul stoawen.

¹¹Un de Har räd too Moses un säd:

¹²Un ekj, kjikj, ekj ha de Leviten ut de Medd de Kjinja Israel jenomen, enne Städ aule Ieeschtjeburt, dee de Muttaschoot derchbrakjt - unja de Kjinja Israel; un de Leviten sellen mie jehieren.

¹³Dan miene es de Ieeschtjeburt: Aun däm Dach, doa ekj aule Ieeschtjeburt em Ägiptenlaunt schluach, ha ekj mie aule Ieeschtjeburt en Israel jeheilicht vom Mensch bat toom Vee; mie sellen see jehieren, mie, Gott.

¹⁴Un de Har räd too Moses en de Wieste Sinai un säd:

¹⁵Mosta de Säns von Levi no äare Vodahiesa, no äare Familjes; aule Menliche von eenem Moonat un doaräwa saust du mostren.

¹⁶Un Moses mostad an nom Befäl Gottes, soo aus am befoolen wia.

¹⁷Un dit wieren de Säns Levi no äare Nomes: Gerson un Kehat un Merari.

¹⁸Un dit sent de Nomes de Säns Gerson no äare Familjes: Libni un Schimi.

¹⁹Un de Säns Kehat no äare Familjes: Amram un Jizhar, Hebron un Ussiel.

²⁰Un de Säns Merari no äare Familjes: Machli un Muschi. Daut sent de Familjes Levi no äare Vodahiesa.

²¹Von Gerson de Famielje de Libnita un de Famielje de Simeita; daut sent de Familjes de Gersonita.

²²Äare Jemostade no äare Zol aule Menliche von eenem Moonat un doaräwa, äare Jemostade; 7 500.

²³De Familjes de Gersonita loagaden hinjre Wonunk jäajen Wasten.

²⁴Un de Ferscht vom Vodahus de Gersonita wia Eljasaf, Lael sien Sän.

²⁵Un de Deenst de Säns Gerson aum Zelt de Bejäajnunk wia de Wonunk un daut Zelt, siene Dakjen, un de Väahank vom Engank em Zelt de Bejäajnunk,

²⁶un de Väahenjen vom Väahoff un de Väahank vom Engank em Väahoff, dee runtom de Wonunk un om däm Aultoa es, un siene Strenj too aulem Deenst.

²⁷Un von Kehat de Famielje de Amramita un de Famielje de Jizharita un de Famielje de Hebronita un de Famielje de Ussielita; daut sent de Familjes de Kehatita.

²⁸No de Zol aule Menliche von eenem Moonat un doaräwa, 8600, dee däm Deenst aum Heilichtum deeden.

²⁹De Famieljes de Säns Kehat loagaden aune Sied de Wonunk jäajen Sieden.

³⁰Un de Ferscht vom Vodahus de Famielje de Kehatita wia Elizafan, Ussiel sien Sän.

³¹Un äa Deenst wia; de Lod un de Desch un de Laump met Laumpenhoola un de Aultoaren, un daut Jereetschoft vom Heilichtum, met dee maun dän Deenst deed, un de Väahank, un waut too disem Deenst jehieet.

³²Un de Ferscht de Ferschten de Leviten wia Eleasar, de Sän von Aaron, däm Priesta; hee wia oppsechta äwa dee, dee däm Deenst aum Heilichtum deeden.

³³Von Merari de Famielje de Machlita un de Famielje de Muschita; daut sent de Famieljes Merari.

³⁴Un äare Jemostade no de Zol aula Menliche von eenem Moonat un doaräwa, 6200.

³⁵Un de Ferscht vom Vodahus de Famielje Merari wia Zuriel, de Sän Abichail. See loagaden aune Sied de Wonunk jäajen Nuaden.

³⁶Un de Deenst de Säns Merari wia; de Bräda de Wonunk, un äare Rijel un äare Stendasch un äare Feet un aul äa Jereetschoft un äa gaunza Deenst,

³⁷un de Stendasch vom Väahoff runtom un äare Feet un äare Näajel un äare Strenj.

³⁸Un dee ver de Wonunk jäajen ooste, ver däm Zelt de Bejäajnunk jäajen Sonnenoppgank loagaden Moses un Aaron un siene Säns, dee däm Deenst vom Heilichtum deeden, betrafs deejanje, waut de Kjinja Israel betroff. Oba de Framda, dee nodakjeemt, mott stoawen.

³⁹Aule Jemostade Leviten, dee Moses un Aaron nom Befäl Gottes no äare Famieljes mostade, aule Menliche von eenem Moonat un doaräwa, wieren 22 000.

⁴⁰Un de Har säd to Moses: Mosta aule Ieeschtjebuarne de Kjinja Israel, von eenem Moonat un doaräwa, un neem de Zol von äare Nomes opp.

⁴¹Un du saust de Leviten fa mie, däm Harn nämen, aune Städ aula Ieeschtjebuarne unja de Kjinja Israel, un daut Vee de Leviten aune Städ aule Ieeschtjebuarne unja däm Vee de Kjinja Israel.

⁴²Un Moses mostad, soo aus de Har am befoolen haud, aule Ieeschtjebuarne unja de Kjinja Israel.

⁴³Un daut wieren aule menliche Ieeschtjebuarne, no de Zol de Nomes, von eenem Moonat un doaräwa, nom mostren, 22 273.

⁴⁴Un de Har räd too Moses un säd:

⁴⁵Nemm de Leviten enne Städ aule Ieeschtjebuarne unja de Kjinja Israels un daut Vee de Leviten enne Städ äa Vee; un mie, sellen de Leviten jehieren, mie, Gott.

⁴⁶Un waut daut Leesjelt de 273 betraft, daut von de Ieeschtjebuarne de Kjinja Israel äwa de Zol de Leviten es,

⁴⁷soo saust du 5 Schekel fa däm Kopp nämen; nom Schekel vom Heilichtum saust du dee nämen, 20 Gera de Schekel.

⁴⁸Un daut Jelt saust du aus Leesjelt fa dee Äwajebläwne unja an Aaron un siene Säns jäwen.

⁴⁹Un Moses neem daut Leesjelt von dän, dee aun Zol mea aus dee vonne Leviten Jeleeste wieren,

⁵⁰von de Ieeschtjebuarne de Kjinja Israel neem hee daut Selwajelt, 1365 Schekel, nom Schekel vom Heilichtum.

⁵¹Un Moses jeef daut Selwajelt fa de Leesunk Aaron un siene Säns, nom Befäl Gottes soo aus de Har Moses befoolen haud.